ازاي يبقى عندك الشجاعة تتخلي عن الحاجات اللي مش قادرة تغيريها

بقلمريهام محمود فيمنوعات visibility309

في حاجات كتير ممكن تحصل في حياتنا مش بنقدر نغيرها, ومش بيكون لينا سيطرة او تحكم في ده, زي فقدان مثلا خسارة وظيفة, وفاة, احداث الحياة بشكل عام, الاجهاد, وبعض الاشخاص بيكون بالنسبة لهم موضوع تقبل الحاجات اللي مش قادرين يغيروها صعب عليهم, ولكن في النهاية عليكي انك تتقبلي ان في حاجات مش هتقدري تغيريها ولازم تقبليها زي ما هي, والنهاردة من خلال موضوعنا هنقولك ازاي تتخلي عن الحاجات اللي مش قادرة تغيريها.

ازاي تتخلي عن الحاجات اللي مش قادرة تغيريها:

حياتك هي بتكون نتيجة اجمالية لكل الاختيارات اللي بتاخديها بوعي وبدون وعي, ولو انتي تقدري تتحكمي في عملية الاختيار, هتقدري تتحكمي في كل جوانب حياتك.

في بعض الحاجات في الحياة لازم تتعلمي ازاي تعرفي تتخلي عنها, عشان يبقى عندك طاقة اكتر للتركيز على الحاجات اللي تقدري تتحكمي بيها في حياتك, لانه لو انتي بتقضي معظم الوقت في التفكير والخوف من الحاجات اللي مش قادرة تغيريها, مش هيبقى عندك طاقة للتركيز على الحاجات اللي تقدري تغيريها في الحياة, عشان كده من خلال السطوا الجايه هنقولك ازاي يبقى عندك الشجاعة الكافية لقبول الحاجات اللي مش هتقدري تغيريها, وتتعلمي ازاي تتخلي عنها.

1- ايه اللي تقدري تتحكمي فيه؟

في حقيقة في الحياة اشخاص كتير بيرفضوا انهم يقبلوها, وهي انك متقدريش تتحكمي في حاجات كتير بتحصل في الحياة.

ولكن ايه هي الحاجات اللي تقدري تتحكمي فيها؟ ايه الحاجات اللي عندك القدرة على تغييرها؟ ولازم نعرف ان معظم الحاجات دي هي معاكي انتي, يعني مش هتقدري انك تتحكمي او تغيري حياة غيرك, زي سلوكك, نظامك الغذائي, افكارك, ردود افعالك على المواقف المختلفة, كل الحاجات دي تعتبر حاجات ملموسة تقدري انك تغيريها وتتحكمي فيها.

يعني انتي متقدريش تمنعي عاصفة من انها تحصل لكن تقدري تستعدي لها كويس, مش هتقدري انك تتحكمي في تصرفات شخص تاني, ولكن تقدري تتحكمي في رد فعلك انتي.

ولما تحددي الحاجات اللي انتي تقدري تغيريها في الحالة دي هتعرفي تتحكمي فيها, وهيكون كل تركيزك عليها بدل ما يكون تركيزك مشتت على حاجات كتير تانية مش هتقدري تغيريها بسهولة, ركزي طاقتك دايما على نفسك بدل ما تركزيها على اللي حواليكي او على الحاجات اللي مش هتقدري تسيطري عليها, ودي تعتبر الخطوة الاولى اللي هتديكي الشجاعة اللي محتاجاها عشان تتخلي عن الحاجات اللي مش هتقدري تغيريها.

ازاي تتخلي عن الحاجات اللي مش قادرة تغيريها
ازاي تتخلي عن الحاجات اللي مش قادرة تغيريها

2- حددي مخاوفك:

اكيد مش هتقدري انك تبقي شجاعة ضد حاجة انتي مش عارفة اصلا هي ايه, او مش عارفة انتي خايفة من ايه, لازم تسألي نفسك ايه اللي انتي خايفة منه انه يحصل لو اتخليتي عن الحاجات اللي انتي مش هتقدري تغيريها, بمجرد ما تحددي الحاجات اللي انتي خايفة انها تحصل, تقدري بسهولة تحطي خطة عمل لو حصلت الحاجات اللي انتي توقعتيها دي.

يعني بدل ما تقعدي تفكري “انا خايفة اخسر شغلي” ابدأي فكري هعمل ايه لو خسرت شغلي؟ بدل التركيز على الخوف, ركزي على خطة العمل او الحل البديل.

وعادة اسوأ سيناريو ممكن يحصل في الحقيقة مش بيكون مخيف او بالحجم اللي انتي بترسميه في خيالك, ممكن انك تتعبي لفترة قصيرة من الوقت, ولكن قدامك فرصة انك تصلحي كل حاجة, وانك تبقي مدركة انك تقدري تتعاملي مع اسوأ سيناريو ممكن يحصل ده بيساعدك انك تحطي طاقتك في اماكن اكتر انتاجية او هتديكي نتيجة كويسة في النهاية.

يعني اتحدي الحاجات اللي مش هتقدري تغيريها بالحاجات اللي تقدري تتحكمي فيها, وهتلاقي الموضوع سهل اكتر انك تتخلي عن الحاجات اللي مش قادرة على تغييرها.

ازاي تتخلي عن الحاجات اللي مش قادرة تغيريها

3- القلق في مقابل حل المشكلة:

اكيد احنا بشر وفي النهاية بتمر علينا لحظات قلق من وقت للتاني, ولكن في فرق ما بين القلق على حاجة معينة, ومحاولة حل مشكلة ما, يعني لو انتي هتخسري وظيفتك هل المفروض تقضي وقتك كله مكتئبة وتقعدي تقلبي كل المخاوف في دماغك, وتفضلي مركزة على الحاجات السيئة والسلبية اللي ممكن تحصل بعد ما تخسري شغلك؟

ولا هيكون من المفيد اكتر انك تفكري في حلول للموقف ده, والتركيز على حل المشكلة, وتدي نفسك فرصة للتفكير, او اتخاذ قرارات او خطوات ممكن انها تحسن الوضع؟ عشان كده بنقولك ان في فرق كبير جدا ما بين القلق وحل المشكلة, وبمجرد ما يقل عندك القلق, هتلاقي عندك الشجاعة للتخلص من كل الحاجات اللي مش قادرة تغيريها, لانك هتبقي عارفة انك هتقدري تحلي المشكلة لو حصلت.

4- التأكيدات الصحية:

انتي هتكوني افضل مشجع لنفسك لما الامر هيتعلق بالحاجات اللي لازم تتخلي عنها, فلازم يكون عندك نظام دعم ذاتي في دماغك ال 24 ساعة, و 7 ايام في الاسبوع, وتشجعي نفسك على الاستمرار في الحياة, حتى لو الضغط اكتر من اللازم.

وهنا يجي دور التأكيدات الصحية اللي لازم تقوليها لنفسك طول اليوم عشان تقدري تستمري, قولي بينك وبين نفسك “انا اقدر اتحكم في نفسي”, “عندي القوة اللي اقدر اتعامل بيها مع اي حاجة”, افضلي رددي الجمل دي في دماغك, هي مجرد تأكيدات صحية وايجابية هتقوليها لنفسك لما تحسي بالقلق اتجاه الحاجات اللي مش قادرة تغيريها في حياتك.

ولكن ازاي التأكيدات الصحية دي ممكن تساعدك؟

حسب كلام الخبراء والمتخصصين, ان السبب اللي بيخلينا نحس بتحسن لما نردد الافكار الايجابية دي لنفسنا في شكل عبارات لفظية هو ان الطاقة الايجابية للافكار والصور الايجابية في ذهننا بترفع ترددنا الاهتزازي وبتسبب تغيرات كيميائية في اجسامنا بتقولنا اننا سعداء او مبسوطين.

في النهاية تعلم التخلي عن الحاجات اللي مش هتقدري تغيريها وقبولها هي عملية او تجربة كلنا بنمر بيها ولو مرة واحدة على الاقل في الحياة, وممكن الموضوع يبان صعب او مخيف, ولكن الحقيقة انها واحدة من افضل الحاجات اللي ممكن تعمليها عشان تحافظي على صحتك العقلية والعاطفية, وبمجرد ما يكون عندك الشجاعة دي جواكي, هتقدري انك تتقدمي وتتحركي في حياتك بخوف وقلق اقل من كل الحاجات اللي مش قادرة تغيريها او تتحكمي فيها في الحياة.

“سر السعادة هو الحرية .. وسر الحرية هو الشجاعة”.

8 طرق هيساعدوكي انك تقدري تاخدي القرار الصح دايما

القرار الصح