6 حيل يابانية لتحسين الصحة بيعملها كل اليابانيين

ريهام محمود
ريهام محمود
في
صحة
1296

حقيقة مثبتة ان اليابانيين اكتر ناس صحتهم كويسة جدا من بين كل شعوب العالم, وهنلاحظ ان عندهم معمرين كتير وبيعيشوا لسن كبير جدا فوق ال 80 وال 90 سنة ومحافظين على صحتهم ومش بيعانوا من امراض, واكيد ده مش من فراغ, ده سببه ان هما ملتزمين باسلوب حياة صحي جدا بتخليهم دايما صحتهم كويسة وكمان شكلهم اصغر من سنهم, والنهاردة من خلال موضوعنا هنقولكم على اكتر 6 حيل يابانية لتحسين الصحة, تقريبا كل اليابانيين بيعملوها.

حيل يابانية لتحسين الصحة:

1- الشاي الاخضر:

الشاي الاخضر بيساعد على خفض نسبة الكوليسترول في الدم, وكملن بيساعد على الوقاية من امراض خطيرة زي السرطان,, وبيحتوي على مضادات الاكسدة اللي بتحمي الجسم من اي ضرر, كمان بيحتوي على الكاتيكين, ومركبات البوليفنيول, اللي تعتبر عناصر مهمة جدا للحفاظ على صحة القلب والاوعية الدموية, كمان مفيد جدا لمشاكل صحية تانية زي مرض السكر.

الحاجات اللي هتحتاجيها:

من ½ – 1 معلقة صغيرة من الشاي الاخضر.

كوباية مية.

1 معلقة صغيرة عسل.

طريقة التحضير:

– هاتي براد الشاي حطي فيه المية وضيفي لها الشاي الاخضر.

– اغليه على النار غلوة واحدة.

– صفي الشاي الاخضر في كوباية, وحليه بالعسل واشربيه.

– اشربيه مرتين في اليوم.

حيل يابانية لتحسين الصحة 1
حيل يابانية لتحسين الصحة 1

2- ابدأي الوجبة بالشوربة:

التحكم في كمية الكربوهيدرات اللي بتدخل الجسم مهم جدا, وشرب الشوربة قبل الوجبة بيملى شهيتك تقريبا بنسبة 60% من غير ما تدخلي جسمك اي كربوهيدرات, وبالطريقة دي هتحسي بالشبع وتاكلي كمية اقل من الاطعمة الغنية بالكربوهيدرات اللي ممكن تضر جسمك, وتقدري تشربي اي نوع شوربة تفضليه ولكن احنا هنقولك اشهر شوربة يابانية مش بتخلى منها اي سفرة في اليابان لانها صحية جدا.

شوربة الكرنب الصيني “البوك تشوي”:

المكونات:

5 ورقات كرنب صيني “بوك تشوي”.

2 ثمرة بصل اخضر.

1 معلقة كبيرة زيت.

1 معلقة كبيرة جنزبيل وثوم مفروم.

1 معلقة صغيرة يانسون.

1 ورقة لوري.

5 كوبايات مية.

عود قرفة.

1 معلقة كبيرة صويا صوص.

1 معلقة كبيرة خل.

عصير ليمونة.

طريقة التحضير:

– هاتي ورق الكرنب اغسليه كويس تحت المية.

– قطعيه الكرنب شرايح, وقطعي البصل الاخضر شرايح خدي الجزء الابيض بس في الطبخ وخلي الجزء الاخضر للتزيين.

– هاتي حلة على النار حطي فيها الزيت وسخنيه كويس وضيفي له البصل الاخضر.

– ضيفي الجنزبيل والثوم للبصل وقلبيهم مع بعض لمدة من 1 – 2 دقيقة, وبعدين ضيفي الكرنب.

– سيبي الخليط يطبخ مع بعضه لمدة دقيقة, وبعدين ضيفي القرفة وورق اللوري واليانسون.

– ضيفي المية على المكونات, وقلبيهم كويس, وضيفي الخل والصويا صوص.

– قلبيهم كلهم مع بعض وسيبي الشوربة تغلي لمدة من 8 – 10 دقايق لحد ما تستوي, ارفعيها من على النار واعصري عليها عصير الليمون.

– طلعي منها الورق اللوري وعود القرفة, وقدميها سخنة.

تقدري تشربي من الشوربة دي يوم ويوم.

الشوربة بتحتوي على 4% بس من الكربوهيدرات, واللي مش بس هتساعد انها تحافظ على وزنك, ولكن كمان هتحافظ على صحة اعضاء الجسم, وهتحميكي من مشاكل القلب والاوعية الدموية.

حيل يابانية لتحسين الصحة 2
حيل يابانية لتحسين الصحة 2

3- التمارين الصحيحة:

الاشخاص في اليابان بيعتمدوا دايما على تمارين اليوجا والتمارين الخفيفة بدل التمارين العنيفة او المكثفة في الجيم, وهما بالطريقة دي بيوصلوا لنتايج اسرع وبيحافظوا على صحتهم.

تمرين Boat:

– نامي على ضهرك وضمي رجليكي جنب بعض وايدك جنبك, وكف الايد لتحت.

– عدي ل 4 وبعدين ارفعي رجليكي الاتنين والجزء العلوي من جسمك, وحافظي على الذراعين بشكل مستقيم, وشدي صوابع رجلك لفوق.

– اثبتي على الوضع ده لحد ما تقدري او تحسي انك تعبتي, وبعدين ارجعي للوضع الاول.

– كرري التمرين 10 مرات او اكتر, على قد ما تقدري تعمليه حسب قوة تحملك.

حيل يابانية لتحسين الصحة 3
حيل يابانية لتحسين الصحة 3

4- موازنة درجة حرارة جسمك:

السبب اللي بيخلي اليابانيين صحتهم كويسة هو انهم بيحترموا الطبيعة لاقصى حد, بيحترموا الجو وتغييرات الطقس وبيغيروا وجباتهم الغذائية حسب الجو حواليهم, على سبيل المثال الفواكه, اليابانيين بيدخلوا الفاكهة الموسمية في حياتهم كجزء من وجبة خفيفة بعد الضهر.

قايمة ببعض الفواكه الموسمية اللي بيعتمدوا عليها كل موسم:

موسم الشتا:

الجريب فروت.

الليمون.

البرتقان.

اليوسفي.

موسم الصيف:

البلاك بيري.

البلو بيري.

النكتارين.

الخوخ.

البرقوق.

موسم الربيع:

الافوكادو.

المانجا.

الاناناس.

الراوند.

الفراولة.

حيل يابانية لتحسين الصحة 4

5- العناية بالجسم للحفاظ عى توازن الجسم:

العناية بالجسم للحفاظ على توازن الجسم هما اكتر سببين ان اليابانيين صحتهم كويسة جدا, لما الموضوع بيتعلق بصحتهم فهما بيركزوا على الحاجات الصغيرة ويحاولوا يحسنوها على قد ما يقدروا, وابسط حاجة هي طريقة حمام خاص في البانيو بدل الاستحمام العادي بالدش ودي عادة بيعملها كل اليابانيين, ويعتبر فعال جدا في تنظيم وزن الجسم.

طريقة الحمام الياباني:

الحاجات اللي هتحتاجيها:

مية دافية حسب ما تحتاجي.

5 – 6 نقط من اي زيت عطري.

1 معلقة كبيرة ملح.

الطريقة:

– املي تقريبا 2/3 البانيو مية دافية.

– واتأكدي ان المية متكونش سخنة اوي, تبقى دافية بس.

– حطي في المية الزيت العطري, والملح وقلبي المية, وسيبيها لمدة دقيقة.

– انزلي اقعدي في البانيو, ومتحطيش صابون او شاور جل في المية, ممكن تكتفي بفقاعات البانيو او بشاور بزيت مغذي, وتقدري تستفيدي بالوقت اللي هتقعديه في البانيو انك تعملي ماسك لشعرك ولوشك كمان.

– اقعدي في المية لحد ما تلاقي المية بدأت تبقى باردة, اطلعي نشفي جسمك ورطبيه.

حيل يابانية لتحسين الصحة 5

6- العلاج بالمية:

مية الشرب العادية بتساعد في تحسين جودة الجهاز الهضمي وتحسين الصحة العامة كمان, ولكن مع ذلك, الحيلة هنا هي شرب المية بعد الصحيان من النوم مباشرة, لانها تعتبر الساعة الذهبية من اليوم, والمية على معدة فاضية بتخلص الجسم من كل السموم, وهنقولك شوية نصايح تعمليها عشان المية تجيب معاكي النتيجة المطلوبة.

النظرية اليابانية بتقول ان المية اليابانية بتعالج كل الامراض تقريبا وبتوفر اسلوب حياة صحي:

– اشربي من 4 – 6 كوبايات مية اول ما تقومي من النوم, وتكون كل كوباية حوالي من 160 – 200 ملليلتر, وخدي راحة دقايق ما بين كل كوباية والتانية لحد ما تخلصيهم.

– اغسلي اسنانك بعد شرب المية ومتاكليش حاجة قبل 45 دقيقة من شرب المية, متشربيش مية لمدة ساعتين على الاقل بعد الاكل.

– لو بتعاني من اي مشاكل صحية, ابدأي بشرب كوباية واحدة من المية وبعدين زودي العدد بالتدريج.

حيل يابانية لتحسين الصحة 6

مقالات متعلقه

ليه بتحسي بالتعب بعد الاكل؟

ليه بتحسي بالتعب بعد الاكل؟

10 نصايح صحية سهلة هيفرقوا معاكي

10 نصايح صحية سهلة هيفرقوا معاكي

10 نصايح ممكن تنقذ حياتك في يوم

10 نصايح ممكن تنقذ حياتك في يوم