12 موضة جمالية تريندي هتبقي عايزة تجربيهم اكيد في 2020
كل سنة الموضة بتتغير وفي حاجات بتظهر جديدة وحاجات تانية بتختفي, والنهاردة من خلال موضوعنا هنشوف مع بعض موضات جمالية تريندي في 2020, على الاقل هتحاولي انك تجربي نصهم قبل ما السنة ما تخلص.
موضات جمالية تريندي في 2020:
1- اكسسوارات الشعر:
من اتجاهات الموضة التريندي في 2020 هي اكسسوارات الشعر, رجعت بقوة جدا السنة دي, من اول الاكسسوارات التل او الشيفون لرفع الشعر او مع الكحكة, وحتى كمان دبابيس الشعر الكريستال موجودة السنة دي, واحدث حاجة للسنة دي هي الضفاير اللي ملفوفة بالاكسسوار, سواء سلسة او سكارف او لولي.
2- الايشادو الباستيل:
الالوان الباستيل من الحاجات الموضة جدا السنة دي, وتقدري تتحكمي في اللوك تعمليه قوي وجريء او خفيف, حطي اللون الباستيل على الجفن كله, او استخدمي لون باستيل لامع في زوايا العين بس, او استخدمي ايلاينر بالوان الباستيل.
3- المانيكير الفرنش:
المانيكير الفرنش تقريبا من الموضات اللي مش بتبطل ابدا ومعانا كل سنة, ومكمل معانا السنة دي كمان, سواء الفرنش الكلاسيك, او الفرنش الجريء العصري بأكتر من لون على اطراف الضوافر مع الكريستال او الجليتر.
4- الكريستال في كل مكان:
لما نقول كل مكان يعني على الضوافر والشعر والجفون, الكريستال او الستراس موضة جدا السنة دي انه يستخدم في اي مكان.
5- الحواجب الكثيفة:
موضة الحواجب المنحوتة اوي او الرفيعة موضة انتهت خلاص, الاتجاه دي هو الحواجب الكثيفة والسميكة اللي بتكون حدودها من فوق مش مترتبة اوي,, وكل ما كانت الحواجب شكلها طبيعي اكتر كل ما كانت افضل.
6- البشرة المضيئة:
البشرة المضيئة والشفايف اللي بتلمع واللوك الطبيعي من الحاجات الموضة جدا السنة دي, وتقريبا السنة دي الموضة عكس السنين اللي فاتت اللي كان سائد فيها الفينش المات للمكياج.
7- ستايل الستينات للشعر:
شعر الستينات من الحاجات التريندي السنة دي, من اول رفع اطراف الشعر لفوق, وتجعيد الشعر بطريقة ناعمة وتثبيتها بمثبتات الشعر.
8- استخدام اللوجو على الاظافر:
من الحاجات الموضة السنة للاظافر هي رسم لوجو البراندات المشهورة, زي لوجو شانيل, او جوتشي, او غيرها من البراندات المعروفة عالميا.
9- البلاشر:
البلاشر من خطوات المكياج اللي ممكن تغير اللوك بتاعك تماما, من لوك شكله مرهق ومجهد للوك حيوي وشكله حلو, والبلاشر السنة دي بيعتمد على الالوان الطبيعية اللي تدي لمسة صحية لشكل وشك وتبقى متناغمة مع مكياجك كله, وده معناه انك تعتمدي على الوان بلاشر نفس لون جفونك او لون شفايفك.
10- القوصة:
القوصة رجعت تاني في 2020, ولكن الجديد ان في تنويع في القوصة, من القوصة القصيرة, للطويلة الكاملة اللي بتكون واصلة للحواجب, كمان القوصة المجعدة والكينكي موضة للوك مودرن, والقوصة الفوضوية اللي بتطلع حلوة جدا مع الشعر الكثيف.
11- علاجات الشفايف:
الشفاة الممتلئة هي موضة وتريندي بقالها فترة ولسه مستمرة كمان في 2020, وهنلاقي انه بقى في دلوقتي علاجات وماسكات بتساعد على تكبير حجم الشفايف وكمان تقشيرها وتنعيمها وترطيبها.
12- ستايل ال Bobs للشعر:
مع ظهور اتجاه شعر الستينات بشكل كبير السنة دي, ستايل ال Bob من اكتر الحاجات اللي بتعبر عن لوك الستينات, ولكن ممكن تضيفي له شوية اضافات مختلفة عن السنين اللي فاتت.
بالنسبة ل 2020 ممكن تعتمدي على لوك البوب القصير والمتقطع وال Blunt bobs, والبوب المتقطع الطبقات من الموضات القوية جدا السنة دي.
وبننصحك اكيد في النهاية قبل اختيار القصة, لازم تعرفي شكل وشك عشان تختاري الستايل المناسب ليه, واستشيري مصفف الشعر الخاص بيكي في اختيار افضل ستايل مناسب ليكي, ومناسب لنوع شعرك والعناية بيه.