7 حاجات بتعملها الحامل ممكن تأثر على البيبي

ريهام محمود
ريهام محمود
في
صحة
33733

في كتير من المفاهيم الغلط حوالين الحمل, زي مثلا ان الست الحامل لازم تاكل كأنها بتاكل لشخصين, او انها المفروض تبعد عن شرب القهوة خلال 9 شهور الحمل, وبتفضلي تقري في معلومات كتير انتي مش عارفة ايه الصح وايه الغلط منها, ولكن الاكيد ان مش كل المعلومات الغلط, عشان كده النهاردة من خلال المقال بتاعنا هنقولك ايه هي سلوكيات فترة الحمل اللي المفروض تمتنعي عنها او تتجنبيها وايه الحاجات البديلة اللي المفروض تعمليها, عشان تحافظي على صحتك وصحة البيبي.

سلوكيات فترة الحمل:

1- الاسترخاء في حمام سخن او السونا:

الحرارة الشديدة في الساونا او في الحمام تعتبر مصدر قلق كبير اثناء فترة الحمل, ده ممكن يكون مريح بالنسبة لك انتي, ولكن مش كويس على الجنين لان البيبي وهو في بطنك مش بيقدر ينظم درجة حرارة جسمهم, وبعض الدراسات اكدت ان حرارة الساونا ممكن تأدي لمضاعفات خطيرة لعقل الجنين والنخاع الشوكي في المستقبل.

المفروض تعملي ايه:

– متستخدميش مية سخنة اوي, ومتقعديش في حمام سخن اكتر من 10 دقايق.

– خدي حمام مية فاترة بنفس درجة حرارة جسمك.

– استشيري الدكتور بتاعك لو قالك مافيش مشكلة من الساونا بالنسبة لك, حددي الوقت اللي هتقضيه في الساونا وحاولي انك متطوليش المدة.

سلوكيات فترة الحمل 1
سلوكيات فترة الحمل 1

2- بتاكلي سكر كتير:

كشفت بعض الدراسات ان الامهات اللي بياكلوا كمية كبيرة من السكر اثناء فترة الحمل, اطفالهم بيعانوا من مشاكل في التعلم والذاكرة, ونفس الشيء بينطبق على بدائل السكر.

المفروض تعملي ايه:

– كل فاكهة زيادة بدل الحلويات.

– قللي كمية الصودا لو بتشربي كميات كبيرة.

سلوكيات فترة الحمل 2
سلوكيات فترة الحمل 2

3- الخناق والصراخ:

الخناق بيسبب القلق والتوتر والاكتئاب, وده ممكن يضر بالجنين, وخصوصا جهاز المناعة والدماغ, بالاضافة لده الصوت العالي والصراخ ضار بالام وممكن يأدي لمشاكل زي الصداع والغثيان ومشاكل النوم.

المفروض تعملي ايه:

– ارتاحي اكتر.

– نامي عدد ساعات كفاية.

– مارسي التأمل.

– مارسي المشي واتنفسي هوا نقي.

سلوكيات فترة الحمل 3
سلوكيات فترة الحمل 3

4- العياط:

العياط اثناء فترة الحمل يعتبر امر طبيعي لان المشاعر بتبقى متقلبة جدا في الفترة دي والست بتبقى عاطفية اكتر, ولكن الموضوع ممكن يبقى مضر ولازم تاخدي بالك من اعراض تانية ممكن تحصل زي فقدان الشهية, الاحساس بالذنب, النوم الكتير, فقدان الاهتمام بعمل اي نشاط والكسل الزيادة, والاعراض دي كلها ممكن تبقى علامة على الاكتئاب واللي ممكن يأدي بعد كده لعواقب اكتر خطورة.

المفروض تعملي ايه:

– لو الاعراض دي استمرت اكتر من اسبوعين لازم تستشيري الدكتور.

– احصلي على الدعم, حاولي تتكلمي مع امهات تانيين, او حوامل تانيين غيرك.

سلوكيات فترة الحمل 4
سلوكيات فترة الحمل 4

5- مشاكل النوم:

حسب الابحاث, كشفت ان 78% من النساء بيعانوا من اضطرابات النوم بشكل اكبر اثناء فترة الحمل, والارق او قلة النوم دي ممكن انها تأدي للمزاج السيء الغثيان, وكشفت دراسة تانية كمان ان النساء اللي بيناموا اقل من 6 ساعات في الليلة بيكون عندهم الم الولادة اطول.

المفروض تعملي ايه:

– نظمي جدول نومك.

– حاولي تمارسي رياضة لمدة 30 دقيقة على الاقل في اليوم.

– اشربي سوايل كتير خلال اليوم.

– لو مش عارفة تنامي, متجبرش نفسك على النوم, لكن حاولي تقري كتاب و تسعمي موسيقى هادية, ولكن متعمليش اي نشاط ممكن يصحصحك اكتر.

– استشيري الدكتور عن افضل وضعية نوم مناسبة ليكي.

سلوكيات فترة الحمل 5

6- اسلوب حياة غير نشط والافراط في الاكل:

زيادة الوزن اثناء فترة الحمل ممكن يأدي لمضاعفات الولادة, ومشاكل في نمو الجنين, والحفاظ على وزن الام بعد الولادة, بالاضافة لده انه ممكن يسبب من خطر الاصابة بالسمنة عند الطفل في المستقبل.

المفروض تعملي ايه:

– الاطباء بينصحوا بممارسة 30 دقيقة من التمارين للنساء الحوامل اللي معندهمش مشاكل صحية, معظم ايام الاسبوع.

– متنسيش المشي هيحافظ على صحتك, وهيمد المخ بالاكسجين, وده مهم جدا لصحتك العقلية.

– حافظي على النظام الغذائي الخاص بيكي تحت السيطرة, والمرأة عادة بتحتاج ل 2000 سعر حراري يوميا, ومافيش داعي ابدا انك تغيري من النسبة دي في اول 6 شهور من الحمل, ولكن في ال 3 شهور الاخيرة ضيفي 200 سعر حراري زيادة يوميا.

سلوكيات فترة الحمل 6

7- بتشربي قهوة كتير:

عند شرب القهوة لازم تفتكري دايما ان الكافيين بيدخل للمشيمة وبيدخل مجرى الدم عند الطفل, والدراسات اثبتت ان الاستهلاك اليومي المفرط للكافيين ممكن انه يأثر بشكل سلبي على الجنين, وبشكل خاص, الحوامل اللي بيشربوا 8 كوبايات من القهوة او اكتر يوميا ممكن يبقى عندهم نسبة اعلى من خطر ولادة جنين متوفي.

المفروض تعملي ايه:

– الافضل انك تهتمي بالتغذية بتاعتك, وتقللي من الكافيين, شرب من 1 – 2 كوباية قهوة في اليوم تقريبا أمن ليكي.

في النهاية بننصحك انك دايما تستشيري الدكتور بتاعك اللي انتي متابعة معاه, عن الحاجات اللي المفروض متعمليهاش اثناء الحمل.

سلوكيات فترة الحمل 7

التغذية الصحية اثناء فترة الحمل: الاكلات المهمة واللي المفروض تتجنبيها

التغذية الصحية اثناء فترة الحمل
التغذية الصحية اثناء فترة الحمل

مقالات متعلقه

9 حقائق غريبة ولكن حقيقية جدا عن الحمل

9 حقائق غريبة ولكن حقيقية جدا عن الحمل

6 علامات مفاجئة للحمل معندكيش فكرة عنهم

6 علامات مفاجئة للحمل معندكيش فكرة عنهم

7 اطعمة بتاكلها الحامل بتأثر على البيبي بشكل فوري

7 اطعمة بتاكلها الحامل بتأثر على البيبي بشكل فوري