10 طرق للحماية من اي فيروس او وباء وازاي تحافظي على صحتك

بقلمريهام محمود فيصحة visibility820

طبعا كلنا شايفين دلوقتي العالم كله بيعاني من فيروس كورونا وقد ايه انتشاره سهل وسريع جدا, والاوقات دي اكيد كل الناس بتبقى خايفة وعايشة في حالة رعب وبيفكروا ان المرض هيوصلهم ومافيش مفر منه واكيد اي حد معرض لده, ولكن اجراءات الوقاية او الحماية هي الوحيدة اللي تقدر تمنع عننا اي عدوى او مرض, والنهاردة من خلال موضوعنا هنعرف طرق للحماية من اي فيروس او وباء بشكل عام, وازاي تحافظي على صحتك اثناء الازمات.

طرق للحماية من اي فيروس او وباء:

1- عدم خروج الشخص المريض من البيت:

واحد من الاسباب اللي بتخلي الناس تتعرض للمرض في فصل الشتا بشكل خاص, ده في الغالب بيحصل لان الناس في الجو البرد بتفضل انها تقعد في اماكن مقفولة, وده بيخلي انتشار المرض سهل, فلو انتي او اي حد من افراد الاسرة ظهر عليه بالفعل اعراض برد او انفلونزا او مرض عادي, الافضل تجنب الخروج بشكل عام والاماكن الزحمة بشكل خاص, ولكن لو الحالة المرضية شديدة بفيروس معين, يبقى في الحالة دي ضروري وضع المريض تحت الحجر الصحي او العزلة زي ما بيحصل حاليا مع مرضى فيروس كورونا.

طرق للحماية من اي فيروس او وباء
طرق للحماية من اي فيروس او وباء

2- الدوا قبل حدوث الاعراض:

بالنسبة للاشخاص اللي اصلا بياخدوا ادوية للربو او الحساسية, يبقى في الحالة دي الافضل استشارة دكتور متخصص على خطة ما قبل العلاج, واللي بيتم فيها علاج الاعراض قبل ما تحصل عشان يمنعوا خطر الاصابة بالمرض.

طرق للحماية من اي فيروس او وباء

3- تطهير الحاجات اللي بتستخدميها باستمرار:

زي ما المفروض على الاشخاص تجنب الخروج في الاماكن العامة في حالة المرض, مهم كمان بنفس القدر ان الاشخاص اللي صحتهم كويسة ومش بيعانوا من اي مرض تجنب الاتصال المباشر مع الاشخاص اللي ظاهرة عليهم اعراض مرض واضحة, وبالمثل المفروض يتم تعقيم الحاجات اللي اتلمست بشكل متكرر سواء في البيت او في مكان الشغل, وبالطريقة دي هتقدري تتجنبي الاتصال الغير مباشر مع شخص مريض.

طرق للحماية من اي فيروس او وباء

4- اطبخي اللحوم والبيض بشكل صح:

الاكل ممكن انه يحتوي على بكتيريا سامة ممكن تسبب اي مرض اما عن طريق اكله او لمسه, ومعظم الاطعمة, وخصوصا اللحوم والفراخ والاسماك والبيض, بتحتاج انها تتطبخ بشكل صح لقتل البكتيريا, وعادة المفروض الاكل يطبخ على درجة حرارة 75 درجة مئوية او اكتر سخونة, وعلى الاقل تكون على 60 درجة مئوية لما تيجي تاكليها.

طرق للحماية من اي فيروس او وباء

5- تجنب الاتصال مع الحيوانات:

الحيوانات ممكن انها تحمل جراثيم مختلفة مضرة ممكن انها تسبب مجموعة من الامراض اللي ممكن انها تتنقل للانسان, اللي ممكن تنتشر وتتنقل عن طريق اللمس او اللدغ او حتى عن طريق السكن في نفس المنطقة اللي بتعيش فيها حيوانات, واللي بتبقى معروفة بأسم الامراض الحيوانية المنشأ, ممكن انها تبقى حيوانات في مزرعة, وكمان الحيوانات البرية, كلها خطر على البشر, خصوصا اثناء انتشار اي وباء او فيروس, عشان كده على قد ما تقدري اتجنبي الحيوانات دي, ولو لمسهم امر مافيش مفر منه, يبقى الافضل غسل وتطهير ايديكي كويس جدا بعد التعامل معاهم او لمس الحاجات الخاصة بيهم او الاحتكاك بالمناطق اللي بيعيشوا فيها.

طرق للحماية من اي فيروس او وباء

6- اغسلي الفوط بعد الاستخدام مباشرة:

اكيد معظم الاشخاص بيستخدموا الفوطة اكتر من مرة عشان يقللوا عدد مرات الغسيل والمجهود, ولكن ده مش دايما آمن, لان الفوط ممكن تبقى ارض خصبة للجراثيم, وخصوصا لو بيستخدمها اشخاص مرضى, عشان كده مهم جدا تنضيف واستبدال الفوط باستمرار في الاماكن اللي عايش فيها اكتر من شخص, سواء فوط الحمام او المطبخ.

7- حافظي على رطوبة جسمك:

لما بتحسي بالمرض, الجسم بيبدأ في استخدام سوايل اكتر من الطبيعي, وده ممكن يسبب جفاف للجسم من غير ما تحسي, عشان كده ضروري جدا شرب 8 كوبايات من السوايل يوميا, ما بين المية, الشوربة, عصير الفاكهة, اللبن, القهوة منزوعة الكافيين, بالاضافة للحاجات دي كمان ممكن تمصي مكعبات تلج, او تاكلي ايس كريم او فواكة مجمدة, او تستخدمي جهاز مرطب منزلي, واتجنبي المشروبات اللي بتحتوي على سكر او كافيين.

8- تخزين لوازم البيت:

لو اتعرضت منطقتك او مدينك لتفشي فيروس او مرض, هتلاقي نفسك مش قادرة انك تخرجي من البيت, وعشان تبقي محضره نفسك للوضع ده, خزني الاكل ولوازم البيت لمدة اسبوعين في كل مرة, وحاولي انك تخزني الاطعمة اللي مش هتتلف بسرعة, زي الحاجات المعلبة في ازايز او كانز, اللي تقدري تخزنيها بسهولة, اتأكدي كمان انك تخزني ورق التواليت, ,منتجات التنضيف, مناديل, اكل الحيوانات الاليفة لو مربية حيوان اليف في البيت, الادوية واي لوازم طبية ممكن تحتاجيها.

9- البسي جوانتي في الاماكن العامة:

زي ما قولنا في النقط اللي فاتت ان الجراثيم بتنتشر بالايد, لبس الجوانتيات والماسكات الطبية ممكن انه يساعد في الحماية بشرط استخدامها بشكل صح, بالنسبة للجوانتيات, افتكري دايما ان ممكن جراثيم تتنقل لايدك وانتي بتقلعيه, عشان كده اتأكدي من غسل ايدك على طول بعد ما تقلعيه, زي العاملين في المجال الصحي, والحقيقة كمان انه الافضل غسل الايدين اثناء لبس الجوانتي, ولما تيجي تختاري الجوانتي دوري على الانواع اللي بتحمي من الجراثيم مش اي نوع وخلاص, لان الانواع الرخيصة ممكن انها تنقل الجراثيم والبكتيريا ومتوفرش الحماية الكافية.

10- خليكي حذرة مع الماسكات:

بشكل عام الماسكات الطبية تعتبر مفيدة, ولكن منتشر جدا استخدامها بشكل مش صح, بالنسبة للمبتدئين, المفروض انه يلبسها الاشخاص اللي فعلا ظهرت عليهم اعراض مرض, مش الاشخاص الاصحاء, ولتجنب انتشار الامراض المحتملة, هي مهمة بشكل خاص للاشخاص اللي بيشتغلوا في مجال الرعاية الصحية والاشخاص اللي بيعتنوا باشخاص تانيين, والمفروض ان الماسك ليه ناحيتين ناحية ملونة وناحية بيضا, المفروض ان الناحية الملونة تكون من بره والبيضا من جوه مواجهه للوش, لانه مهم جدا لبسه بشكل صح عشان المرشح اللي موجود فيه يقوم بمهمته بشكل مظبوط, ومهم جدا كمان استبدال الماسك بانتظام بعد كل استخدام, وتنضيف الوش والايد قبل وبعد كل استخدام.

خليكي مواكبة المعلومات الجديدة:

على الانترنت هتلاقي كل انواع المعلومات الخاصة باي وباء او فيروس, ولكن المعلومات المتاحة ممكن تكون مش صح, او مش مظبوطة, او حتى ليها دوافع سياسية, والموضوع متروك ليكي انك تتأكدي من استخدام مصادر موثوقة وحديثة تقدري تثقي فيها, واتأكدي من المعلومة من اكتر من مصدر.

علاجات طبيعية للامراض الشائعة اللي معظمنا بيشتكي منها

علاجات طبيعية للامراض الشائعة
علاجات طبيعية للامراض الشائعة