5 اساليب تسيطري بيهم على نوبة الغضب والصراخ على اطفالك

بقلمريهام محمود فيمنوعات visibility173

الامومة والابوة مهمة صعبة جدا, خصوصا لما الموضوع يتعلق بالسيطرة على الغضب عند الطفل, لان عادة الاطفال لسه عقلهم مش عارف يعني ايه تفكير ولا حلول, وده بيأدي للصراخ والعياط ونوبات الغضب المستمرة وسوء السلوك, لانهم لسه مش عارفين يعني ايه مهارات اجتماعية, وهما في سن صغير اوي بيبقوا عايشين في فقاعة صغيرة خاصة بيهم او في عالمهم الخاص, وبيكون من الصعب عليكي انك تحافظي على هدوئك وانتي مرهقة او مريتي بيوم سيء, والتعب هو جزأ لا يتجزأ من تربية الاطفال, ولسوء الحظ ان الاطفال كمان بيكون لسه متطورش عندهم الشعور بالتعاطف عشان يفهموا حالتك اللي انتي فيها, وبالتالي هيخرجوكي عن شعورك, ويخلوكي تفقدي اعصابك وتبدأي تصرخي وتدخلي في نوبة غضب شديدة عليهم, خصوصا لما ميسمعوش كلامك مع التكرار, ولكن الاسلوب ده اكيد ضار على الطفل, لانه الاطفال في السن الصغير بيعتمدوا عليكي بنسبة 100%, وبيحتاجوا انك تكوني الشخص الناضج والاكبر في اي موقف, ولانك انتي الكبيرة فبتقع عليكي مسؤولية الحفاظ على اعصابك لما يكون الوضع صعب, خصوصا على اطفالك اللي بيبقوا ضعفا جدا في السن الصغير ده وقابلين للتأثر بسرعة, عشان كده النهاردة من خلال السطور الجاية هنساعد كل الامهات ونقولك طرق للسيطرة على الغضب على اطفالك, وازاي تتوقفي عن الصراخ.

طرق للسيطرة على الغضب على اطفالك
طرق للسيطرة على الغضب على اطفالك

طرق للسيطرة على الغضب على اطفالك:

1- اتعلمي التواصل بشكل فعال:

الاطفال الصغيرين مش زي الاشخاص البالغين, ونادرا لما بيستجيبوا للصراخ والغضب, ممكن يجذب انتباههم للحظة بس, ويرجعوا يدخلوا في عالم مختلف مرة تانية بعد لحظات بس, وده بيخلي اي محاولة لجذب انتباههم عن طريق الصراخ عليهم ياما غير فعال تماما او ضار.

وبيكون محبط جدا انك تحسي انهم مش بيسمعولك, خصوصا لو بتتكلمي عن نفس الموضوع اكتر من مرة, ومستمرة في انك تقولي الحاجة مرة واتنين من غير اي تأثير, يبقى انتي كده بتتكلمي مع اطفالك بطريقة هما مش قادرين يفهموها, هنقولك شوية نصايح اللي هتساعدك في السيطرة على الغضب:

A) استخدمي لغة صارمة:

خلي نبرة صوتك وكلامك معاه بطريقة صارمة, لانك مش هتلاقي استجابة منه وانتي بتكلميه بطريقة عادية مافيهاش صرامة او جديه كفاية.

B) حافظي على اتصال العين:

في الغالب الطفل هياخد كلامك بشكل جد لو حافظتي على اتصال العين معاه وانتي بتكلميه, وانتي كمان هتكوني قادرة تتأكدي هل كلامك وصله وفهمه ولا لا, ممكن وانتي بتتكلمي معاه تنزلي على ركبك عشان تبقي على مستوى عينه.

C) اتكلمي بشكل موجز ومختصر:

حاولي توصلي له اللي انتي بتقوليه في نقط بسيطة ومختصرة, عشان ميتوهش منك ويضيع وميبقاش عارف انتي عايزة منه ايه بالظبط, ركزي على نقطة معينة, واتأكدي انه فهمها, ووقفي عند الحد ده.

D) خليكي ثابتة:

خليكي ثابتة في طريقة تعاملك معاه والمباديء والقوانين اللي حطهاله عشان يمشي عليها, لان التغيير كل يوم ده هيربك الطفل وهتخليه يبقى مش عارف يعمل ايه وهيمنعه انه يمشي على تعليماتك او يسمع كلامك.

E) متستسلميش:

لو طلبتي من طفلك انه يقوم بمهمة معينة, ولسه معملهاش, متستسلميش وتسيبيه وتعمليها انتي بنفسك, لانك لو عملتي كده هتعلمي طفلك انه يتجاهلك لفترة كافية, وهيهرب من اي مهمة تديهاله, عشان كده بغض النظر عن المدة اللي هياخدها لحد ما يخلص المهمة, خليه يخلصها للاخر بنفسه من غير اي تدخل منك.

F) اسمعيه:

في بعض الاحيان الاطفال بيعترضوا على حاجة لسبب ما جواهم, عشان كده بنقولك اسمعي اللي جواه وتفسيراته ومبرراته, واتأكدي انهم يعرفوا انك “مش هتسمعيهم” الا لو اتكلموا بأدب وبشكل صح, وبمجرد ما تسمعيهم, هتبدأي تاخدي قرار صح اكتر عن ايه اللي المفروض تعمليه.

طرق للسيطرة على الغضب على اطفالك

2- الاستعداد المسبق:

A) نبهيه بشكل مسبق:

خلي الطفل مستعد وعارف ايه اللي متوقع منه انه يعمله قبل ما يحتاج يعمله, ده هيخليه مستعد انه يعمل اللي انتي طلبتيه منه ويحطه في الاعتبار.

على سبيل المثال, لو انتي عايزة الطفل يشيل الاطباق اللي اكل فيها بعد ما يخلص, يبقى في الحالة دي قوليله قبل الاكل بعد ما تخلص شيل اطباقك وحطها في الحوض, هنا انتي خلتيه عارف ومستعد للمهمة دي من قبلها.

B) السلوكيات:

الخطوة دي بتدور حوالين تشكيل السلوك اللي انتي عايزاه من الطفل, وانتي بتقع على مسؤوليتك ان ده يحصل, لان بعد كل حاجة الاطفال بيتعلموا من القدوة اللي قدامهم, عشان كده لو انتي مثلا بتحاولي تعلمي اطفالك انهم يحطوا اطباقهم في الحوض بعد ما يخلصوا اكل, فتأكدي انك بتعملي نفس الحاجة قدامهم عشان يتعلموا منك ويقلدوكي.

C) النتيجة:

النتيجة هي المرحلة اللي بتظهر فيها التعزيز الايجابي او مكافئة طفلك للمشاركة في السلوكيات الصحيحة او انه عمل حاجة كويسة, يعني بمجرد ما الطفل يحط الاطباق في الحوض من نفسه, امدحي سلوكه وبوسيه واحضنيه او اي نوع من المكافئة الجسدية اللي تخليه يحس انك مقدرة اللي هو عمله.

ولازم تتأكدي ان مدحك ليه كبير جدا عشان يلاحظه طفلك ويربطه بحاجة حلوة هو عملها, ومتخافيش من المبالغة في المدح لان ده هيعود على طفلك بشكل ايجابي جدا.

وفي طريقة تانية للاستعداد المسبق وهي من خلال انك تعرفي مستويات الغضب عندك, لو حسيتي انك بدأتي بالغضب والانزعاج, حضري نفسك واطفالك, وقوليلهم ايه المشكلة زي مثلا:

– انك مريتي بيوم سيء في الشغل.

– انك محتاجة فعلا للتركيز.

– انك حاسه بتعب شديد.

– انك قلقانة على سلامتهم.

– انك متضايقة من خناقاتهم مع بعض وصوتهم العالي.

ولما تقولي اي جملة من الجمل دي قوليها بطريقة ايجابية واتواصلي معاهم, واطلبي منهم بنبرة صوت هادية كخطوة منك انك تسيطري على غضبك, ولو محتاجة تكرري كلامك تاني, نبهيههم مرة تانية وفكريهم بحالتك واطلبي منهم بطريقة اكتر حزم عشان يسمعوكي.

طرق للسيطرة على الغضب على اطفالك

3- اتعلمي تسيطري على غضبك بدقة:

الغضب ممكن يبان انه معقد, ولكن هو في الحقيقة عاطفة بسيطة جدا, لو اتعلمتي تفهمي غضبك وتفسريه صح, هتقدري انك تسيطري عليه وتتحكمي فيه بطريقة اكتر ايجابية واكتر تفاعلية, وهنقولك شوية نصايح ازاي تقدري تعملي كده:

A) حددي جذور المشكلة:

الغضب هو عاطفة ثانوية او سلوك دفاعي, بمعنى انه مش موجود كده من نفسه, ولكن بيحصل لم تتحطي في موقف معين, او كدعم للمشاعر السلبية اللي انتي بتبقى حاسه بيها في موقف ما, عشان كده بننصحك المرة الجاية اللي تحسي فيها انك متعصبة خدي نفس عميق وفكري في الموضوع كويس.

حاولي انك تدوني اي مشاعر او اي حاجة انتي حاسه بيها ممكن تكون هي سبب في غضبك, ممكن تكوني حاسه:

– بالحزن.

– الخوف.

– الذعر.

– الضغط.

– الاحراج.

– الارتباك.

– العجز.

كل المشاعر دي في النهاية ممكن تأدي انك تبقي غضبانة ومتعصبة, فلو عرفتي السبب اكيد هتقدري تسيطري على غضبك.

B) فكري ايه اللي ممكن يسببه الصراخ:

كل اب وام بيكون ليه حاجات مختلفة ممكن تعصبه او تثير غضبه, فلو انتي عارفة شخصيتك, فهتقدري تتوقعي بشكل مسبق ايه اللي ممكن يثير غضبك وتستعدي له, وده بدوره هيمنعك انك تنفجري في الغضب لما الموقف يحصل.

بعض الامثلة على الحاجات اللي ممكن تثير الغضب من تجارب الامهات والابهات:

جمل معينة قالها الاطفال, زي…

– “انا مش عايز!”.

– “مش هتقدر تخليني اعمل ده!”.

– “ليه مقدرش اعمل ده؟”.

– “هل وصلنا؟”.

– او سلوك سلبي معين زي, رمي اللعب في الارض في اي حته, الخناق مع الاخوات, يرد عليكي بطريقة مافيهاش احترام, والى اخره من السلوكيات السلبية اللي ممكن تثير غضبك.

– وفي عوامل خارجية تانية ممكن تزود غضبك مع سلوك الاطفال السيء, زي مثلا انك محتاجة تحضري العشا في المطبخ ولكن اطفالك مسببين ازعاج, او انتي عايزة تركزي في شغل او حاجة معينة وهما مش عايزين يتوقفوا عن اللعب بصوت عالي, الى اخره.

C) اعرفي تغيراتك الجسدية ساعة الغضب:

كتير من الناس ممكن يعانوا من تغيرات جسدية ساعة الغضب, لو لاحظتي التغيرات دي وقدرتي تعرفيها, هتبقي قادرة بشكل افضل على اكتشاف امتى هتكوني محتاجة انك تسيطري على غضبك, بمجرد ما جسمك يقولك انك وصلتي لمستويات عالية من الغضب.

من علامات الغضب الشائعة:

– احمرار الوجه.

– نبضات قلب سريعة, ارتفاع في معدل ضربات القلب.

– قبضة الايد المحكمة.

– العضلات المشدودة.

– التنفس بصعوبة.

D) فهم سبب الغضب:

الغضب مش بيظهر من لا شيء او من غير سبب, لكن انتي غضبانة او متعصبة بسبب حاجات معينة, ومن خلال فهم سبب غضبك, هتقدري تفهمي الخطوات اللي انتي محتاجاها عشان تمنعي اي حاجة تمشي بشكل غلط وتوصلك في النهاية انك تتعصبي.

4- خدي استراحة:

لو حاسه انك متعصبة اوي, خدي فترة راحة, لما تحسي ان غضبك بيوصل لمستويات مش هتقدري تسيطري عليها, اخرجي من المكان, قولي لطفلك انك متعصبة جدا ومش هتقدري تستمري في المناقشة ومحتاجة انك تبعدي وتاخدي مهلة.

لما تبعدي, اتنفسي بعمق, اقعدي, غمضي عينيك, وركزي على تنفسك, روحي اغسلي وشك بالمية, ولو هيساعدك ممكن انك تقري اي حاجة تريحك وتديكي شعور ايجابي, وحافظي في الوقت ده على التفكير الايجابي.

بعض الجمل اللي ممكن تكرريها بينك وبين نفسك عشان تحسي بايجابية اكتر:

– انا هظهرلهم الحب بس.

– طفلي محتاج تفهم وصبر.

– الوضع مش كارثي زي ما انا شايفاه.

– طفلي بيعمل كده لانه بيعاني من مشكلة معينة “وقولي المشكلة”.

– هكون صبورة النهاردة.

5- التمرين, التمرين, التمرين:

اكيد مافيش حد مثالي, ولو انتي متعودة انك دايما بتصرخي وتزعقي مع ولادك, هيكون صعب انك تتخلصي من السلوك ده, وهنا هيجي دور التمرين او الممارسة المستمرة والتفكير الايجابي كتير.

الامهات والابهات لازم يتعلموا يكونوا اكتر هدوء في التعامل مع اي موقف, او الوصول لمنافذ صحية تخرجي فيها الغضب, بعض الممارسات اللي هتخليكي تفكري بهدوء اكتر:

– ممارسة التأمل.

– دوني اللي جواكي وعبري عن افكارك بالكتابة.

– مارسي اليوجا.

بعض المنافذ الصحية اللي ممكن تخرجي فيها الغضب:

– ممارسة الرياضة.

– اكتبي عن الحاجة اللي مضيقاكي وخرجي مشاعرك.

– اعملي حاجة فنية تعبر عن غضبك.

– اصرخي مع نفسك او اضربي مخدة بايدك بقوة.

لو اخترتي انك تستخدمي منافذ الغضب الصحية دي, اتأكدي انك تعملي ده لوحدك في مكان بعيد عن الاطفال.

في النهاية بنقولك لو انتي كنتي متعودة دايما تزعقي وتصرخي مع ولادك, دلوقتي جيه الوقت انك تتوقفي عن ده وتتعلمي طرق بديلة عشان تتواصلي معاه, لان الصراخ هيعود على الطفل بكتير من الضرر العاطفي والعقلي في المستقبل, خصوصا لو الصراخ ده معاه الفاظ مؤذية للاطفال وبطريقة فيها قلة احترام ليه او ضرب بدني وعقاب شديد.

والدراسات بتأكد ان التعزيز الايجابي هو نظام افضل بكتير للاطفال من التعزيز السلبي, عشان كده السيطرة على الغضب هيكون اكتر فايدة ليكي ولاطفالك, وهيساعدهم على التصرف بشكل افضل, وهيديهم مساحة اكبر للتنفس.

عشان كده لو انتي صعب تحافظي على هدوئك لو اطفالك اشقيا, بننصحك تاخدي نفس عميق وتستمري في التفكير الايجابي, واستخدمي الاساليب الخمسة للسيطرة على الغضب اللي احنا قولناها عشان تتوقفي عن الصراخ على اطفالك, وتبني رابطة ابوية قوية, صحية, اكتر سعادة, واكتر فاعلية مع اطفالك.

12 جملة ممكن تسبب اذى لطفلك, و 12 حاجة المفروض تقوليها بدالهم

جمل مؤذية لطفلك