دليل اختيار نوع القماش المناسب للانواع المختلفة من الفساتين

ريهام محمود
ريهام محمود
7594

تفصيل الفساتين بيكون اختيار بنات كتير, عشان يعملوا الموديل اللي هما عايزينه بالمقاس المناسب, ولكن المشكلة اللي ممكن تقابلك انك مش عارفة تختاري القماش ازاي او ايه المناسب لستايل الفستان اللي انتي عايزاة, عشان كده احنا النهاردة من خلال السطور الجايه هنقولك دليل اختيار نوع القماش المناسب لانواع الفساتين المختلفة.

دليل اختيار نوع القماش:

التفصيل اكيد ليه مميزات كتير اولها ان الفستان هيكون مقاسه مناسب ليكي بالظبط, بالاضافة انك انتي اللي مختارة الموديل بنفسك واللون وكل حاجة وبالتالي هتكوني مرتاحة وانتي لابساه وحاسه بثقة في نفسك.

ولكن بغض النظر عن سبب اختيارك للتفصيل, فانتي اكيد محتاجة تهتمي بتفاصيل كتير عشان تنفذيه ويطلع زي ما انتي عايزاه, وتعرفي ازاي تختاري نوع القماش المناسب, والاختيار هنا بيعتمد على موديل الفستان والغرض منه.

دليل اختيار نوع القماش 1
دليل اختيار نوع القماش 1

الغرض من الفستان:

ده يعتبر العامل الاساسي والاكتر اهمية اللي بيأثر على اختيارك النهائي, لان لو اختارتي حاجة غلط هيطلع في النهاية فستان مش مريح ومش هتبقي حابه تلبسيه, وهنا انتي محتاجة تعرفي شوية حاجات عشان تختاري صح:

لو هتعملي فستان صيفي فانتي هنا محتاجة نوع قماش ميكونش تقيل, وهيكون انسب اختيار ليكي هو القطن الخفيف, الحرير, الساتان, لان الانسجة الطبيعية بتسمح للجلد بالتنفس وهتكون مناسبة لموسم الصيف.

في باقي مواسم السنة تقدري تفكري في انواع قماش تكون اتقل شوية مناسبة لكل موسم, زي الجيرسيه, الفسكوز, الحرير السميك, وغيرها من الاقمشة اللي بتكون بطبقتين.

لو هتعملي حاجة للشغل, يبقى هنا اختاري الاقمشة الانيقة واللي متكونش فيها تفاصيل, هيكون مناسب جدا الصوف او الحرير, او الاقمشة اللي معمولة من مواد مختلطة هتكون اختيار ممتاز جدا, الكتان والقطن الخفيف هيكون مثالي جدا للشغل لموسم الصيف.

فساتين الكوكتيل او المناسبات النهارية, المفروض تكون معمولة من اقمشة بالوان مشرقة ونوع قماش زي اللوريكس والليكرا.

والخطوة المهمة التانية بعد اختيار نوع القماش هو اختيار موديل الفستان.

دليل اختيار نوع القماش 2
دليل اختيار نوع القماش 2

موديل او قصة الفستان:

لو هتعملي فستان بموديل بسيط وناعم, هنا ممكن تعتمدي على الدانتيل, الجيبير, القطيفة, او الجبردين مع زخرفة صغيرة او طباعة, لو انتي لسه محتارة في اختيار نوع القماش المناسب للموديل اللي هتعمليه, يبقى افضل حاجة تختاري نوع قماش ناعم ممكن يتشكل معاكي بسهولة.

لو الموديل اللي انتي مختاراه فيه طبقات او تفاصيل كتير, هنا بننصحك تعتمدي على القماش التافتا الخفيف, او الكريب الصيني, او الشيفون, وبالنسبة للفساتين الضيقة اللي بتبقى واخدة شكل الجسم بتحتاج انواع الاقمشة اللي بيكون داخل فيها الايلاستين, وعادة الفساتين الضيقة مناسب ليها القماش المحبوك, الكتان السميك, او القطن.

دليل اختيار نوع القماش 3
دليل اختيار نوع القماش 3

اللون والتفاصيل:

لما تيجي تختاري اللون وتفاصيل الفستان في شوية حاجات لازم تحطيها في الاعتبار:

– فساتين الشغل عادة بتكون محتاجة تكون بلون واحد, ويفضل الاعتماد على الالوان المحايدة.

– الفساتين اليومية هيكون مناسب ليها جدا الاقمشة المطبوعة بطبعات مختلفة.

– الجيوب وغيرها من التفاصيل بتكون محتاجة قماش بلون واحد.

– الفساتين الصيفي مناسب ليها جدا خامات الاقمشة المختلفة مع الوان زاهية.

– فساتين الكوكتيل او فساتين المناسبات, هيكون مناسب ليها الاقمشة اللي بتلمع.

دليل اختيار نوع القماش 4

ايه الاقمشة المناسبة لفساتين السهرة:

فساتين السهرة اكيد ليها اقمشة خاصة مناسبة ليها غير اقمشة الفساتين العادية, ومن انسب الخامات المناسبة :

– الحرير ناعم وانيق مناسب جدا لفساتين السهرة للوك انثوي.

– الدانتيل مناسب جدا لاظهار الجسم بشكل حلو.

– القماش المطرز بتطريزات فضي او دهبي هيكون مناسب جدا لفساتين السهرة.

– الساتان من انواع الاقمشة اللي مش بتبطل ابدا, وبيكون حلو جدا لو دخلتيه مع خامات تانية.

– القماش القطيفة من انواع الخامات المناسبة جدا لفساتين السهرة,  للوك اليجانت وارستقراطي جدا.

دلوقتي انتي عارفة كل حاجة عن اختيار القماش المناسب لفستانك, المرة الجاية لما تيجي تفصلي فستان استرجعي الدليل ده عشان تعملي الفستان بشكل صح.

دليل اختيار نوع القماش 5

5 حيل لتغيير اللوك سهلة وبسيطة هيخلوا شكلك يبان أحلى.. اعرفيهم واستفيدي منهم

5 حيل لتغيير اللوك سهلة وبسيطة هيخلوا شكلك يبان أحلى
5 حيل لتغيير اللوك سهلة وبسيطة هيخلوا شكلك يبان أحلى

مقالات متعلقه

8 نصايح موضة تعمليهم في الصيف

8 نصايح موضة تعمليهم في الصيف

10 طرق تلبسي بيهم ملابس عصرية وعلى الموضة من غير ما تصرفي فلوس كتير

10 طرق تلبسي بيهم ملابس عصرية وعلى الموضة من غير ما تصرفي فلوس كتير

حاجات مهمة لازم تحطيها في اعتبارك لما تيجي تختاري القبعة الشتوية

حاجات مهمة لازم تحطيها في اعتبارك لما تيجي تختاري القبعة الشتوية