ازاي العطاء الزيادة من نفسك هيخلي العلاقة مؤذية ليكي..وازاي تتعاملي مع ده

ريهام محمود
ريهام محمود
1358

العلاقة المؤذية او السامة ممكن تخليكي تحسي بعد رضا, وتقلل من شعورك بقيمة نفسك, لدرجة انها ممكن توصلك لمرحلة انك تسألي نفسك هل انتي تستحقي الحب فعلا, والمرعب في الموضوع ان ده ممكن يحصل من غير ما تحسي, عشان كده احنا النهاردة هنقولك ازاي تكتشفي انك في علاقة مؤذية او غير صحية, وازاي كمان تتجنبي انك تكوني في علاقة فيها عطاء من طرف واحد بس.

ازاي تكتشفي انك في علاقة مؤذية:

العطاء والاخد:

حتى في العلاقة المثالية, يكاد يكون من المستحيل ان تلاقي الطرفين بياخداو ويدوا بشكل متساوي, وده يعتبر تقريبا طبيعي, لانه طبيعي انك هتبقي عايزة انتي الكتف اللي يجي يسند عليه وقت ضيقته, وانك تبقي انتي الداعم ليه كل وقت عاطفيا او حى ماليا وقت ما يحتاج في الاوقات الصعبة, ومن الطبيعي جدا انك تبقي عايزة تركزي كل اهتمامك ووقتك ومجهودك على الشخص اللي بتحبيه, وتكوني جنبه وبتساعديه وقت ما يحتاجك.

ولكن مع ذلك, ممكن العلاقة تتحول لغير صحية لو بقى طرف واحد بس هو اللي بيدي على طول, والطرف التاني بياخد بس ومش بيقدم اي حاجة في المقابل, لو انتي اصلا من نوع الاشخاص اللي بينكروا ذاتهم اوي وبتدي من كل قلبك حب واهتمام, فاكيد هتحبي انك تكوني دايما موجودة لشريكك, وهيكون الموضوع مش واضح قدامك انه مش بيحاول يديكي اي حاجة في المقابل.

في البداية مساعدتك ودعمك ليه هيتقدر, ولكن مع الوقت الموضوع هيتحول وهيبدأ شريكك ياخد كل حاجة منك ويعتبرها حق مكتسب, وهيبدأ حتى كمان انه يستغلك ويستفاد منك على قد ما يقدر, وهتلاقيه بيلجألك عشان تحلي له مشاكله اللي هم عملها بنفسه او السبب فيها وهيعتمد عليكي اعتماد كلي في كل حاجة.

ازاي تكتشفي انك في علاقة مؤذية 1
ازاي تكتشفي انك في علاقة مؤذية 1

علامات تقولك انك بتدي بس:

– هتحسي دايما انك مسئولة عن شريكك وانك عايزة تساعديه بشكل مستمر, ومش هتبصي للموضوع باي شكل تاني غير كده, وهتشوفي ان هو ده اللي المفروض تعمليه.

– هتفكري ان هو ميقدرش يعمل حاجة من غيرك, وده هيخليكي تحسي بمسئولية اكبر ناحيته من اللي انتي اصلا حاسة بيها من الاول, لانك مقتنعة تماما ان شريكك ده هيضيع من غيرك, وانتي مش هتسمحي ان ده يحصل.

– احتياجات شريكك هتيجي قبل احتياجاتك, هتلاقي نفسك بتقضي اغلب وقتك في حل المشاكل الخاصة بيه هو وهتنسي نفسك, وهتخلي مشاكلك ومسؤولياتك الخاصة بيكي على جنب, يعني هتبديه على نفسك في كل حاجة.

– دايما هتلاقي نفسك كل اللي هيدور في دماغك انك لو بطلتي تقدمي المساعدة او الدعم لشريكك, هيبطل يحبك او مش هيبقى عايز يستمر معاكي في العلاقة.

ازاي تكتشفي انك في علاقة مؤذية 2
ازاي تكتشفي انك في علاقة مؤذية 2

ازاي العطاء المستمر ممكن يأذيكي:

كل الحاجات اللي انتي بتعمليها وعطاءك واهتمامك الزيادة بالشخص اللي انتي بتحبيه ممكن انها تستنفزك عاطفيا لو في المقابل ماخدتيش نفس الوقت والمجهود والطاقة والاهتمام, ولانه كمان القلق المستمر على احتياجات شخص تاني وتحمل مسئوليتة بشكل مستمر موضوع مرهق جدا.

ولو الاهتمام المستمر بغيرك هيمنعك من الاهتمام بنفسك واحتياجاتك ومن انك تدي وقت كافي لنفسك, فده ممكن يضر فعلا بتقديرك لنفسك والطريقة اللي بتشوفي بيها نفسك وبصحتك العقلية بشكل عام.

في مرحلة معينة ممكن يكون من الصعب انك تشوفي نفسك حاجة منفصلة عن شريكك, اكيد هتشوفي ان ده صعب, ويمكن حتى مستحيل, انك تتخيلي انك منفصلة عنه, ولكن ده في النهاية هيأذيكي انتي نفسيا وعاطفيا.

ازاي تكتشفي انك في علاقة مؤذية 4
ازاي تكتشفي انك في علاقة مؤذية 4

المفروض تعملي ايه عشان تحلي المشكلة دي:

زي ما قولنا في البداية انتي ممكن متحسيش انك في علاقة انتي اللي بتدي فيها وشريكك بياخد بس, وبتبقي مش فاهمة انتي ليه دايما مضغوطة ومرهقة, ومنين جايه كل المشاعر السلبية اللي انتي حاسه بيها, ومش هتبقي قادرة تفهمي ايه الغلط بالظبط في العلاقة.

عشان كده اهم حاجة المفروض تعمليها لو عايزة تتعاملي مع المشكلة دي, هو انك تعترفي انك انتي فعلا بس اللي بتدي في العلاقة ومتنكريش ده,  وتسألي نفسك ليه المفروض انتي اللي دايما تدي باستمرار من غير مقابل ومش من حقك حتى تعترضي او تاخدي موقف.

لو انتي لسه داخلة في علاقة جديدة, لازم من بدايتها تحطي الحدود اللي عايزة تمشي عليها, ومتبدأيش انك تدي بشكل مبالغ فيه, قبل ما تعرفي شريكك كويس وتتأكدي انه داعم ليكي تماما وهيديكي زي ما انتي بتديه بالظبط.

ازاي تكتشفي انك في علاقة مؤذية 3

مقالات متعلقه

علامات مشتركة للعلاقة المعقدة ، و 6 طرق تصلحيها بيها

علامات مشتركة للعلاقة المعقدة ، و 6 طرق تصلحيها بيها

14 تأثير سلبي للاعتماد على الرسايل النصية في العلاقة

14 تأثير سلبي للاعتماد على الرسايل النصية في العلاقة

ازاي توقفي الاساءة اللفظية من شريكك

ازاي توقفي الاساءة اللفظية من شريكك