بالخطوات والفيديو: طريقة عمل كرات البطاطس المحشية باللحمة المفرومة مع الجبنة

بقلمريهام محمود فيأكلات سريعة visibility1257

كرات البطاطس باللحمة المفرومة من الاطباق السهلة والسريعة واللذيذة جدا, تقدري تعمليها كوجبة عشا سريعة, او طبق جانبي على الغدا, تعالوا نشوف مع بعض الطريقة بالخطوات والفيديو.

كرات البطاطس باللحمة المفرومة:

المكونات:

– 500 جرام بطاطس مسلوقة.

– 500 جرام لحمة مفرومة.

– 9 شرايح جبنة شيدر او موتزاريلا.

– كوباية كبيرة شوربة خضار او لحمة.

– 30 جرام دقيق.

– ملح وفلفل.

– 2 ثمرة جزر.

– 1 ثمرة بصل.

– بيضة.

كرات البطاطس باللحمة المفرومة
كرات البطاطس باللحمة المفرومة

طريقة التحضير:

1- اول حاجة هنحضر اللحمة المفرومة, قطعي الجزر والبصل مكعبات صغيرة جدا, حطيهم في طاسة على النار, وضيفي لهم اللحمة المفرومة, وتبليهم بالملح والفلفل.

2- ضيفي الشوربة للحمة, وقلبيهم مع بعض, وسيبي اللحمة لحد ما تستوي وتشرب الشوربة.

كرات البطاطس باللحمة المفرومة

3- هاتي البطاطس المسلوقة اهرسيها كويس, وضيفي لها البيضة وقلبيهم مع بعض.

4- هاتي اي فنجان كبير عندك, حطي فيه كيس بلاستيك من اللي بنلف بيه الاكل, خدي من البطاطس معلقة كبيرة, حطيها في الفنجان, وافرديها بالمعلقة بحيث تاخد شكل الفنجان, وحطي جواها معلقة من اللحمة المفرومة واقفليها.

كرات البطاطس باللحمة المفرومة

5- بعد ما تخلصي كمية البطاطس كلها, غطي كل كورة بالدقيق, وحمريها في زيت غزير, لحد ما يبقى لونها دهبي فاتح.

6- بعد ما تحمري كرات البطاطس كلها, هاتي صينية طويلة ورصي فيها البطاطس جنب بعض, وفوق كل كورة حطي شريحة جبنة.

7- دخلي الصينية في الفرن على درجة حرارة 180 درجة مئوية, لمدة 15 دقيقة, لحد ما الجبنة تسيح على الوش.

8- طلعيها من الفرن وقدميها, وبالهنا والشفا.

الطريقة بالفيديو:

بالخطوات والفيديو: طريقة عمل بيتزا لازانيا بالثوم

طريقة عمل بيتزا لازانيا