طريقتين لعمل البرونزر بمكونات طبيعية..واعرفي ازاي تحطيه بطريقة صح
كلنا اكيد عارفين الكونتور واحنا اتكلمنا عليه قبل كده بالتفصيل, ومن الحاجات اللي بنستخدمها لعمل كونتور للوش هي البرونزر, اللي مش بيساعد بس على تحديد الملامح لا كمان بيظهر الوش انحف, وده هيخلي ملامحك تبان احلى خصوصا في الصور وهيبرزها اكتر, والنهاردة من خلال موضوعات هنقولك طريقة عمل البرونزر في البيت بمكونات طبيعية بسيطة ومش مكلفة.
طريقة عمل البرونزر:
1- برونزر بودر:
البرونزر ده غير انه معمول من مكونات طبيعية وخالي من اي مواد كيميائية مضرة, كمان مكوناته مفيدة للبشرة, يعني طول ما انتي حطاه بشرتك هتستفاد منه.
المكونات:
– 1 معلقة كبيرة قرفة بودر.
– 1 معلقة صغيرة كاكاو.
– 2 معلقة صغير نشا.
– 1 معلقة صغيرة جوزة الطيب مطحونة.
– 10 – 15 نقطة من اي نوع زيت عطري مفضل ليكي.
لو عايزة البرونزر يبقى جاف استغني عن الزيت.
طريقة التحضير:
هاتي اي علبة فاضية عندك اغسليها كويس ونشفيها, واخلطي فيها كل المكونات مع بعض وقلبيهم لحد ما يمتزجوا كويس, ويبقى الخليط ناعم وسلس, المكونات هتحتاجي تظبطيها حسب لون بشرتك, لو انتي بشرتك فاتحة ممكن تقللي من الكاكاو وتزودي النشا, لو بشرتك سمرا زودي من الكاكاو حسب درجة بشرتك لحد ما توصلي للدرجة المناسبة ليكي.
فوايد المكونات للبشرة:
1- الكاكاو هيدي عمق ولون للبشرة, والقرفة تعتبر عنصر رائع للبشرة بتديها توهج صحي جدا.
2- جوزة الطيب هتدي تأثير التان للبرونزر, والنشا هيوازن كل المكونات مع بعض ويفتحها شوية.
3- الزيوت الاساسية دورها بس ربط المكونات مع بعض, وعشان تدي ريحة حلوة للبرونزر.
2- برونزر كريمي:
لو انتي بشرتك جافة اوي ومش عايزة يحصلها جفاف اكتر من خلال البرونزر البودر, فالبرونزر الكريمي يعتبر هو الاختيار المثالي ليكي.
المكونات:
– 250 جرام من جل الصبار او الكريم المرطب المفضل ليكي.
– 2 معلقة صغيرة كاكاو.
– 2 معلقة صغيرة قرفة.
– وتقدري تضيفي كام نقطة من اي نوع زيت عطري مفضل عندك.
طريقة التحضير:
اخلطي كل المكونات, قلبيهم مع بعض وامزجيهم كويس جدا لحد ما الخليط يبقى ناعم مافيش فيه اي كتل, انقلي الخليط لاي علبة فاضية للحفظ, وكده يبقى البرونزر بتاعك جاهز للاستخدام.
كمان تقدري تتحكمي في اللون بزيادة او تقليل كمية الكاكاو لحد ما توصلي للدرجة المناسبة لبشرتك.
ازاي تحطي البرونزر بطريقة صح:
1- اول حاجة عشان البرونزر يطلع مظبوط, استخدمي معاه فرشة كبيرة وناعمة, وحاولي تتجنبي الفرش كثيفة اوي لانها مش هتطلعه مظبوط.
2- اغمسي الفرشة في البرونزر البودر, ومرريها على الجبين, فوق عضمة الخد, اسفل الفك, وانتي بتحطي حاولي تتجنبي طريقة تمرير الفرشة رايح جاي كذا مرة, الافضل جربي مرريها من 2 – 3 مرات في اتجاه واحد عشان تتجنبي المظهر ال Cakey.
3- حطي البرونزر كمان على جسر الانف, خط الشعر.
4- بالنسبة للبرونزر الكريمي, كل اللي محتاجه تعمليه خدي منه كمية قليلة على ايدك, وحطيه على المناطق اللي احنا قولناها فوق.
ياللا جربوا الوصفات دي وشاركونا تجاربكم.