5 نصايح للعناية بالاحذية وحمايتها من الحرارة والرطوبة
في ظل ظروف الجو المختلفة طول السنة سواء حرارة او رطوبة او مطر, ممكن يبقى من الصعب انك تحافظي على الشوز بتاعك زي ما هو فترة طويلة, عشان كده احنا النهاردة هنساعدك في المهمة دي وهنقولك 5 نصايح للعناية بالاحذية عشان تحافظي عليها.
نصايح للعناية بالاحذية:
1- خلي الشوز مضاد للمية:
استخدمي سبراي مضاد للمية عشان تحافظي عليها من المطر, ممكن تستخدمي السبراي ده على الاحذية اللي بتلبسيها كتير او بشكل يومي عشان تحميها.
اول حاجة هاتي قطعة سفنج ناعمة وجافة, او قماش شمواه عشان تمسحي اي بقع على الشوز, وبعدها رشي الشوز كله بطبقة من السبراي المضاد للمية, بس قبل ما ترشية كله اعملي تجربة على جزء صغير الاول عشان تتأكدي انه مناسب لجلد الشوز بتاعك.
والسبراي ده هتلاقوه متوفر على مواقع التسوق اون لاين, او في محلات الاحذية.
ممكن كمان تخلوا دايما شوز احتياطي في المكتب او في العربية للطواريء بحيث انه لو حصل اي حاجة للشوز بتاعك تلاقي بديل متاح قدامك.
2- الحفاظ على شكل الشوز:
لما تيجي تخزني الشوز, لازم تكون محشية حاجة عشان تمنعي انها تفقد شكلها, ممكن تحشيها بالورق اللي بتكون جايه بيه وهي لسه جديدة, او تحطي فيها ورق عادي بس بلاش ورق الجرايد عشان الحبر بتاعها ممكن يطبع ويسيب لون على الشوز, او تجيبي القالب بتاع الاحذية وطول ما انتي مش لبساها تبقي حطاها في القالب.
3- اتخلصي من الروايح الكريهة:
لسوء الحظ ان الرطوبة بتسبب روايح كريهة في الشوز, وعشان تقللي من المشكلة دي حطي الشوز في الهوا عشان تتخلصي من الريحة قبل ما تخزنيه, او تجيبي قطعة شاش وتحطي فيها فحم وتحطيها جوه الشوز الفحم هيساعد على امتصاص الروايح الكريهة والرطوبة.
شوفي من هنا حيل تحافظي بيهم على الشوز من الروايح الكريهة
4- صلحي الخدوش الصغيرة:
اكيد مافيش مفر ان الشوز ممكن يتعرض لبعض الخدوش الصغيرة او التقشير اللي مش هنعرف نتجنبها مع الاستخدام المستمر, لكن اكيد نقدر نقللها ونصلحها, ممكن تجيبي قلم الوان شمع بنفس لون الشوز وتلوني مكان التقشير او الخدش على الاحذية الجلد.
ممكن كمان تستخدمي مانيكير بنفس لون الشوز على الخدوش, او اقرب لون للشوز, او تعمليها بطبقة من المانيكير الشفاف.
5- اتجنبي اشعة الشمس المباشرة:
لو سيبتي الشوز في البيت في مكان فيه شمس ده ممكن يتسبب في تغيير لونه, والحرارة الزيادة كمان ممكن تبوظ الجلد بتاع الشوز, وعشان تمنعي ده احفظيه في مكان بارد وجاف ويكون ضل عشان تحافظي على الجلد واللون, دايما خزني الاحذية في جزامة مقفولة تمنع اشعة الشمس وتكون في نفس الوقت فيها فتحات للتهوية المناسبة.