شمع الشوكولاتة لازالة الشعر: اعرفي فوايدة للبشرة وازاي تعمليه بنفسك في البيت
كل فترة بتظهر وسائل او طرق جديدة لازالة الشعر, ومن الطرق اللي ظهرت جديد هي شمع الشوكولاتة لازالة الشعر, هو نوع شمع برازيلي وبيعمل نفس وظيفة الشمع العادي في ازالة الشعر ولكن ليه فوايد اكتر للبشرة, والنهاردة من خلال موضوعنا هنعرف بالتفصيل كل فوايد شمع الشوكولاتة للبشرة, وهنقولك ازاي تعمليه بنفسك في البيت بمكونات طبيعية.
فوايد شمع الشوكولاتة للبشرة:
1- كلنا عارفين ان الشوكولاتة من الاطعمة اللي بتعالج الاكتئاب وبتحسن المود, عشان كده اول فايدة للشمع ده هو ان ريحتة هتخليكي تسترخي وتحسن مودك وهتخلصك من التوتر.
2- درجة حرارة الشوكولاتة وهي سخنة بتكون مناسبة على البشرة بعكس الشمع العادي, اللي ممكن سخونته الشديدة تسبب حرق او التهاب في الجلد, اللي دايما بيحصل مع ازالة الشعر بالشمع باستمرار.
3- بيساعد على تنعيم البشرة جدا لانه بيحتوي على عناصر مفيدة للبشرة زي زيت اللوز, الجلسرين, الكاكاو, زيت عباد الشمس, زيت الصويا, وغيرها من الفيتامينات والمعادن اللي بتساعد على تنعيم البشرة.
4- بيزيل اصغر الشعر وخصوصا شمع الشوكولاتة البيضا, لانه بيغطي البشرة بشكل كامل وبيطلع معاه اصغر الشعر اللي على البشرة.
5- لانه لطيف وخفيف على البشرة وغني بالعناصر المفيدة للبشرة تقدري تستخدميه على بشرة الوش بأمان.
6- بيساعد على توهج البشرة بعد الازالة, وده بيرجع للمكونات اللي داخلة فيه.
7- بيساعد على تفتيح البشرة وازالة اثار الشمس من على الجلد.
8- مش بيسبب اي طفح جلدي او التهاب للبشرة, وده بسبب الميزة اللي قولناها انه مش بيسخن اوي حتى لو سخنتيه لفترة طويلة بعكس الشمع العادي ودرجة حرارتة بتبقى مناسبة للبشرة.
9- بيساعد على ازالة الشعر اللي تحت الجلد, ولانه بيزيل كل الشعر من الجذور فده بيمنع فرصة ظهور الشعر اللي تحت الجلد.
10- بيبطء من نمو الشعر, وبيأخر ظهوره, بعد الازالة بشمع الشوكولاتة هتلاحظي ان الشعر بدأ يظهر تاني بعد فترة طويلة.
11- بيقلل من عدد مرات ازالة الشعر, بما انه بيبطء من نمو الشعر وبيأخر نموه, ده بدوره اكيد هيقلل من عدد مرات ازالة الشعر.
طريقة عمل شمع الشوكولاتة لازالة الشعر:
طبعا الشمع متوفر في صالونات التجميل او متوفر بيعه اون لاين على مواقع التسوق ولكن سعره بيكون عالي, عشان كده احنا هنقولك دلوقتي ازاي تعمليه في البيت بمكونات طبيعية وهيديكي نفس النتيجة تقريبا.
المكونات:
– كوباية سكر.
– ¼ كوباية مية.
– ¼ كوباية عصير ليمون.
– 1 معلقة كبيرة جلسرين.
– 1 معلقة كبيرة كاكاو “ممكن بدل الكاكاو تستخدمي شوكولاتة خام سايحة, الغامقة مناسبة لاي نوع بشرة او الشوكولاتة البيضا مناسبة بشكل خاص للبشرة الحساسة اوي”.
الطريقة:
في حلة على النار حطي المية والسكر وعصير الليمون والجلسرين, وسيبيهم مع بعض على نار متوسطة لمدة من 6 – 7 دقايق مع الاستمرار في التقليب لحد ما لونه يتحول لدهبي فاتح, بعدها ارفعيه من على النار, وضيفي معلقة الكاكاو وقلبيها دوبيها مع باقي المكونات, وبعدين حطي الخليط على النار تاني لمدة دقيقة كمان, وبعدها ارفعيه من على النار, وكده يبقى الشمع بتاعنا جاهز للاستخدام.
طريقة استخدام شمع الشوكولاتة:
– اول حاجة اعملي اختبار حساسية لو انتي اول مرة تستخدمي النوع ده من الشمع, عشان تتأكدي ان بشرتك مش حساسة منه.
– اغسلي بشرتك كويس واتأكدي انها خالية من اي كريم او مرطب او اي حاجة عليها وجففيها كويس.
– رشي شوية بودرة تلك على المنطقة اللي هتشيلي منها الشعر.
– افردي طبقة رقيقة من شمع الشوكولاتة على المنطقة اللي عايزة تشيلي منها الشعر في اتجاه نمو الشعر, وعلى عكس الشمع العادي كمية صغيرة من شمع الشوكولاتة هتكون كافية.
– استخدمي شرايط الشمع الجاهزة من الصيدلية او قطعة قماش قطن, حطيها فوق الشمع واضغطي عليها بايدك, وبعدين شدي الشريط عكس اتجاه نمو الشعر.
– وممكن تستخدمي نفس الشريط مرة تانية على منطقة مختلفة.
– بمجرد ما تخلصي ازالة الشعر, ممكن تنضفي اي شمع لازق على البشرة باستخدام فوطة او سفنجة مبلولة.
