طرق لعمل سبراي لتثبيت المكياج للوك مكياج مثالي

بقلمريهام محمود فيمكياج visibility355

كلنا بنبقى عايزين نعرف ايه سر الميكب ارتيست لتثبيت المكياج وانه بيطلع شكله حلو ومثالي غير ما احنا بنعمله, اللي ممكن يحققلك ده ويوصلك للوك مكياج مثالي وناعم ويدوم لفترة طويلة هو سبراي تثبيت المكياج, والنهاردة من خلال السطور الجايه هنقولك 7 طرق لعمل سبراي لتثبيت المكياج هيساعد ان المكياج يتفرد بسلاسة على البشرة ويطلع شكله ناعم وطبيعي على الوش وهيثبت المكياج لفترة اطول, والسبراي هيديكي نفس نتيجة اي سبراي بتشتريه من الماركات الغالية بمكونات طبيعية وبأقل تكلفة.

طرق لعمل سبراي لتثبيت المكياج:

1- مثبت مكياج مية الورد:

المكونات:

– 12 من اوراق الورد, وممكن تستخدمي مية ورد جاهزة.

– مية مقطرة.

– 2 – 3 معالق كبيرة جل الصبار.

– ازازة سبراي صغيرة.

الطريقة:

اغسلي اوراق الورد كويس, حطيها في حلة صغيرة مع المية المقطرة وسيبيها تغلي, وبعدين ضيفي جل الالوفيرا, غطي الخليط, وسيبيه يغلي لحد ما لون اوراق الورد تروح, ارفعي المية من على النار وصفيها وسيبيها تبرد, وانقلي الخليط في ازازة سبراي, وكده يبقى جاهز عندك للاستخدام.

مية الورد بتساعد على التحكم في توازن ال PH وبيتحكم في زيوت البشرة, وجل الصبار في المكونات بيساعد على ترطيب البشرة, بالاضافة انه ليه خصائص مضادة للالتهاب هتحمي بشرتك.

سبراي لتثبيت المكياج
سبراي لتثبيت المكياج

2- مثبت مكياج الجلسرين:

المكونات:

– شاي اخضر.

– ½ معلقة كبيرة جلسرين.

– 3 – 5 نقط من اي نوع زيت عطري.

الطريقة:

اعملي الشاي الاخضر بالطريقة العادية, سيبيه يبرد, وبعدين ضيفي له الجلسرين والزيت, وانقلي الخليط في ازازة سبراي, وكده يبقى جاهز للاستخدام.

الشاي الاخضر غني بمضادات الاكسدة والخصائص المضادة للبكتيريا اللي بتحمي الجلد, والجلسرين هيشتغل على البشرة زي التونر وهيقلل من مسام البشرة, والسبراي ده مثالي جدا للبشرة الدهنية.

سبراي لتثبيت المكياج

3- مثبت مكياج زيت اللافندر:

المكونات:

– 2 معلقة كبيرة جل الالوفيرا.

– 2 – 3 نقط من زيت اللافندر.

– 1 ½ كوباية مية.

الطريقة:

هاتي ازازة سبراي بحجم متوسط حطي فيها المية, وضيفي لها جل الالوفيرا وزيت اللافندر, رجي الازازة عشان تخلطي كل المكونات, وكده السبراي يبقى جاهز للاستخدام.

سبراي لتثبيت المكياج

4- مثبت مكياج جل الالوفيرا:

جل الالوفيرا لوحده عنده قدرة انه يثبتلك المكياج من غير ما يتلطخ او يسيح, يعني لو انتي معندكيش اي مكونات في متناول ايدك تعملي بيها مثبت مكياج تقدري تعتمدي على الطريقة دي اللي تعتبر اسهل سبراي ومش مكلف, وفعال وصحي للجلد.

المكونات:

– ½ كوباية مية.

– ½ كوباية من جل الالوفيرا.

الطريقة:

في ازازة السبراي حطي المية مع جل الالوفيرا, ورجي الازازة عشان تخلطيهم كويس مع بعض, وكده السبراي جاهز, رجيه قبل كل استخدام, وخلي الازازة بعيد عن الوش لما تيجي ترشيه فوق المكياج.

سبراي لتثبيت المكياج

5- مثبت مكياج النشا:

اعملي لوك مكياج مات مثالي بالسبراي ده, النشا هيساعد ان المكياج يبقى غير لامع ويدوم فترة اطول, والالوفيرا هيحفظ الرطوبة على البشرة وهيمنع الجلد انه يبقى جاف.

المكونات:

– 1 معلقة صغيرة نشا.

– 2 معلقة صغيرة جل الالوفيرا.

– 3 معالق كبيرة مية مقطرة.

– 4 نقط من زيت اللافندر “اختياري”.

الطريقة:

هاتي ازازة اسبراي حطي فيها النشا, وضيفي لها جل الالوفيرا والمية المقطرة وتكون دافية شوية, وبعدين ضيفي زيت اللافندر, رجي الازازة عشان تخلطي المكونات كويس, وكده السبراي جاهز للاستخدام, خلي السبراي بعيد عن الوش بحوالي 15 سم وانتي بترشي.

6- مثبت مكياج مية جوز الهند:

المكونات:

– مية.

– مية جوز الهند.

– ½ معلقة صغيرة زيت جوز الهند.

– 4 – 5 نقط جلسرين.

– زيت فيتامين E “اختياري”.

الطريقة:

املي نص ازازة السبراي بالمية, وضيفي لها مية جوز الهند وزيت جوز الهند والجلسرين وفيتامين E, رجي الازازة لحد ما المكونات تتخلط مع بعض كويس, احفظي السبراي في التلاجة, ورجيه قبل كل استخدام.

7- مثبت مكياج الزيوت الاساسية:

المكونات:

– 60 مل مية.

– ½ معلقة كبيرة جلسرين.

– 6 نقط : من زيت اللبان الدكر “للبشرة العادية” – زيت شجرة الشاي “للبشرة الدهنية” – زيت المر “زيت المر “للبشرة الجافة”.

الطريقة:

حطي كل المكونات في ازازة سبراي ورجيها كويس لحد ما تخلطيهم كويس مع بعض, وكده يبقى السبراي جاهز, خليه بعيد عن الوش حوالي 30 سم وانتي بترشيه.

طريقة البرايمر لتثبيت المكياج .. اعمليه بنفسك في البيت بخطوات بسيطة

طريقة البرايمر لتثبيت المكياج