10 وصفات لتجديد بشرة الجسم وتنعيمها وتفتيحها
الجسم بيتعرض يوميا للغبار والشوائب اللي بتتراكم على البشرة وبتدمرها وبتغير لون الجلد عن لونه الطبيعي وبتسيب تصبغات, عشان كده انتي محتاجة تحافظي عليها على طول نضيفة, ومجرد غسل الجسم بالصابون مش كافي لازالة كل السموم والشوائب المتراكمة عليه, انتي محتاجة لغسل الجسم بطريقة فعالة اكتر, وده اللي هنعرفه النهاردة من خلال المقال بتاعنا, هنقولك 10 وصفات لتجديد بشرة الجسم وتقشيرها, بالاضافة لفوايد تانية كتير هنتعرف عليها بالتفصيل.
وصفات لتجديد بشرة الجسم:
1- وصفة ملح البحر وفيتامين E:
المكونات:
2 كوباية ملح البحر.
2 – 3 معالق كبيرة زيت فيتامين E.
2 – 3 معالق صغيرة عسل.
كام نقطة من زيت الاطفال.
الطريقة:
اخلطي الملح مع زيت فيتامين E وقلبيهم مع بعض كويس, وبعدين ضيفي لهم العسل وزيت الاطفال, قلبي المكونات كلها لحد ما يتكون عندم معجون سلس وخشن شوية, وكده تبقى الوصفة جاهزة للاستخدام.
ملح البحر ليه خصائص مضادة للالتهابات, زيت فيتامين E يعتبر معالج للبشرة, زيت الاطفال والعسل بيساعدوا على ترطيب البشرة بشكل فعال, وبالاضافة ان الوصفة دي بتقشر الجلد وبتنضفه كمان بتعالج العلامات والندبات على البشرة اللي هتروح بالتدريج مع استخدام فيتامين E والعسل.
2- وصفة الملح والسكر والعسل:
المكونات:
½ كوباية ملح.
½ كوباية سكر.
½ كوباية عسل.
الطريقة:
اخلطي كل المكونات مع بعض وقلبيها كويس لحد ما يتكون عندك عجينة خشنة, واستخدميه على الجسم.
البشرة بتحتاج للتقشير باستمرار كروتين اساسي للعناية ببشرتك, وافضل طريقة للتقشير هي باستخدام مقشر, والسكر والملح بيساعدوا على ازالة الجلد الميت, والعسل هيحافظ على رطوبة الجلد.
3- وصفة السكر البني وزيت الجوجوبا:
المكونات:
1 كوباية سكر بني.
2 معلقة كبيرة من زيت الجوجوبا.
½ كوباية عسل.
الطريقة:
اخلطي المكونات كلها مع بعض لحد ما تتكون عجينة خشنة, استخدميها لتقشير الجسم.
السكر البني هيساعد على ازالة خلايا الجلد الميت بشكل فعال, وزيت الجوجوبا هيحافظ على رطوبة وليونة الجلد.
4- وصفة الكربوناتو وزيت جوز الهند:
المكونات:
½ كوباية كربوناتو.
1 – 2 معلقة كبيرة من زيت جوز الهند.
½ كوباية عصير ليمون.
2 – 3 نقط من زيت اللافندر.
الطريقة:
اخلطي المكونات كلها بعض وقلبيهم كويس, واستخدمي الوصفة على الجسم.
زيت جوز الهند غني بمضادات الاكسدة ومضادات الشيخوخة, والوصفة دي من الوصفات اللي بتساعد على علاج البشرة المتضررة من الشمس, والبشرة دايما بتكون محتاجة لفيتامين C اللي هيوفرهولك عصير الليمون, وزيت اللافندر بيساعد على تهدئة البشرة, بالاضافة انه هيدي ريحة حلوة جدا للبشرة.
5- وصفة السكر البني وقشر البرتقان:
المكونات:
2/3 كوباية سكر بني.
½ كوباية قشر برتقان بودر “جففي قشر البرتقان في الشمس او في الفرن وبعدين اطحنيه”.
½ كوباية زيت زيتون.
الطريقة:
اخلطي المكونات وقلبيهم كويس مع بعض, استخدمي الخليط على الجسم.
قشر البرتقان بيساعد على تفتيح البشرة بشكل طبيعي, وزيت الزيتون بيساعد على ترطيب البشرة وبيزود من فاعلية اي وصفة لما بيتضاف ليها, والوصفة دي فعالة جدا لعلاج العلامات القوية على البشرة وتصبغ الجلد.
6- وصفة بتلات الورد والسكر وزبدة الشيا:
المكونات:
½ كوباية بتلات ورد جافة.
1 كوباية سكر.
2/3 كوباية زيت زيتون.
1 معلقة كبيرة من زبدة الشيا.
2 – 3 معالق كبيرة من اي نوع زيت عطري “اختاري اي زيت تفضليه”.
الطريقة:
في طبق اخلطي المكونات كلها مع بعض وقلبيهم كويس, واستخدمي الخليط على الجسم.
بتلات الورد هتخلي بشرتك متوهجة ونضرة وهترطبها في نفس الوقت, زبدة الشيا هتحافظ على رطوبة البشرة, والوصفة دي تعتبر الاختيار المثالي للبشرة الجافة اوي, وخصوصا في فصل الشتا.
7- وصفة اللوز البودر والارز البودر واللبن:
المكونات:
1 كوباية لوز بودر.
½ كوباية دقيق شعير.
4 معالق صغيرة ارز بودر.
2 معلقة صغيرة خشب الصندل بودر.
لبن.
زيت اللوز.
الطريقة:
في طبق اخلطي اللوز البودر, ودقيق الشعير, والارز البودر وخشب الصندل البودر, اخلطي اللبن بالتدريج وكام نقطة من زيت اللوز, وقلبي لحد ما تتعجون عندك عجينة سلسلة, استخدميها على الجسم.
الفيتامينات اللي موجودة في اللوز هتساعد على تغذية البشرة وتحسين تدفق الدم, الارز المطحون بيحتوي على عوامل للحماية من اشعة الشمس وبيساعد على تفتيح البشرة والتخلص من اثار الشمس.
8- وصفة الشوفان البودر وملح البحر وزيت بذور العنب:
المكونات:
1 كوباية شوفان مطحون.
½ كوباية ملح البحر.
كام نقطة من زيت بذور العنب.
كام نقطة من اي نوع زيت عطري من اختيارك.
الطريقة:
اخلطي الشوفان مع الملح, وبعدين ضيفي لهم زيت بذور العنب والزيت العطري, قلبي المكونات مع بعض, واستخدمي الخليط على الجسم.
الشوفان بيساعد على علاج تهيج البشرة, وزيت بذور العنب بيساعد على حماية البشرة من اضرار اشعة الشمس.
9- وصفة القهوة والسكر وزيت جوز الهند:
المكونات:
½ كوباية قهوة.
½ كوباية سكر.
5 – 7 نقط من زيت النعناع.
زيت جوز الهند.
الطريقة:
اخلطي القهوة مع السكر, ضيفي لهم زيت جوز الهند لحد ما الخليط يبقى معجون خشن وبعدين ضيفي زيت النعناع, قلبي المكونات مع بعض واستخدمي الخليط على الجسم.
القهوة بتحتوي على خصائص مضادة للبكتيريا, وبتساعد على ازالة الجلد الميت والجاف, وزيت النعناع بيساعد على تهدئة البشرة, وزيت جوز الهند بيساعد على ترطيب البشرة.
10- وصفة السكر والخيار وزيت الافوكادو:
المكونات:
2 كوباية سكر.
2 ثمرة خيار.
زيت الافوكادو.
الطريقة:
افرمي الخيار في الخلاط وبعدين ضيفي له السكر وزيت الافوكادو وقلبيهم مع بعض كويس, واستخدمي الخليط على الجسم.
الخيار بيساعد على تهدئة البشرة والحفاظ على رطوبتها, كمان بيساعد على تفتيح البقع الغامقة والعلامات على الجلد, والسكر بيساعد على تقشير وتنضيف البشرة بعمق, وزيت الافوكادو بيساعد على ترطيب البشرة.
طريقة استخدام الوصفات على الجسم:
1- اول حاجة خدي شاور بمية دافية.
2- تكوني مجهزة شوية من زيت الزيتون الدافي, ادهني بيه الجسم كله.
3- خدي الخليط من اي وصفة من اللي احنا قولناهم وحطيها على الجسم كله.
4- ابدأي في تدليك الجسم في حركات دائرية لمدة دقايق.
5- اغسلي الجسم بالمية.
فوايد الوصفات:
تجديد الجلد:
تقشير الجلد الميت والجاف بيساعد على تجديد الجلد ونمو خلايا جلد جديدة.
التقليل من تصبغ الجلد:
كتير من البنات بتعاني من البقع الغامقة والعلامات على الجلد, والوصفات دي من الحاجات اللي بتساعد على تفتيح البقع الغامقة والتخلص من العلامات والندبات.
تنعيم البشرة:
بمجرد ما بشرتك تتخلص من كل الجلد الميت والشوائب, هتبقى ناعمة جدا, والوصفات دي من اكتر الحاجات اللي بتساعد على تنعيم الجلد.
ترطيب البشرة:
كتير من المكونات والزيوت اللي موجودة في الوصفات بتساعد على ترطيب البشرة, وبتخلي الجلد يحافظ على المية والرطوبة جواه.
تحسين تدفق الدم:
التدليك هيساعد على تحسين تدفق الدم, وتدفق الدم ده هيساعد ان البشرة تبقى خالية من كتير من مشاكل البشرة.
