كل اللي محتاجة تعرفيه عن الاظافر الفايبر جلاس..ومميزاتها وعيوبها
الاظافر الفايبر جلاس متعتبرش موضة جديدة لانها موجودة من زمان, ولكن على الرغم انها موجودة من فترة طويلة ولكن مش معروفة زي الاظافر الاكريليك, والجل, والشيلاك, والنهاردة من خلال السطور الجاية هنتعرف على الاظافر الفايبر جلاس وايه مميزاتها وعيوبها.
ايه هي الاظافر الفايبر جلاس؟
الاظافر الفايبر جلاس, والمعروفة كمان باسم الاظافر الحريرية, بتكون معمولة من مكونات رقيقة جدا ومرنة من الحرير او الالياف الزجاجية او غيرها من الخامات.
الضوافر اللي بتكون مصنوعة من الالياف الزجاجية بتبقى عبارة عن لفائف رفيعة بتتطبق على الاظافر بتضيف لها دعم زيادة.
اما اللي بتكون مصنوعة من الحرير دي تقدري تستخدمي زي طلاء الاظافر العادي, او حتى ممكن تدخل مع الاظافر الاكريليك عشان تضيف لها دعم وقوة اكتر.
والاظافر سواء اللي مصنوعة من الالياف الزجاجية او الحرير الاتنين بيتعملوا بنفس الطريقة والخطوات, الفرق الوحيد بس هو في نوع الخامة المستخدمة, وعلى رغم ان الاظافر الحريرية بتبان طبيعية اكتر ومش ملحوظة, الا ان الاظافر اللي من الالياف الزجاجية بتبقى اقوى اكتر.
ايه الفرق ما بين الاظافر الفايبر جلاس والاظافر الاكريليك؟
الاظافر المصنوعة من الفايبر جلاس عادة بتكون ارق بكتير من الانواع الاكريليك او الانواع التانية من الاظافر, وبالتالي ده بيخليها تبان طبيعية اكتر.
ولكن في حين ان الاظافر الرقيقة بتبان طبيعية اكتر, لكن بتبقى اقل متانة من الانواع التانية من الضوافر.
الاظافر الاكريليك بتبقى سميكة وصلبة, ولكن الفايبر جلاس مرنة وممكن انها تتكسر بسهولة من المية مع مرور الوقت.
عشان كده تعتبر الاظافر الفايبر جلاس مش مناسبة للاشخاص اللي بيعرضوا ايديهم للمية كتير وبشكل متكرر, لانها هتبوظ بسرعة.
ولكن الميزة في الاظافر الفايبر جلاس انها عموما تعتبر اقل ضرر بالاظافر الطبيعية من الانواع التانية زي الاكريليك وغيرها.
ولانها تعتبر اقل ضرر على الاظافر, الخبراء دايما بينصحوا بيها للاشخاص اللي حابين ضوافرهم الطبيعية تطول.
ايه هي مزايا وعيوب اظافر الفايبر جلاس؟
زي اي نوع من الضوافر, الاظافر الفايبر جلاس ليها مميزات وعيوب.
مميزاتها:
1- زي ما وضحنا في النقط اللي فاتت, من مميزات الفايبر جلاس انها بتبقى رقيقة اوي وبتبان طبيعية اكتر من اي نوع تاني.
2- اقل ضرر من انواع الضوافر التانية.
3- على عكس الضوافر الاكريليك اللي بيكون ليها ريحة قوية, الفايبر جلاس بتكون من غير ريحة خالص, وكمان مش بتسبب اي حساسية.
عيوبها:
ولكن على الرغم من ان الضوافر الفايبر جلاس اقل ضرر وشكلها طبيعي اكتر, لكن برضه ليها عيوب.
1- من عيوبها انها اضعف بكتير من الاكريليك.
2- وعلى الرغم من انها ممكن تكون اقوى بكتير من الاظافر الطبيعية عند بعض الاشخاص, ولكن مع ذلك هي اسهل بكتير في الكسر من الاكريليك.
3- الضوافر الفايبر جلاس مش مناسبة لكل الاشخاص, لان مهم جدا تكون ضوافرك الطبيعية صحية, عشان تضمني انها تطلع مظبوطة, لو انتي عندك عادة قضم الاظافر, او ضوافرك مش بتطول, او في ضرر شديد في ضوافرك, مش هينفع معاكي الضوافر الفايبر جلاس.
4- الضوافر الغير منتظمة ممكن تكون كمان مش مناسبة لكل الاشخاص, وبما انه الفايبر جلاس مش بينفع تعملي لها شكل مقوس, يعني الضوافر هيطلع شكلها طبيعي ومريح لو انتي ضوافرك الطبيعية اصلا مسطحة.
5- انواع الضوافر التانية بعضها ممكن يتعمل في البيت, ولكن الفايبر جلاس لازم تتعمل على ايد متخصص في صالون تجميل.
6- عملية تركيب الضوافر الفايبر جلاس ممكن تكون معقدة وبتاخد وقت طويل شوية, عشان كده مينفعش انها تتعمل في البيت.
طريقة ازالة الاظافر الفايبر جلاس:
الضوافر الفايبر جلاس عادة بتحتاج تجديد كل اسبوعين ل 3 اسابيع, على ايد المتخصص.
وازالة الضوافر الفايبر جلاس بتكون بنفس طريقة ازالة الضوافر الاكريليك, من خلال نقع الضوافر في الاسيتون.
مين جربت الضوافر الفايبر جلاس تشاركنا تجربتها؟
