ترتيب البيت على الطريقة اليابانية من خبيرة التنظيم ماري كوندو

بقلمريهام محمود فيمنوعات visibility1191

اغلبنا اكيد ممكن يشتكي من الكراكيب في البيت كل فترة, وان البيت مش منظم وفي حاجات كتير مالهاش لازمة وكل ما زادت الكراكيب بيزيد معاها صعوبة التنظيم, عشان كده احنا النهاردة هنساعدكم في المهمة دي وهنشارك معاكم ترتيب البيت على الطريقة اليابانية من خبيرة التنظيم ماري كوندو.

ترتيب البيت على الطريقة اليابانية:

ماري كوندو او المعروفة باسم “كون ماري” هي خبيرة تنظيم يابانية الفت كتاب اسمه “سحر تغيير الحياة عبر التنظيم” وابتكرت فيه اسلوب “كونماري” لتنظيم البيت بطريقة سهلة والتخلص من كل حاجة مالهاش لازمة وسمت الطريقة “نشر البهجة”.

نقط مهمة قبل ما تبدأي في الترتيب:

1- اول حاجة قبل ما تبدأي في الترتيب اختاري وقت مناسب, يعني لو في اطفال اختاري الوقت اللي يكونوا نايمين فيه او مش موجودين عشان تاخدي راحتك.

2- تخيلي الترتيب او طريقة التنظيم اللي انتي عايزة تعمليها.

3- رتبي حسب الفئة او النوع مش المكان.

4- امشي على الترتيب الصح اللي هنقوله دلوقتي في الترتيب حسب التصنيف.

5- لما تمسكي القطعة اسألي نفسك هل بتبهجك او بتسبب لك سعادة, لان الموضوع بيكون نفسي جدا وطريقة الترتيب دي هتحسي بعدها براحة مختلفة تماما عن اي طريقة ترتيب تانية, لانك هتتخلصي من كل حاجة مالهاش لازمة او اي حاجة ليها ذكرى مش حلوة عندك.

ترتيب البيت على الطريقة اليابانية
ترتيب البيت على الطريقة اليابانية

الترتيب حسب التصنيف:

التصنيفات بالترتيب هي.

1- الملابس.

2- الكتب.

3- الاحذية.

4- الاوراق.

5- متفرقات “خاصة بالمطبخ, الحمام, او اي حاجة تانية غير الحاجات اللي فوق”.

6- تذكارات.

اختاري اوسع مكان في البيت وابدأي جمعي كل نوع من التصنيف في كوم لوحده على الارض جنب بعض, اللبس كله في كوم, الكتب في كوم, الاحذية, وهكذا, وابدأي افرزي ورتبي كل كوم بنفس الترتيب المكتوب اللبس وبعده الكتب وهكذا.

ترتيب البيت على الطريقة اليابانية

ترتيب الملابس:

زي ما قولنا حطي كل الهدوم على الارض في كوم واحد قدامك, وجهزي جنبك اكياس كبيرة عشان تحطي فيها الحاجات اللي هتستغني عنها.

ابدأي عملية الفرز امسكي قطعة قطعة وقرري هتتخلصي منها ولا هتخليها, امسكي القطعة واسألي نفسك هل القطعة دي مريحة نفسيا بالنسبة لك ومالهاش اي ذكرى مش كويسة بالنسبة لك, وهل هتستفادي منها فعلا ولا لا؟ لو لقيتي انها ليها ذكرى مؤلمة بالنسبة لك او مش هتستفادي منها اتخلصي منها فورا وحطيها في الكيس الخاص بالحاجات اللي هتستغني عنها, ولو هتستفادي منها خليها على جنب, والحاجات اللي هتستغني عنها ممكن ترميها او تتبرعي بيها يعني اتخلصي منها بالطريقة اللي تريحك.

بعد ما تطلعي الحاجات اللي مالهاش لازمة, امسكي الحاجات اللي هتحتفظي بيها وافرزي البنطلونات لوحدها مع بعض, الفساتين مع بعض, الشرابات, الملابس الداخلية وهكذا, بعد ما تخلصي فرز كل حاجة لوحدها ابدأي طبقي ورتبي.

طريقة التطبيق هتكون كمان مختلفة طبقي كل حاجة بشكل طولي, بحيث ان الحاجة جوه الدولاب او في الادراج جنب بعض مش فوق بعض, وتبقي شايفة كل القطع قدامك.

وللحاجات الصغيرة زي الملابس الداخلية, الشرابات, السكارفات ممكن تستخدمي منظمات ولو معندكيش ممكن تستخدمي اي علب قديمة عندك مش مستخدمة, او تعملي فواصل في الادراج بقطعة كارتون, وترتبي كل نوع في قسم لوحده.

ترتيب البيت على الطريقة اليابانية

بالفيديو طريقة تطبيق الملابس على الطريقة اليابانية:

هنعمل نفس طريقة الترتيب مع الكتب, الاحذية, الاوراق, وغيرها بنفس الترتيب, وكل تصنيف لما نفرزه لازم كل العناصر بتاعته تبقى قدامنا على الارض عشان مننساش حاجة, وفي نفس الوقت نعرف كل الحاجات اللي موجودة عندنا في البيت.

وحاولي انك تقللي من كل تصنيف على قد ما تقدري, يعني استغني عن الحاجات اللي فعلا مش هتفيدك ولا هتستخدميها, وخلي بس الحاجات المفيدة بالنسبة لك, هتلاقي في النهاية عندك مساحة تخزين اضافية من غير تكلفة.

بالطريقة دي مش هتضطري انك ترتبي البيت الا على فترات متباعدة جدا, لان البيت هيكون مترتب باستمرار, وكل حاجة ليها المكان الخاص بيها, وكل حاجة موجودة في مكانها.

في النهاية بعد ما ترتبي وتتخلصي من كل الحاجات اللي مالهاش لازمة هتحسي براحة نفسية كبيرة جدا, هتلاقي تفكيرك بقى منظم اكتر ومتحكمة اكتر في حياتك, والهوا حواليكي نضيف من غير كراكيب كتير, وهتبدأي انك تتمتعي ببيتك تاني وتشوفيه بشكل مختلف.

ترتيب البيت على الطريقة اليابانية

ترتيب البيت على الطريقة اليابانية

ترتيب البيت على الطريقة اليابانية

ترتيب البيت على الطريقة اليابانية

ترتيب البيت على الطريقة اليابانية

18 فكرة رائعة وعملية لترتيب البيت بسهولة .. وازاي تستغلي المساحات

افكار لترتيب البيت واستغلال المساحات