13 نصيحة لترطيب فروة الراس الجافة خلال فترة الشتا

ريهام محمود
ريهام محمود
في
شعر
6011

لو خلال شهور الشتا الجافة فروة راسك بتتعرض للجفاف واللي بدوره بيسبب لجفاف الشعر, النهاردة من خلال المقال بتاعنا هنقولك بعض النصايح والحيل اللي هتساعدك على ترطيب فروة الراس الجافة, وهتحافظ عليها صحية خلال فترة الشتا.

ترطيب فروة الراس الجافة:

1- تدليك فروة الراس:

من العادات البسيطة اللي المفروض تعمليها كل ما تستخدمي اي منتج للشعر هو التدليك, استخدمي اطراف صوابعك لتدليك المنتجات على فروة راسك, التدليك في حركات دائرية بيساعد على تنشيط نمو الشعر من خلال زيادة تدفق الدم في فروة الراس, بالاضافة انه هيخلي المنتجات اللي بتحطيها على شعرك فعالة اكتر.

وافتكري ان البلسم مش بيتحط على فروة الراس, حطيه بس على الشعر والاطراف بعيد عن فروة راسك.

ترطيب فروة الراس الجافة 1
ترطيب فروة الراس الجافة 1

2- اعرفي السبب الجذري لفروة الراس الجافة قبل ما تدوري على مرطب فروة الراس:

قبل ما تبدأي تدوري على مرطب لفروة الراس وتطبيق نصايح وحيل مرطبة, الاول اعرفي السبب الجذري لجفاف فروة راسك, لانه السبب ممكن يختلف من شخص للتاني, من اول تغيير المواسم لحد الاثار الجانبية للتحولات الهرمونية او الادوية.

معرفة السبب هيساعدك على اختيار المنتجات المناسبة اللي المفروض تستخدميها.

ترطيب فروة الراس الجافة 2
ترطيب فروة الراس الجافة 2

3- اعرفي الفرق بين القشرة وفروة الراس الجافة:

كتير من الاشخاص مش بيعرفوا يفرقوا ما بين قشرة الشعر وفروة الراس الجافة, ازاي تعرفي الفرق بينهم؟

اولا قشرة الشعر بتيجي من الافراط في انتاج الزهم او الزيوت الزيادة في فروة الراس اللي بتخلي خلايا الجلد في فروة الراس تنمو بشكل اسرع من المعدل الطبيعي, انما فروة الراس الجافة ببساطة سببها بيكون جفاف فروة الراس.

فلو انتي بتعاني من جفاف فروة الراس هتلاحظي على الفروة قشور بيضا مرنة, اما قشرة الشعر بتكون عبارة عن قشور لونها اصفر وبتكون ملتصقة اوي بفروة الراس.

ترطيب فروة الراس الجافة 3
ترطيب فروة الراس الجافة 3

4- ازاي تختاري مرطب لو بتعاني من التهاب الجلد الدهني على فروة الراس:

بعض الحالات الجلدية زي التهاب الجلد الدهني, بتحتاج لتعليمات اكتر عشان تختاري المنتجات اللي تناسبها صح.

التهاب الجلد الدهني: هو عبارة عن حالة جلدية بتحصل عادة لفروة الراس وبتسبب حكة, بقع متقشرة, احمرار, وفروة راس دهنية.

والاشخاص اللي بيعانوا من الحالة دي ومحتاجين ترطيب لفروة الراس بننصحهم باستخدام زيت شجرة الشاي وتدليكه على فروة الراس.

جل الصبار كمان من المكونات اللي ممكن تساعد على حل المشكلة, ولكن مع ذلك بننصحك انك مع الحالة دي تستشيري دكتور جلدية متخصص وتاخدي علاج طبي.

ترطيب فروة الراس الجافة 4
ترطيب فروة الراس الجافة 4

5- اختاري الشامبو والبلسم الصح المناسب لشعرك وفروة راسك:

كل نوع شعر بيكون ليه الشامبو والبلسم المناسب ليه, وانواع ممكن تسبب جفاف الشعر وفروة الراس.

على سبيل المثال انواع الشامبو والبلسم اللي داخل في مكوناتها السيليكون ممكن انها تتسبب في جفاف الشعر وفروة الراس بشكل كبير جدا, عشان كده بننصحك انك تختاري انواع الشامبو والبلسم الخالية من المواد الضارة زي السيليكون والسلفات وغيرها من المواد اللي بتسبب ضرر للشعر.

والشامبو الخالي من السيليكون هو مهم بشكل خاص للاشخاص اللي بيعانوا من الشعر المجعد او الكيرلي, لازم يكونوا حريصين اكتر في اختيار الشامبو والبلسم الخالي من المواد الضاره.

ترطيب فروة الراس الجافة 5
ترطيب فروة الراس الجافة 5

6- ماسك الشعر هو افضل مرطب لفروة الراس خلال فترة الشتا:

ماسكات الشعر بتوفر ترطيب عالي جدا للشعر وفروة الراس خلال شهور الشتا بشكل خاص, ولو انتي مش عاملة روتين خاص للعناية بشعرك يبقى دلوقتي جيه الوقت انك تعملي روتين.

وبما انك محتاجة ماسكات لترطيب الشعر, اعتمدي على الماسكات اللي اساسها من الزيوت زي زيت جوز الهند وزيت الارجان, سيبي ماسك الزيت على الشعر لمدة من 15 – 20 دقيقة وبعدها اغسليه.

ترطيب فروة الراس الجافة 6
ترطيب فروة الراس الجافة 6

7- اتجنبي الحرارة والعلاجات الكيميائية خلال موسم الشتا:

مافيش حاجة ممكن تسبب جفاف الشعر اكتر من الحرارة والمواد الكيميائية وخصوصا خلال فصل الشتا, عشان كده الافضل انك تعتمدي على الشعر الطبيعي خلال شهور الشتا واديه فرصه خلال الفترة دي انه يرتاح من الحرارة والاضرار الكيميائية.

لان العلاجات الكيميائية بتجرد الشعر من الرطوبة, ولو عملتي ده خلال فصل الشتا هيحصل جفاف اكتر لشعرك.

وعلى الرغم من انه الافضل تجفيف الشعر شوية عشان متخرجيش للجو البرد والشعر مبلول, ولكن متبالغيش في التجفيف ومتستخدميش السيشوار على درجة حرارة عالية.

ترطيب فروة الراس الجافة 7
ترطيب فروة الراس الجافة 7

8- استخدمي الزيت لترطيب فروة الراس:

من مرطبات فروة الراس اللي المفروض تدخليها في روتين العناية بالشعر بتاعك هي الزيوت, على الرغم من ان الشعر بينتج زيوت طبيعية, ولكن ممكن انه يحتاج مساعدة وترطيب اضافي خلال فترة الشتا بشكل خاص.

واكيد لو مش عايزة شعرك يبان دهني اوي او ملزق خففي الزيت بشوية مية, ضيفي كان نقطة من الزيت للمية هتكون كافية.

يعتبر زيت الارجان من اكتر الزيوت اللي بتساعد على ترطيب الشعر, وبتخليه صحي وبيلمع.

ترطيب فروة الراس الجافة 8

9- غيري نظامك الغذائي:

تغيير النظام الغذائي ممكن يكون عامل مساعد كبير جدا للحفاظ على صحة فروة الراس, اكل الطعام الصحي بيحافظ على صحة كل حاجة في جسمنا بشكل عام.

حاولي انك تتجنبي بقدر الامكان الاطعمة الغير صحية, واعتمدي على نظام غذائي متوازن, زودي من اكل الخضار, البروتين زي البيض, السمك, المكسرات يعتبروا مصادر غنية بالبروتين, مفيدة جدا لشعرك.

ترطيب فروة الراس الجافة 9

10- متستخدميش الشامبو يوميا:

خلال موسم الشتا اتجنبي غسل الشعر بالشامبو يوميا, ولحسن الحظ ان الجو البارد هيساعد على ده وهيخليكي مش محتاجة تغسلي شعرك بشكل يومي.

غسل الشعر بالشامبو يوميا بيخلي فروة راسك وشعرك جافة اكتر, وخصوصا لو شعرك كيرلي او ويفي انتي محتاجة انك متهمليش النصيحة دي وتبعدي عن غسل الشعر بشكل يومي.

استخدام الشامبو من مرتين لتلات مرات في الاسبوع هيكون كافي جدا.

ترطيب فروة الراس الجافة 10

11- اتجنبي تقشير فروة الراس بسكراب قوي:

ممكن لو انتي استخدمتي منتجات كتير لترطيب فروة راسك تتراكم مع الوقت وتسببلك حكة, وفي الحالة دي ممكن تستخدمي مقشر لفروة الراس ممكن يكون قوي او قاسي, وممكن ده يسبب تهيج لجلدك.

عشان كده بننصحك تعالجي التراكمات باستخدام مقشر ليه تأثير مرطب, وممكن تستخدمي الشامبو العادي بتاعك مرتين في الاسبوع لتنضيف فروة الراس, او تستخدمي منتج مخصوص لتنضيف فروة الراس مرة واحدة في الاسبوع.

ترطيب فروة الراس الجافة 11

12- متستخدميش منتجات شعر كتير:

عشان تتجنبي تراكم منتجات الشعر, متستخدميش منتجات كتير, واكيد منتجات العناية بالشعر مهمة انك تدخليها في روتينك ولكن المهم تعرفي ازاي وامتى تستخدميها.

كمان اتجنبي استخدام كميات كبيرة او الافراط في استخدام منتجات على الشعر, لانها ممكن تسبب جفاف الشعر.

خلي الموضوع بسيط: استخدمي الشامبو والبلسم كل يومين, ماسك الشعر ومنتجات الترطيب العميق للشعر مرة واحدة في الاسبوع, وزيت الشعر استخدميه لما تحسي انك محتاجاه بس.

وفي المجمل 4 منتجات مناسبة جدا المفروض متستخدميش اكتر من اللازم.

ترطيب فروة الراس الجافة 12

13- استشيري دكتور الجلدية:

في بعض الاحيان, فروة الراس الجافة بتحتاج مساعدة اكتر من مجرد مرطب لفروة الراس, وبتحتاج لمساعدة متخصصة اكتر.

لو انتي حاسه ان المنتجات اللي بتستخدميها مش بتجيب معاكي نتيجة, او بتعاني من جفاف فروة الراس بشكل قوي اوي, في الحالة دي هتحتاجي لاستشارة دكتور جلدية.

لو مشيتي على النصايح دي هتتجنبي جفاف فروة الراس خلال موسم الشتا, وهتحافظي على شعرك وفروة راسك صحية.

ترطيب فروة الراس الجافة 13

مقالات متعلقه

خطوتين بس هيساعدوا على زيادة نمو شعرك بسرعة وتكثيفه

خطوتين بس هيساعدوا على زيادة نمو شعرك بسرعة وتكثيفه

طريقة عمل شامبو البيض الطبيعي المغذي للشعر في البيت

طريقة عمل شامبو البيض الطبيعي المغذي للشعر في البيت

طريقة العناية بالشعر في الشتا وفترة الرياح الموسمية

طريقة العناية بالشعر في الشتا وفترة الرياح الموسمية