افضل 5 نصايح جمالية لاول مقابلة

بقلمريهام محمود فيعلاقات visibility2384

المقابلة الاولى سواء كانت بشخص مرتبطة بيه وهتقابليه لاول مره او عريس مافيش شك انها بتكون مخيفة, ومليون سؤال ممكن يدور في عقلك, زي هتتكلموا في ايه؟ هتعملي ايه لو حصلت حاجة محرجة؟ هيحصل ايه لو مرتاحتيش او لقيتي نفسك مش متوافقة معاه؟ واسئلة تانية كتير, ورغم انه بيكون صعب التغلب على المخاوف دي, الا انه لو مظهرك كويس ممكن انه يساعد في تهدئة اعصابك, والموضوع مش بس انك تسيبي انطباع اول حلو, ولكن المظهر الكويس هيساعدك انك تحسي بثقة اكبر في نفسك, عشان كده النهاردة هنقول لكل بنات حوا افضل نصايح جمالية لاول مقابلة.

نصايح جمالية لاول مقابلة:

1- رتبي وقتك ومواعيدك:

اكيد قبل المقابلة هتحتاجي انك تعملي باديكير ومانيكير او تروحي تعملي شعرك وتهتمي ببشرتك, وتظبطي وتدلعي نفسك شوية, عشان كده لازم تحطي في اعتبارك كل الحاجات دي, ويمكن يكون في منها محتاج ميعاد قبلها, فضروري انه يكون في وقت كافي انك تنجزي كل الحاجات دي من غير ما تضغطي نفسك قبل المقابلة.

ملحوظة: لو هتروحي تعملي جلسة تنضيف لبشرتك في مركز تجميل الافضل انه يكون قبل المقابلة بوقت طويل, لانه احيانا بعد جلسة التنضيف البشرة بتحمر وتلتهب شوية, عشان كده اختاري وقت الجلسة قبل المقابلة بوقت طويل عشان تدي فرصة لبشرتك تهدى ويبقى شكلها حلو.

نصايح جمالية لاول مقابلة
نصايح جمالية لاول مقابلة

2- امشي على روتين ترطيب:

امشي على روتين كويس لترطيب بشرتك عشان تحافظي عليها ناعمة وشكلها صحي, واكيد الترطيب هيديكي نتيجة افضل لو بتستخدميه بشكل يومي, واصلا من روتينك كل يوم, ولو انتي بتهملي الترطيب بنقولك الوقت متأخرش ابدأي من دلوقتي استخدمي مرطب مناسب لبشرتك عشان تمنعي جفاف البشرة.

استخدمي مرطب طبيعي مناسب ميسببش اي تهيج لبشرتك, وزعيه على الوجه, الايدين, القدمين.

نصايح جمالية لاول مقابلة

3- اعملي مكياجك الطبيعي:

المقابلة الاولى مش هي ابدا الوقت المناسب اللي تجربي فيها لوك جديد, لانك هتبقي قلقانة يا ترى هيطلع كويس ولا لا فبلاش تعملي حاجة مش مضمونة, بالاضافة ان انتي عايزة يبقى شكلك طبيعي ومتغيريش ملامحك الطبيعية.

عشان كده الافضل انك تعتمدي على روتين مكياجك اليومي عشان تبقي مرتاحة ومش قلقانة, وهنقولك شوية نصايح لمكياج طبيعي بسيط:

مكياج الشفايف:

اول حاجة ابدأي بطبقة خفيفة من زبدة الكاكاو عشان ترطبي شفايفك والروج يطلع شكله احلى وناعم, لو هتحطي روج او ملمع شفايف حطيه بعناية, واتجنبي الالوان الغامقة اوي, الافضل تعتمدي على الالوان الطبيعية.

مكياج العيون:

ممكن تستخدمي قطرة مطهرة للعين عشان تمنعي اي احمرار او جفاف.

اما بالنسبة لمكياج العين, ابدأي بكريم للعين لتنشيط الدورة الدموية في منطقة حوالين العين, بعد كده استخدمي كونسيلر وهايلايتر عشان تظهري عينك وتديها اضاءة, وده يعتبر لوك طبيعي جدا للعين.

وبننصحك تستخدمي ايشادو وماسكارا كمان بشكل خفيف, عشان العيون تبان حلوة بشكل طبيعي.

كريم الاساس:

اعتمدي على طبقة خفيفة من كريم الاساس هتكون كافية جدا, وهيبقى قاعدة لباقي المكياج بتاعك, وهيخليكي تحسي بثقة اكبر مع بشرتك.

ولو بشرتك دهنية ومعرضة انها تفرز زيوت زيادة ويبقى فيها لمعة, استخدمي برايمر خالي من الزيوت قبل كريم الاساس.

4- اختيار ستايل الشعر:

زي المكياج بالظبط المفروض متجربيش اي ستايل جديد للشعر في المقابلة الاولى, لان قص الشعر او تجربة لون جديد او مختلف تماما مش مضمون وهيخليكي قلقانة ومش مرتاحة.

ولكن مع ذلك اكيد مهم انك تروحي لمصفف الشعر قبل المقابلة, ممكن يعملك تغييرات بسيطة ويقص لك الاطراف يعني يعملك بس مجرد ريفريش بسيط للوك شعرك, واتأكدي انك تروحي عند شخص ثقة و اللي انتي متعودة تتعاملي معاه.

5- ابعدي عن القلق والتوتر:

هنقولك النصيحة الاخيرة والاكتر اهمية وهي انك تبعدي عن القلق والتوتر.

اكيد عارفين ان الكلام اسهل من الفعل, ولكن الاستعداد للمقابلة الاولى دي لازم يكون ممتع, ممكن تلجأي لاصحابك يساعدوكي في تهدئة اعصابك ويبقوا معاكي وانتي بتحضري كل حاجة.

ايه هى تحضيرات استقبال العريس لأول مرة؟!

تحضيرات استقبال العريس
تحضيرات استقبال العريس