دكتور نفساني بيكشف ازاي تفقدي وزنك عن طريق تدريب شهيتك

تخيلي كده لو انه يبقى سهل عليكي تبديل اكل الاطعمة السريعة لنظام غذائي صحي ومغذي! الدكتورة هيلين مكارثي ابتكرت “بندول للشهية” ممكن انه يساعدك على ده, وعلى الرغم ان الموضوع محتاج شوية مجهود, ولكن لو مشيتي على النصايح بالظبط, هيكون سهل عليكي جدا انك تبدأي اخيرا في اكل اطعمة صحية اكتر, والنهاردة من خلال موضوعنا هنعرف مع بعض تقنية تدريب الشهية لفقدان الوزن وازاي تعمليها.

تقنية تدريب الشهية لفقدان الوزن:

بندول الشهية:

بندول الشهية هو عبارة عن مقياس بيتكون من 11 نقطة بيمتد من -5 “جائع للغاية” لحد +5 ” ممتليء جدا بشكل غير مريح”, وفي كتاب الدكتورة هيلين “كيف تعيد شهيتك”, بتوضح انه لما مش بنكون جعانين البندول بيكون على 0 يعني “طبيعي”, ولما بنحس بالجوع البندول بيتحرك للسالب, وبيتحرك للموجب او الزائد لما نبدأ اننا ناكل.

تدريب الشهية لفقدان الوزن
تدريب الشهية لفقدان الوزن

والدكتورة هيلين شايفة اننا المفروض منبدأش في الاكل غير لما نوصل في مرحلة الجوع ل -3 اللي هي معناها “اننا اكيد جعانين”, ولازم تتوقفي عن الاكل عند +3 اللي هي معناها انك “شبعانة تماما”, وده ضروري جدا لنظام غذائي صحي, لو مشينا على القاعدة دي, ممكن اننا نمنع نفسنا من الافراط في الاكل, وهيديكي اوبشن انك تستمتعي باي نوع اكل تتخيليه من غير زيادة وزن حتى لو قطعة كيك, وده هيأدي مع الاستمرار عليه لفقدان الوزن بالتدريج.

تدريب الشهية لفقدان الوزن

الجوع الخفيف مفيد ليكي:

الدكتورة هيلين بتقول ان الاحساس بالجوع الخفيف ده يعتبر صحي بالنسبة لك, عشان كده المفروض متخافيش منه, والمهمة الاساسية لبندول الشهية هو انه يعلمك بشكل اساسي التوقف عن الاكل لما معدتك تتملي بشكل مناسب وده مهم جدا لاكل صحي, وقالت ان اليابانيين عندهم مبدأ في الاكل انهم بياكلوا لحد ما المعدة تتملي بنسبة 80%, وده شبه بالظبط اللي احنا قولناه انه المفروض تتوقفي عن الاكل عند +3 “شبعانة تماما” يعني حاسه بالرضا ولكن معدتك مش مليانة زيادة عن اللزوم, وده هيحافظ على وزنك صحي على طول.

وبندول الشهية ده مفيد بشكل خاص للاشخاص اللي بياكلوا بانتظام وجبات كبيرة بشكل مفرط, او بياكلوا حلويات حتى وهما شبعانين او معدتهم مليانة, ولو انتي باستمرار بتاكلي كميات كبيرة, فانتي كده بتدخلي في جسمك بشكل مستمر اكل اكتر من الكمية اللي محتاجها, وفي الحالة دي مهما كان الاكل صحي او لا, هيتحول في الجسم لدهون.

تدريب الشهية لفقدان الوزن

امتى وايه اللي المفروض تاكليه:

المشكلة الحقيقة اللي بتواجهنا اننا بناكل في مواعيد معينة او اوقات الوجبات مش لما نكون فعلا جعانين, او بناكل وجبة دسمة في وقت احنا مش محتاجينها فيه, وده السبب في ان اكل 3 وجبات رئيسية في اليوم مناسب جدا, عشان تحافظي على المعدل الصحي, ولكن ده اكيد مش هيمنع انك تاكلي حاجة لو حسيتي بالجوع قبل الوجبة الرئيسية.

وفي الحالة دي مهم جدا انك تختاري هتاكلي ايه حسب توقيت الوجبة اللي بعد كده, يعني لو حسيتي مثلا بالجوع قبل ساعة من وجبة الغدا, في الحالة دي كلي وجبة خفيفة تكون سهلة الهضم على سبيل المثال الفواكة او الخضروات, وبالتالي قبل وقت الغدا على طول هتحسي بجوع خفيف مرة تانية, ولو لسه في وقت طويل قبل وجبتك الرئيسية وحسيتي بالجوع ممكن تاكلي حاجة بتحتوي على البروتين والالياف والدهون زي البيض والمكسرات.

ولو انتي محستيش بالجوع الخفيف قبل ساعة من وجبتك اللي بعد كده, ده معناه ان معدتك كانت بتهضم الوجبة اللي قبل كده طول الوقت ومكنش في وقت انها تاخد راحة عشان تحسي بالجوع تاني.

لو مشيتي على النظام ده هتلاقي نفسك بتفقدي وزن من غير ما تحسي ولا تمشي على نظام غذائي معين, وهتاكلي اكلك العادي جدا وهتستمتعي بكل انواع الاكل وهتخسي في نفس الوقت.

تذوق الاكل بشكل افضل:

الدكتورة هيلين بتقول كمان في كتابها اننا عادة بنختار الاطعمة الحلوة, المالحة, الدسمة, لان ليها مذاق وطعم بنستمتع بيه حتى لو مش جعانين, وده السبب اللي بيخلينا ممكن ناكل كتير حتى واحنا معدتنا مليانة, على العكس لو حاولتي مثلا تاكلي طماطماية وانتي معدتك مليانة مش هتحبي طعمها.

عشان كده لازم تدربي نفسك انك تستني لحد ما تحسي بجوع خفيف قبل ما تبدأي تاكلي وجبتك, في الوقت ده هيكون اكل الطعام الصحي افضل, لان مستقبلات التذوق عندك بتكون في افضل حالاتها لما تكوني جعانة, وبالتالي الاطعمة الصحية اللي انتي مكنتيش بتستمتعي بيها قبل كده, هتبدأي انك تتذوقيها بشكل افضل وانتي حاسه بالجوع, وفي جملة دايما كان بيقولوها اليونانيين القدماء ان “الجوع هو افضل توابل”.

اما بالنسبة للاكلات السريعة او الجانك فوود اللي فيها كتير من المواد المضافة والسعرات الحرارية, هتبقى في الوقت ده اقل جاذبية بالنسبة لك لانك هتبدأي تلاحظي طعمها “الكيميائي” او الاضافات اللي ممكن يكون طعمها مش مستحب وانتي حاسه فعلا بالجوع.

في النهاية اختصار التقنية دي هو انك متاكليش غير لما تحسي فعلا بالجوع مش اكل لمجرد الاكل وخلاص او ان ده ميعاد الوجبة, وسيبي نفسك تجوعي شوية مش مضر ابدا بالعكس هيكون مفيد ليكي, وخلي يومك فيه 3 وجبات رئيسية بس, ولو حسيتي بجوع قبل الوجبة الرئيسية كلي سناك او وجبة خفيفة تكون صحية, ده مع الوقت هيدرب شهيتك انك متاكليش الا لو فعلا جعانة وهيعودك على الاكل الصحي, وبالتالي ده هيساعدك تفقدي وزنك بالتدريج من غير اي نظام غذائي.

8 عادات لتخسيس الوزن اي حد مبتدأ محتاج انه يحطها في اعتباره

عادات لتخسيس الوزن