7 حاجات في شخصيتك ممكن تخوف اللي حواليكي منك

ريهام محمود
ريهام محمود
4649

في بعض الاحيان الطريقة اللي بنتصرف بيها او الحاجات اللي بنقولها ممكن تبعد اللي حوالينا عننا, ممكن يكون بسبب بعض الصفات اللي محتاجين فعلا نغيرها, او على العكس, ممكن يكون حاجة انتي شايفاها ايجابية في نفسك, وتكون هي السبب في ان اللي حواليكي يبعدوا عنك, والنهاردة من خلال السطور الجاية هنعرفك على صفات بتخوف الناس منك او بتخليهم يبعدوا عنك, وفي نهاية المقال هنقولك ايه التغييرات اللي ممكن تعمليها في تصرفاتك وسلوكك عشان تحافظي على علاقاتك مع اصحابك والناس اللي حواليكي كويسة.

صفات بتخوف الناس منك:

1- صادقة بطريقة قاسية:

الصدق اكيد هو واحد من الصفات الكويسة اللي ممكن تميز شخصيتك, ولكن انك تحبي تكوني صادقة مع الناس حتى لو ده معناه احيانا انك تكوني قاسية او الصراحة تأذي شخص ما في حياتك هنا هتبقى المشكلة, انتي بتحسي ان ده الصح وانك تقولي الحقيقة من غير تجميل دي حاجة كويسة, ولكن احيانا الصراحة دي ممكن تجرح اللي قدامك, عشان كده بننصحك انك تقولي رايك ولكن تختاري طريقة متجرحش الشخص اللي قدامك او تكون قاسية.

صفات بتخوف الناس منك 1
صفات بتخوف الناس منك 1

2- مش بتحبي الاحاديث البسيطة:

انك تكوني مش بتحبي الدردشة ولو بسيطة مثلا حوالين حالة الجو, او تهتمي تسمعي الشخص اللي قدامك قضى اجازته ازاي, او اي موضوع بيفتحوا شخص ما معاكي بهدف انه يبقى ودود ومهذب, ولكن بالنسبة لك الحديث البسيط ده مالوش معنى, وبتفضلي انك توصلي بشكل مباشر للموضوع اللي يهمك, او تتناقشي في حاجات مهمة, وتتكلمي في حاجات مفيدة.

ونتيجة لده هتتخطي كل الاحاديث والمجاملات مع اللي حواليكي, وممكن توصلي لدرجة انك تتجنبي تماما الاشخاص اللي انتي عارفة انك مش هتتكلمي معاهم محادثة مهمة او جذابة بالنسبة لك, وده هيكون السبب انك ممكن تسمعي عنك كلمة قليلة الذوق او معاملتها باردة.

صفات بتخوف الناس منك 2
صفات بتخوف الناس منك 2

3- معندكيش تسامح مع عدم المعرفة:

ممكن تكوني انتي دايما بتحبي يكون عقلك متفتح ناحية كل حاجة وتبقي عايزة تتعلمي على طول حاجات جديدة, ولكن مش شرط اللي حواليكي يعملوا نفس اللي انتي بتعمليه او يكونوا زيك, وفي الحالة دي لما هتلاقي الشخص الل قدامك عنده عدم معرفة او جهل بحاجة معينة, ده ممكن يعصبك, وبسبب كده هتحاولي تتجنبي الاشخاص اللي من النوع ده, او في اسوأ الحالات هتفقدي اعصابك معاهم.

صفات بتخوف الناس منك 3
صفات بتخوف الناس منك 3

4- مش بتتعاطفي مع اللي حواليكي:

دايما مش بتتعاطفي مع اللي حواليكي ومش بتقبلي اعذار, ومتوقعة ان اللي حواليكي يعملوا نفس الشيء, بتفضلي ان الناس يستجمعوا نفسهم مهما كانت حالتهم ويتعاملوا مع مشاكلهم مهما كانت, بدل من انهم يضيعوا وقتهم في الشعور بالاسف على نفسهم, ولو انتي بتشتغلي مع اشخاص من النوع ده, فانتي هتبقي حاسه دايما انهم بيضيعوا وقتك.

وبالتالي هتبقي صريحة وتعبري عن رايهم ده ليهم, وللسبب ده ممكن اللي حواليكي يشوفوكي من غير قلب ومعندكيش اي عاطفة كأنك انسان آلي من غير اي مشاعر بيهتم بس بالنتايج ومش بيهتم باي حاجة تانية بتحصل حواليه.

صفات بتخوف الناس منك 4
صفات بتخوف الناس منك 4

في صفات او سمات تانية معينة في شخصيتك هي صفات ايجابية, ولكن مع ذلك, ممكن البعض يشوفها انها ممكن تخوف اللي حواليكي منك.

1- بتتمسكي بكلمتك:

مع الصدق, اكيد بتيجي صفة الحفاظ او التمسك بكلمتك, لما بتدي وعد لحد بتحافظي عليه, ومع ذلك, مش الكل يقدر يعمل ده, عشان كده اللي حواليكي لما بيشوفوا ان كلمتك واحدة وبيقارنوا نفسهم بيكي, وبيشوفوا الاختلاف والفرق بينك وبينهم بيحسوا بالاهانة والعجز.

صفات بتخوف الناس منك 6

2- تكوني منفتحة الذهن Open-minded:

لما تكوني منفتحة الذهن وبتحبي تجربي حاجات جديدة, على عكس بعض الاشخاص اللي ده مش بيكون في شخصيتهم, بتحبي تسمعي وتعرفي ك حاجة, وقراراتك وارائك بتتاخد دايما في الاعتبار, وبتعملي دايما كل حاجة غير تقليدية, وبتعملي كل حاجة بطريقة مختلفة عن غيرها, والحاجات الجديدة والغريبة دي دايما بتحط اللي حواليكي بره منطقة الراحة بتاعتهم, وبالتالي لما بتتحدي طريقة تفكيرهم, هيحسوا بالتهديد او الخوف من ناحيتك.

3- انك تكوني قوية الارادة والرأي:

لو عايزة تعملي حاجة معينة ومصممة عليها مافيش حاجة هتمنعك بغض النظر عن اي حاجة تانية, حتى لو ده معناه انك متعمليش اللي حواليكي متوقعينه منك, وبتكوني دايما مش خايفة من الوقوف لوحدك لو كانت طريقة تفكيرك مختلفة او بتعملي حاجات خارج القاعدة, وحتى لو محققتيش اللي انتي عايزاه على طول, بيكون عندك الثقة والايمان اللي بيخليكي تستمري في المحاولة, بغض النظر عن نظرة اللي حواليكي واستغرابهم من تصرفاتك او طريقة تفكيرك.

صفات بتخوف الناس منك 7

ايه اللي ممكن تعمليه عشان متخوفيش اللي حواليكي منك:

– حاولي انك تكوني عاطفية اكتر وتفكري في مشاعر الناس اللي حواليكي, حاولي انك تنقلي رايك وافكارك للاشخاص اللي حواليكي بأمانة وبصدق ولكن بطريقة متجرحهمش, لان في اشخاص ممكن يتعاملوا مع الحقيقة زي ما هي مهما كانت وفي الحالة دي قوليلهم الحقيقة بكل صراحة, ولكن في اشخاص تانيين ممكن يتجرحوا من كلامك, ويكون نتيجة لده ان علاقتك تبوظ بالشخص ده, عشان كده حاولي انك تقولي الحقيقة بطريقة لطيفة.

مثلا لو هتنقلي خبر مش حلو لشخص ما, ممكن تبقي واضحة في نقل الخبر, ولكن بيني دعمك ليه في نفس الوقت, او مثلا لو انتي مضطرة تنتقدي عمل شخص معين, ركزي على تصرفاته, ومتحطيش سبب الفشل او اللوم عليه هو كشخص, ولكن بيني انك عايزة الشغل يطلع بشكل كويس, وقدمي له النصيحة باللي المفروض ممكن يعمله وايه اللي ممكن يحسنه.

– الناس عادة متعودين على الاحاديث البسيطة اللي ممكن يفتحوا بيها مجال للكلام مع اللي حواليهم, فحاولي انك متتخطيش ده, ولو انتي بتحسي انك مش مرتاحة مع ده وبتحسي انك بتضيعي وقتك, ممكن بس تقللي من فترة الحديث,, والموضوع يستحق التجربة انك توفري شوية وقت للاحاديث الودية اللي هتخلي اللي حواليكي يحسوا براحة معاكي ويبقى بداية بالنسبة لهم عشان الحديث بعد كده يمشي بسلاسة.

– في المواقف اللي بتختلف فيها وجهة نظرك عن شخص تاني, حاولي انك متتعصبيش او تسيء للشخص ده, ولكن اتناقشي بالمنطق وحاولي تقدمي الحجج اللي تدعم رايك من غير ما تاخدي رد فعل عنيف اتجاه اللي قدامك.

– حاجة كمان لازم تحطيها في اعتبارك, ان في بعض الاحيان الناس بيحتاجوا انهم يخرجوا عواطفهم, حتى لو ده هيخليهم يبانوا ضعفا من خلال الشكوى والاحساس بالاسف على نفسهم, بدل ما تنتقديهم عشان بيعملوا كده, حاولي انك تبيني لهم الدعم وتساعديهم عشان يقفوا على رجليهم من تاني بعد اي وقت صعب بيمروا بيه, هيقدروا جدا وقوفك جنبهم ودعمهم, وبالتالي في موقف ما بدل ما تخلي شخص يتضايق او ينفر منك بالعكس هيكون صديقك وهتكسبيه.

صفات بتخوف الناس منك 8

مقالات متعلقه

50 سؤال تسألهم لحبيبتك عشان تعرفها بشكل افضل

50 سؤال تسألهم لحبيبتك عشان تعرفها بشكل افضل

تفضلي سينجل افضل من المحاربة في علاقة غلط ، اعرفي السبب

تفضلي سينجل افضل من المحاربة في علاقة غلط ، اعرفي السبب

اهم اسرار الزواج الناجح ، وازاي تظهروا احترامكم لبعض

اهم اسرار الزواج الناجح ، وازاي تظهروا احترامكم لبعض