طريقة عمل فلافل الحمص مع سلطة حمص وصوص الزبادي
الفلافل من الوجبات اللذيذة جدا المناسبة للفطار او العشا او في السندويتشات, والنهاردة هنعرف مع بعض طريقة عمل فلافل الحمص, ومعاها كمان وصفة سلطة الحمص بالفلفل الاحمر بطريقة مختلفة ولذيذة وجنبها صوص الزبادي عشان تاكليهم مع الفلافل.
طريقة عمل فلافل الحمص:
الكمية دي لـ 4 افراد.
مكونات الفلافل:
– زيت غزير للقلي.
– ا بصلة صغيرة متقطعة نصين.
– ¼ كوباية بقدونس طازة “10 جرام”.
– 6 فصوص ثوم.
– علبتين حمص “حوالي 660 جرام”.
– 1 معلقة صغيرة كمون مطحون.
– 1 ½ معلقة صغيرة كزيرة ناشفة مطحونة.
– ½ معلقة صغيرة فلفل اسود مطحون.
– 1 معلقة صغيرة ملح.
– 6 معالق كبيرة دقيق.
– ¼ كوباية زيت زيتون “60 مل”.
مكونات سلطة الحمص بالفلفل الاحمر:
– 2 علبة حمص “660 جرام”.
– 1 كوباية فلفل احمر مشوي في الفرن ومتبل “100 جرام”.
– ¼ كوباية طحينة “60 جرام”.
– 1 فص ثوم.
– 1 معلقة كبيرة عصير ليمون.
– 1 معلقة كبيرة زيت زيتون.
– ¼ معلقة صغيرة بابريكا.
– ½ معلقة صغيرة فلفل اسود مطحون.
– 1 معلقة صغيرة ملح.
– 2 معلقة كبيرة مية, حسب الحاجة.
مكونات صوص الزبادي “تزاتزيكي”:
– 1 ثمرة خيار متقشرة.
– 2 كوباية زبادي كبيرة “490 جرام”.
– 1 ½ معلقة صغيرة عصير ليمون.
– 1 فص ثوم.
– 3 معالق كبيرة شبت.
– 4 اوراق نعناع طازة.
للتقديم:
– 4 ارغفة عيش بلدي.
– ¼ كوباية بصل احمر متقطع شرايح “35 جرام”.
– ¼ كوباية طماطم صغيرة متقطعة نصين “50 جرام”.
– ½ كوباية خيار متقطع شرايح “65 جرام”.
طريقة عمل الفلافل:
في الخلاط ضيفي البصل, البقدونس, الثوم, اضربيهم مع بعض بشكل خشن, وبعدين ضيفي الحمص والكمون والكزبرة والفلفل الاسود والملح والدقيق وزيت الزيتون واضربيهم مع بعض كويس, ولكن يفضل القوام بتاعها سميك, اضربيها تقريبا من 15 – 20 ضربة, انقلي الخليط في طبق كبير, واغسلي الخلاط عشان هنستخدمه تاني لسلطة الحمص.
خدي بالمعلقة او بايدك من خليط الفلافل واعملي اقراص بالحجم اللي تفضليه, المفروض الكمية دي تعملك حوالي 12 قرص فلافل.
اقلي الفلافل في زيت غزير سخن حوالي من 2 – 4 دقايق, لحد ما يبقى لونها بني دهبي غامق, وطلعيها على ورق مطبخ عشان يمتص الزيت الزيادة, وبعدين انقليها في طبق التقديم وزينيها بالبقدونس.
طريقة عمل سلطة الحمص بالفلفل الاحمر:
في الخلاط ضيفي الحمص, الفلفل الاحمر المشوي والمتبل, الطحينة, الثوم, عصير الليمون, زيت الزيتون, البابريكا, الملح, الفلفل الاسود, اضربي كل المكونات مع بعض كويس لحد ما الخليط يبقى ناعم, ضيفي معلقة مية واضربيها مع المكونات ولو لقيتي الخليط محتاج يتخفف تاني ضيفي المعلقة التانية, لحد ما توصلي لقوام مناسب, وكده تبقى سلطة الحمص جاهزة.
طريقة عمل صوص الزبادي:
في الخلاط ضيفي الخيار, الزبادي, عصير الليمون, الثوم, الشبت, النعناع, اضربيهم مع بعض لحد ما يبقى الخليط ناعم, ولكن يبقى فيه قطع صغيرة اوي يبقى ليه ملمس مش سايل اوي, انقليه في طبق وزينيه بالشبت, وكده يبقى صوص الزبادي جاهز.
قدمي الفلافل, مع سلطة الحمص, وصوص الزبادي, والبصل الاحمر المتقطع, والطماطم, والخيار, وبالهنا والشفا.
الطريقة بالفيديو:
