طرق ازاي تتخلصي من 10 انواع من البقع المختلفة على الملابس بسرعة
كلنا هدومنا ممكن من وقت للتاني تتعرض لانواع مختلفة من البقع, وفي اغلب الوقت تقريبا البقع دي بتبقى على الملابس المفضلة عندنا, ومش بنعرف نتخلص منها ازاي خصوصا لو انواع بقع صعبة, عشان كده النهاردة هنقولك طرق للتخلص من البقع المختلفة بمكونات بسيطة ومتوفرة في البيت.
طرق للتخلص من البقع على الملابس:
1- ازالة بقع الحبر باللبن:
الحبر يعتبر من اكتر البقع اللي بيكون صعب التخلص منها بسهولة, ولكن مع طريقتنا النهاردة هتقدري تتخلصي من بقعة الحبر بمنتهى السهولة.
كل اللي هتعمليه هاتي طبق حطي فيه شوية لبن, وحطي المنطقة اللي واقع عليها الحبر في اللبن, سيبيه منقوع لمدة من 15 – 30 دقيقة, بعد كده بفرشة اسنان قديمة افركي البقعة كويس وبعدين اشطفيها بالمية.
2- لبقع الدهون استخدمي الملح:
بقع الدهون والزيوت من انواع البقع اللي بتبقى ثابتة اوي ومش بتطلع بسهولة, لكن احنا النهاردة هنقولك على حل للتخلص منها بسهولة بمكون واحد وهو الملح.
رشي شوية ملح على البقعة وسيبيها شوية, وبعدين اتخلصي من الملح هتلاقيه امتص الزيت, وبعدها اغسليها بالمية والمسحوق بالطريقة العادية.
3- اتخلصي من بقع المانيكير بمزيل المانيكير:
بقع المانيكير ممكن تخلصي منها عن طريق مزيل المانيكير او الاسيتون ولكن المهم انك تستخدميه بالطريقة الصحيحة.
هاتي كام منديل ورق وحطي البقعة عليها, يعني خلي البقعة مواجهة للمناديل, وحطي مزيل المانيكير على ضهر البقعة, وبعدين غيري المناديل وحطي غيرها مجرد ما تتبل كلها بالاسيتون, وبعدها اشطفيها بالمية الباردة واغسليها في الغسالة بالطريقة العادية.
4- اتخلصي من بقع الدم بمية الاكسجين:
مافيش شك ان بقع الدم من اصعب البقع في ازالتها, خصوصا لو سيبتيها لحد ما تنشف, ولكن مع ذلك في طريقة سهلة للتخلص منها وهي باستخدام مية الاكسجين “بيروكسيد الهيدروجين”, هو يعتبر مادة مؤكسدة بتتفاعل مع البقعة وبتزيلها.
هاتي من الصيدلية ازازة مية اكسجين بتركيز 3%, وانقعي البقعة في شوية من مية الاكسجين, سيبيها شوية وبعدين بسكينة او بصوباعك افركي البقعة, اشطفي الهدوم بالمية اتخلصي من مية الاكسجية وبعدين اغسليها في الغسالة بالطريقة العادية.
5- نضفي لياقة القميص الابيض بالشامبو:
القمصان البيضا من اكتر الملابس اللي بيبان فيها البقع والعرق بسرعة, لكن ممكن تنضفيها وترجعيها كانها جديدة باستخدام الشامبو العادي.
صبي كام نقطة من شامبو الشعر العادي على اللياقة, وافركيها كويس, ولو عندك شامبو مخصوص للشعر الدهني هيكون افضل كمان, وبعدين سيبي الشامبو على اللياقة لمدة 20 دقيقة وبعدها اشطفيه بالمية, واغسليه في الغسالة بالطريقة العادية.
6- اتخلصي من بقع العشب بمعجون الاسنان:
لو عندك اطفال بيلعبوا دايما في اماكن مفتوحة فيها زرع وهدومهم بتتعرض لبقع العشب, ممكن تتخلصي منها بمكون بسيط وموجود في كل بيت وهو معجون الاسنان.
حطي كمية بسيطة من معجون الاسنان الابيض على البقعة, ومهم انك متستخدميش معجون الاسنان الجل استخدمي النوع العادي بس, سيبي المعجون على البقعة لمدة كام دقيقة, بعدين هاتي فرشة اسنان قديمة انقعيها في مية او بليها بالمية كويس وافركي البقعة, بعدها اغسلي الهدوم في الغسالة بالطريقة العادية.
7- للتخلص من بقع الشاي استخدمي مية باردة مع منظفات:
سواء كانت البقعة ناشفة او لسه رطبة, نقعها في المية الباردة هيساعدك تتخلصي منها.
صبي مية باردة على البقعة من ورا مش من قدام, الطريقة دي اسهل للتخلص من البقعة, وبعدين صبي عليها اي نوع منظف ملابس متوفر عندك, وافركيها, وسيبيها لمدة من 3 – 5 دقايق وبعدين اشطفيها بالمية, ولو البقعة ناشفة سيبيها منقوعة لمدة 30 دقيقة في المنظف وبعدين اشطفيها.
8- اتخلصي من بقع العنب الاحمر والكركدية بصودا الخبز والملح:
العنب والكركدية من البقع الصعبة اللي مش من السهل التخلص منها, ولكن استخدام مزيج صودا الخبز “الكربوناتو” مع الملح هيسهل عليكي المهمة دي, وهيضيع البقع في دقايق.
اول ما تحصل البقعة رشي عليها شوية من الكربوناتو واضغطي عليها بالراحة بفوطة نضيفة عشان يمتص البقعة, هاتي طبق كبير وحطي الهدوم فوقيه وشديها كويس, وممكن تستخدمي شريط مطاطي لتثبيته, وبعدها رشي شوية ملح على البقعة, سيبيه لمدة 5 دقايق منقوع في مزيج الكربوناتو والملح وبعدين صبي عليه مية مغلية ببطء, وبعدها اغسليه في الغسالة على اعلى درجة حرارة ممكنة, اللي يتحملها نوع القماش.
9- استخدمي ورقة ومكوى لازالة الشمع:
الخدعة دي قديمة ومفيدة جدا لازلة بقع الشمع من الهدوم, كل اللي انتي محتاجاه ورقة جرنال او ورقة عادية ومكوى.
حطي فوطة قديمة على ترابيزة المكوى, وفوقيها قطعة ورق, وبعدين حطي عليها قطعة الملابس اللي فيها البقعة, وبعدين حطي فوقيها قطعة ورقة تانية, وابدأي امشي بالمكوى على درجة حرارة عالية على البقعة, الورقة هتمتص الشمع, كرري حسب الحاجة مع استبدال قطعة الورق لحد ما تتخلصي من البقعة خالص, وبعدها اغسليها بالطريقة العادية.
10- اتخلصي من اللبانة باستخدام مكعبات التلج, والجلسرين, وصابون غسل الاطباق السايل:
اللبان بيكون صعب جدا التخلص منها لما بتلزق في الهدوم, ولكن مع ذلك مش مستحيل التخلص منها, هتحتاجي بس مكعب تلج وجلسرين وصابون سايل الخاص بغسل الاطباق.
اول حاجة افركي اللبانة بمكعب التلج عشان تجمديها, وبعدين استخدمي سكينة صغيرة وحاولي تطلعيها بقدر الامكان, عشان تتخلصي من باقي اللبان اللي لازق حطي عليه كمية بسيطة من الجلسرين, وسيبيه كام دقيقة, وبعدين افركيه بالمية, ولو لقيتي لسه في بواقي لبان لازق, اغسليه بالصابون السايل بتاع الاطباق.
مين جرب طريقة من الطرق دي قبل كده؟ ومين عنده طرق مختلفة للتخلص من البقع يشاركنا بيها.
اعملي بنفسك سبراي فعال جدا لازالة البقع من الملابس
