ازاي تلبسي البنطلون الجينز لكل الاوقات
الجينز خامة رائعة جدا وعملية وبتتحمل وبتعيش فترة طويلة, وتقدري تلبسيه في كل وقت, تقدري تلبسيه في الشتا والصيف, للخروج الصبح وبالليل, يعني تقدري تلبسيه في اوقات كتير ومناسبات كتير, وتعملي بيه لوك مختلفة, والنهاردة من خلال المقال بتاعنا هنقولك طرق لبس الجينز لكل الاوقات.
طرق لبس الجينز لكل الاوقات:
اول حاجة اختاري البنطلون الجينز الصح, وبخامة تكون عالية الجودة, ويكون مقاسه مناسب تماما ليكي, وفي انواع كتير مختلفة من الجينز, ولكن النهاردة هنقولك اهم 3 انواع المفروض يكونوا موجودين في دولابك.
الجينز الاسود:
البنطلون الاسود من القطع الاساسية اللي المفروض تكون موجودة في دولابك, ولكن مهم جدا انك تختاري خامة كويسة, ومن ناحية تانية الجينز الاسود هيخلي عندك اختيارات مفتوحة كتير لانك تقريبا ممكن تنسقيه على اي قطعة عندك في الدولاب, يعني لو في يوم محتارة ومش عارفة تلبسي ايه اسهل حاجة انك تطلعي الجينز الاسود وتنسقي عليه اي قطعة من فوق.
الجينز الازرق الغامق:
اللون ال Navy او الازرق يعتبر لون كلاسيكي والمفروض يكون موجود في دولاب كل بنت, زي الاسود بالظبط, لانه كمان من الالوان اللي تقدري تنسقي عليها اي قطعة من فوق.
الجينز ال Distressed:
الجينز ال Distressed, الجينز الفاتح, او غيرها من انواع الجينز التانية المفضلة عندك تقدري تضيفيها لدولابك, ممكن تنسقي الجينز ال Distressed مع سويتر Oversized هيطلع بلوك حلو جدا.
بشكل عام الجينز تقدري تعملي بيه ستايلات ولوك مختلفة وتنوعي في لبسه بشكل كبير جدا, لو انتي بتحبي شكل الساقين عندك ممكن تعتمدي على الجينز الستريت او السكيني, لو عايزة تباني اطول ممكن تعتمدي على الجينز اللي وسطه عالي, لو عايزة لوك انيق ومريح ممكن تختاري الجينز اللي رجله واسعة, اهم حاجة عند اختيار الشكل او ستايل الجينز انه يكون مناسب لشكل جسمك ويداري الديفوهات ويظهر جسمك بشكل حلو وتبقي حاسه بثقة وانتي لبساه.
ازاي تظهري الجينز بتاعك:
عشان تظهري الجينز بتاعك, فانتي محتاجة بس انك تضيفي للوك بتاعك اكسسوارات انيقة, تقدري تلبسي على الجينز اي نوع شوز هيليق عليه ويظهره فورا, خصوصا لو مختارة توب مناسب, ممكن تلبسي قميص كلاسيكي بزراير او بلوزة حرير هتديكي لوك انيق جدا.
ازاي تنسقي طبقات مع الجينز:
الجينز اختيار رائع جدا لما الموضوع يتعلق بلوك الطبقات, ممكن في الايام البرد تلبسي تحته شراب ضيق حراري للتدفئة, ممكن للوك انثوي تنسقي جينز باللون الازرق الغامق او الكحلي مع فستان فلورال شتوي, او سويتر جملي سميك, وفوقيهم بالطو طويل عشان تكملي اللوك.
اكتر القطع الاساسية المناسبة مع الجينز:
– التوب المقلم.
– ال Trench coat.
– السويتر ال Oversized.
– التيشرت الابيض.
– البلوزة الحرير.
في النهاية الجينز هو قطعة اساسية كلنا محتاجين تبقى موجودة في دولابنا, الشكل والستايل اختاري منها اللي تفضليه اكتر واللي يمشي على شكل جسمك اكتر, ولكن اتأكدي انك تختاري الجينز اللي جودته عالية, لانه هيكون اضافة فعلا لدولابك وهيعيش معاكي فترة طويلة.
