بالخطوات والفيديو: طريقة عمل بيتزا لازانيا بالثوم
لو انتي من عشاق البيتزا واللازانيا النهاردة جمعنا الاتنين في وصفة واحدة وهي بيتزا لازانيا, طريقة جديدة ومختلفة وطعمها لذيذ جدا, هنعرف مع بعض في السطور الجايه طريقتها بالخطوات والفيديو.
طريقة عمل بيتزا لازانيا:
المكونات:
– 1 بصلة متقطعة مكعبات.
– 1 ثمرة فلفل اخضر متقطعة مكعبات.
– 250 جرام مشروم متقطع شرايح.
– 6 وحدات سجق متقطعين, طلعي اللحمة من جوه الجلد.
– 100 جرام بيبروني شرايح.
– 2 فص ثوم مفروم.
– 500 جرام طماطم متقطعة مكعبات.
– 100 مل شوربة خضار او فراخ او عصير طماطم.
– 2 معلقة صغيرة زعتر مجفف.
– ½ معلقة صغيرة شطة.
– 1 معلقة صغيرة ملح.
– 1 معلقة صغيرة فلفل اسود.
– 50 جرام زبدة.
– 50 جرام دقيق.
– 700 مل لبن كامل الدسم.
– 100 جرام جبنة شيدر.
– 320 مل مية دافية.
– 2 ¼ معلقة صغيرة خميرة فورية.
– 1 ½ معلقة كبيرة سكر.
– 2 معلقة كبيرة زيت زيتون.
– 1 معلقة صغيرة ملح.
– 450 جرام دقيق.
– 2 شريحة لازانيا طازة.
– 100 جرام جبنة موتزاريلا.
– 7 شرايح بيبروني.
لصوص الزبدة بالثوم:
– 70 جرام زبدة سايحة.
– 1 فص ثوم مفروم.
– 1 معلقة كبيرة بقدونس مفروم.
طريقة التحضير:
1- سخني طاسة كبيرة على نار متوسطة, حطي فيها شوية زيت, وضيفي البصل وقلبيه في الزيت لحد ما يطرى, بعدها ضيفي الفلفل الاخضر والمشروم وقلبيهم مع بعض لمدة 5 دقايق, لحد ما المكونات كلها تبقى طرية, ضيفي الثوم والبيبروني والسجق, وقلبيهم لحد ما السجق يتحول للون الدهبي والبيبروني ينزل الزيوت بتاعته, ضيفي الطماطم المتقطعة, وعصير الطماطم او الشوربة حسب اللي هتختاريه او متوفر عندك, والتوابل والشطة والملح والفلفل, سيبي المكونات كلها على نار خفيفة لمدة 15 دقيقة.
2- في طاسه تانية سخني الزبدة على نار متوسطة, لما تسيح وتعمل رغوة, ضيفي لها الدقيق وقلبيه مع الزبدة لمدة دقيقة, ضيفي اللبن بالتدريج مع التقليب لحد ما المزيج يبقى ناعم تماما قبل ما تضيفي دفعة تانية من اللبن لحد ما تخلصي الكمية كلها, بمجرد ما تضيفي اللبن كله سيبيه على النار لمدة دقيقتين لحد ما الصوص تبقى سميكة, ضيفي الجبنة الشيدر والملح والفلفل, ولما الجبنة تسيح ارفعيه من على النار وسيبيه على جنب.
3- في طبق اخلطي المية الدافية والخميرة والسكر وسيبيه لمدة 10 دقايق لتنشيط الخميرة, ضيفي زيت الزيتون والملح والدقيق وقلبيهم مع بعض, على الرخامة رشي شوية دقيق واعجني العجينة كويس لمدة 5 دقايق لحد ما العجين يبقى ناعم, وبعدين حطي العجينة في طبق كبير مدهون زيت, غطيها بكيس بلاستيك وسيبيها في مكان دافي لمدة ساعة تقريبا لحد ما تخمر وحجمها يتضاعف.
4- سخني الفرن على درجة حرارة ما بين 100 – 200 درجة.
5- هاتي عجينة البيتزا وخدي منها قطع صغيرة لفيها على شكل حلزوني, واربطيها عقدة, وكرري الشكل ده لحد ما تخلصي العجينة كلها.
6- في طاسه كبيرة او صينية مدورة تدخل الفرن, ابدأي رصي البيتزا جنب بعض حوالين داير, في النص حطي معلقة كبيرة من خليط السجق اللي حضرناه في البداية خالص, وفوقيها شوية من صوص الجبنة, وفوقيهم شريحة لازانيا, ضيفي شوية تاني من صلصة السجق وصوص الجبنة وفوقيهم الجبنة الموتزاريلا, وكرري ده لحد ما الكمية عندك تخلص, وفي الاخر حطي شرايح البيبروني على الوش, وادهني البيتزا بالفرشة بصوص الزبدة بالثوم, دخليها الفرن لمدة 25 دقيقة لحد ما الجبنة اللي على الوش تسيح, والبيتزا يبقى لونها دهبي.
7- قطعيها وقدميها وبالهنا والشفا.
