دليل العناية بالبشرة لعلاج وتهدئة حب الشباب..وانواع الحبوب وطريقة علاج كل نوع

بقلمريهام محمود فيبشرة visibility1422

واحدة من اكتر مشاكل العناية بالبشرة اللي بتقابلنا هي مشكلة حب الشباب, وبنشوف انها مشكلة مش بتنتهي ابدا, ولكن الحقيقة انها ممكن تنتهي وتتعالج بالروتين الصح, والنهاردة من خلال موضوعنا هنقول لكل بنات حوا دليل العناية بالبشرة اللي هتساعدك على علاج وتهدئة حب الشباب.

دليل العناية بالبشرة لعلاج حب الشباب:

ايه اسباب حب الشباب:

حب الشباب بيحصل بسبب انسداد المسام بخلايا الجلد الميت والزهم (الزيت الطبيعي اللي بتنتجه البشرة), ده بيأدي لظهور البثور, والحبوب, والرؤوس السودا, ولو حالة حب الشباب شديدة اوي ممكن يتكون حب الشباب الكيسي, وده معناه ان العدوى اتعمقت في الجلد والمسام بقت ملتهبة وده بيسبب في تشكل حبوب بتكون فيها صديد, عشان كده لازم تحددي نوع البثور اللي انتي بتعاني منها عشان تعرفي تعالجيها صح لان كل نوع ليه علاج مختلف.

دليل العناية بالبشرة لعلاج حب الشباب
دليل العناية بالبشرة لعلاج حب الشباب

انواع البثور:

– الرؤوس البيضا: دي بتبقى مسام مسدودة بخلايا الجلد الميتة, ودي تعتبر اقل حالة في انواع الحبوب, ولازم تتجنبي تماما انك تفتحي الرؤوس البيضا او تفضيها, ولكن بدل كده استخدمي كريم موضعي عليها, ممكن تستخدمي كريم الريتينويد كوسيلة لمنع تكون رؤوس بيضا جديدة, لانه بيساعد على منع خلايا الجلد الميتة انها تتراكم في المسام, وبتسمح للجلد بامتصاص العلاجات بشكل افضل.

– الرؤوس السودا: هي في الاساس رؤوس بيضا بتتعرض للاكسجين, وده بيأدي لاكسدة البثور وبتتحول للون الاسود, ويعتبر حمض الساليسيليك مثالي جدا لمنع وعلاج الرؤوس السودا, وممكن كمان تستخدمي شرائط الانف المتوفرة في الصيدلية للتخلص من الرؤوس السودا اللي ممكن تستخدميها بشكل منتظم كل اسبوعين, او تستخدمي مستخرج الرؤوس السودا ولكن لازم تستخدميه بعناية جدا عشان متعملش ندبات على بشرتك يبقى صعب علاجها.

– البثور: دي بتكون نمط مفرط من البكتيريا اسمها P.acne, واللي بتسبب الاحمرار والتورم والالم والصديد احيانا, وعشان تتخلصي منها بطريقة سهلة وسريعة, هاتي فوطة بليها بمية سخنة (بس متكونش سخنة اوي على قد تحمل الجلد بس) واضغطي بيها على البثور عشان تفتحي المسام, وبعدين دلكيها بزيت شجرة الشاي او قطعة جنزبيل طازة اللي ليها خصائص مضادة للبكتيريا ومضادة للالتهابات.

– الكيس: الكيسات بتكون مؤلمة وحجمها اكبر واكتر احمرار من البثور, وبننصحك انك تتجنبي تماما الضغط على النوع ده الحبوب ومحاولة استخراج اللي جواه, لان ده ممكن يأدي لانتشار البكتيريا ويزود الالتهابات, وده معناه ان الحبوب هتاخد وقت اطول عشان تروح, والنوع ده من الحبوب ممكن تعالجيه باستخدام مقشر كيميائي مرة واحدة او مرتين في الاسبوع, دوري على مقشرات بتتكون من AHA (زي الجليكوليك, حمض اللبنيك, او الستريك) و BHA (زي حمض الساليسيليك).

اتأكدي انك بتستخدمي تونر بشكل يومي عشان تستعيدي توازن درجة الحموضة في بشرتك وتنضفي المسام, دوري على التونر اللي بيحتوي على حمض الساليسيليك لان ده بيخلي التونر يتغلل اكتر جوه المسام.

وبننصحك انه مع النوع ده من البثور تتابعي مع دكتور جلدية, وتعملي جلسان تقشير كيميائي مع حمض الساليسيليك.

– العقيدات: ده نوع تاني حاد من انواع حب الشباب, بيشبه الكيس, بيكون عبارة عن كتلة صلبة ومؤلمة تحت سطح الجلد, وعلى عكس الكيس مش بيحتوي على راس, وكتلة الجلد الميت والزهم هتفضل تحت الجلد لفترة ممكن توصل لاسابيع او حتى شهور, وممكن مع النوع ده تستخدمي الرتينويدات وحمض الساليسيليك لعلاجه, والافضل علاج النوع ده بالمراهم والوصفات الطبية من دكتور متخصص.

دليل العناية بالبشرة لعلاج حب الشباب

الروتين اليومي للعناية بالبشرة اللي بتعاني من حب الشباب:

1- الخطوة 1: التنضيف

اول خطوة لروتين سليم للبشرة هو التنضيف الصبح وبالليل, لان ده هيساعد على تقليل زيوت البشرة اللي ممكن تسد المسام وتسبب البثور, ويعتبر الغسول الجل او الرغوي مثالي جدا للبشرة الدهنية المعرضة لحب الشباب, لانه بينضف المسام بعمق.

الصبح: استخدمي غسول جل او رغوي, ودوري دايما على الانواع اللي بتحتوي على مكونات مضادة للبكتيريا زي شجرة الشاي والعسل لانها هتساعد على تقليل بكتيريا حب الشباب في الجلد.

بالليل: بالليل دايما اعتمدي على التنضيف المزدوج عشان تضمني ان الجلد خالي من اي اثار مكياج او اوساخ او بكتيريا او تلوث, كخطوة اولى يعتبر المنظف الزيتي اختيار ممتاز جدا, لانه هيساعد على تنضيف البشرة من الزهم بالاضافة انها بتكون مضادة للبكتيريا والالتهابات, وبتساعد على تهدئة البشرة, وبعدها الخطوة التانية استخدمي غسول جل او رغوي او مائي.

2- الخطوة 2: التونر

التونر يعتبر مهم جدا للبشرة المعرضة لحب الشباب, لانه بيساعد على تقليل ظهور المسام وتحقيق التوازن بين انتاج الزيوت واشراق البشرة, دوري على التونر اللي بيحتوي على مقشرات كيميائية زي حمض الساليسيليك وحمض الجليكوليك, او بيحتوي على مكونات طبيعية زي الجينسنج والبابونج والورد مفيدة جدا لانها مليانة بمضادات الاكسدة اللي بتقلل الالتهاب وبتهدي البشرة.

الصبح: ابدأي يومك بتونر مهديء بيحتوي على مكونات مرطبة زي حمض الهيالورونيك, الالوفيرا, الجينسنج, ويكون خالي من الكحول, عشان يبقى لطيف على البشرة.

بالليل: دوري على الانواع اللي بتحتوي على مكونات فعالة في ازالة اثار المكياج وتضييق المسام, استخدمي تونر بيحتوي على احماض AHA, وزيت شجرة الشاي والصفصاف لمحاربة بكتيريا حب الشباب وتقليل الالتهاب والتورم.

3- الخطوة 3: السيروم

الصبح: اختاري سيروم مرطب او تركيبته بتحتوي على فيتامين C لحماية بشرتك.

بالليل: اختاري سيروم اكتر كثافة لتنضيف عميق للمسام, واللي بيحتوي على حمض الساليسيليك, الزنك لتقليل الزهم, وحمض الهيالورونيك لترطيب البشرة.

4- الخطوة 4: الترطيب

واحدة من اكتر المعلومات الغلط المنتشرة انه اذا انتي بشرتك دهنية او معرضة لحب الشباب فانتي كده مش محتاجة ترطيب, لكن ده مش صح, لانه في الحقيقة كل ما كانت بشرتك جافة اكتر ده هيحفز الجلد انه ينتج زهم اكتر عشان يرطب بشرتك, عشان كده لازم تتأكدي من ترطيب بشرتك بمرطب خفيف خالي من الكحول الصبح وبالليل, اختاري المرطب اللي بيحتوي على حمض الهيالورونيك المرطب, وحمض الساليسيليك اللي هتساعد على التخلص من المسام.

الصبح: استخدمي تركيبة كريم خفيفة.

بالليل: ممكن تستخدمي كريم مرطب تركيبته اتقل.

5- الخطوة 5: واقي الشمس

اشعة الشمس مضرة للبشرة المعرضة لحب الشباب, وخصوصا لو انتي بتستخدمي منتجات مقشرة وبتحتوي على AHAs ده هيخليها حساسة اكتر للاشعة فوق البنفسجية, وممكن الشمس تسبب غمقان الندبات, عشان كده لو انتي بتعاني من الندبات ضروري انك تستخدمي واقي الشمس, ده هيساعد ان الندبات تخف بشكل اسرع.

دوري على كريم حماية من الشمس يكون خفيف, وبيحتوي على عامل حماية SPF 30 مع UVA بمستوى 5 نجوم, ويكون خالي من الزيوت, وواقي الشمس استخدميه في الصيف والشتا يعني طول السنة.

دليل العناية بالبشرة لعلاج حب الشباب

خطوات العناية الاسبوعية بالبشرة:

التقشير:

التقشير يعتبر خطوة مهمة للبشرة المعرضة لحب الشباب, ولكن المتخصصين بينصحوا انك تتنجنبي المقشرات القاسية او الفرك العنيف للبشرة لان ده ممكن يزود مشكلة الحبوب, عشان كده بدل ده, استخدمي مقشر كيميائي, وهو تركيبته بتكون عبارة عن انزيم او حمض بيخترق الجلد بشكل عميق وبيساعد على تذويب وطرد الاوساخ اللي بتسبب تراكم خلايا الجلد الميتة, دروي على مقشر AHAs زي حمض الجليكوليك وحمص اللبنيك, او BHAs زي حمض الساليسيليك.

الافضل تقشير البشرة يكون بالليل, عشان تدي بشرتك فرصة للشفاء وانها تهدى بعد التقشير والتجديد قبل التعرض للشمس, واتجنبي التقشير اكتر من 3 مرات في الاسبوع.

الماسك:

الماسك يعتبر روتين اسبوعي مهم للبشرة المعرضة لحب الشباب, ممكن تعتمدي على ماسكات الطين اللي بتساعد على ازالة الاوساخ وتقليل الزهم وفي نفس الوقت بيخلي بشرتك ناعمة ونضيفة.

الريتينول:

الريتينول مفيد للبشرة المعرضة لحب الشباب, لو استخدمتيه بانتظام, ممكن انه يساعد على تخفيف احتقان مسام البشرة, وده هيساعد على تصغيرها, وهيقلل من ظهور ندبات حب الشباب, بالاضافة انه كمان يعتبر مضاد للالتهابات, وبيقلل التورم والاحمرار.

ولكن مع ذلك انتي محتاجة تدخلي الريتينول في روتينك بشكل تدريجي, ابدأي باستخدامه مرتين في الاسبوع في الشهر الاول, وبعدها ابدأي بزيادة الاستخدام ببطء, استخدميه بالليل قبل المرطب لافضل النتايج.

عادات يومية هتفرق مع بشرتك:

اتخلصي من الاجهاد: الاجهاد بيزود انتاج هرمون الكورتيزول, وده بيسبب انتاج غدد دهنية اكتر, وده بدوره هيأدي لانسداد المسام.

نضفي كل حاجة بتستخدميها: من خلال تنضيف ادوات المكياج او اي حاجة بتلمس بشرتك, عشان تمنعي نقل اي بكتيريا منها للبشرة وتتسبب في انسداد المسام, نضفي فرش مكياجك, شاشة تليفونك, وغيري اكياس المخدات بشكل اسبوعي.

لمس البشرة: في المتوسط تقريبا بنلمس بشرتنا اكتر من 3 مرات في الساعة, وده بينقل البكتيريا والاوساخ من الايد للبشرة, وهيزود من البثور, ويخليها ملتهبة اكتر وعرضة للندبات.

نظامك الغذائي: في ارتباط قوي بين نظامك الغذائي والجلد, لانه اثبت ان منتجات الالبان بشكل خاص بتأدي لظهور البثور بسبب الهرمونات اللي موجودة في اللبن, عشان كده الافضل تجنب الجبن وحليب البقر وحاولي تستبدليه بحليب اللوز او جوز الهند, وجبنة وزبادي نباتية, من الاطعمة التانية اللي المفروض تتجنبيها الفواكة المجففة, المشروبات الغازية, اللبن بالشوكولاتة, لان الاطعمة دي بتحتوي على نسبة عالية من السكر, واللي ممكن تسبب التهابات تأدي لجفاف الجلد وتهيجه.

علاجات منزلية لحب الشباب:

محلول ماريو بادسكو: المحلول ده فعال في تجفيف البثور بشكل سريع جدا, والتخفيف من البقع وتقليل الاحمرار والالتهابات, ولو مش متوفر في الصيدلية ممكن تستخدموا اكنيمايسين المحلول او الكريم.

قشر الموز: استخدمي قشر الموز وافركيه بشكل مباشر على البثور, سيبيه 30 دقيقة وبعدين اغسليه بالمية, كرري الطريقة دي مرتين في اليوم, قشر الموز غني بمكونات مضادة للالتهابات بالاضافة انه بيحتوي على انزيمات بتساعد على علاج الندبات.

مية الورد: تعتبر مثالية لعلاج حب الشباب لانها بتنضف البشرة من الاوساخ والزيوت.

محلول تقشير AHA 30% + BHA 2%: المقشرات دي بتستخدم في تقشير الجلد الميت وتنضيف المسام بعمق, وده بيساعد على علاج الندبات والبقع.

افضل 5 فيتامينات بتساعد على منع حب الشباب

افضل الفيتامينات لمنع حب الشباب
افضل الفيتامينات لمنع حب الشباب