8 عادات لتخسيس الوزن اي حد مبتدأ محتاج انه يحطها في اعتباره

ريهام محمود
ريهام محمود
1562

الدراسات اثبتت اهمية  النظام الغذائي وروتين الاكل, وان الاشخاص اللي انتظموا على دايت ووجبات بشكل صحي خسروا في المتوسط 3 كيلو بعد 12 اسبوع, والاهم من خسارة الوزن انها قللت من خطر الاصابة بمرض السكر وامراض القلب, وكلنا محتاجين اننا نمشي على روتين للاكل واننا نحافظ على العادات الصحية, من غير ما نحصر نفسنا في نوع معين من الاكل, والنهاردة من خلال موضوعنا هنعرف مع بعض 8 عادات لتخسيس الوزن, هتساعدك على التحكم في وزنك من غير ما تحرمي نفسك او تمشي على نظام قاسي.

عادات لتخسيس الوزن:

1- اشربي 9 كوبايات مية في اليوم:

اول حاجة, لازم تشربي كوباية مية قبل كل وجبة ب 30 دقيقة, والدراسات اثبتت ان شرب المية بيزود من فقدان الوزن بنسبة 44% على مدى 3 شهور.

وبننصح بشرب من 12 – 13 كوباية مية للرجال, و 9 كوبايات للنساء في اليوم, العادة دي بتساعد ان الجسم يحافظ على رطوبته وهتساعدك على التخلص من السموم اللي تعتبر العدو الاكبر لخسارة الوزن, بالاضافة ان المية هتقلل شهيتك وتخليكي تحسي بجوع اقل.

عادات لتخسيس الوزن 1
عادات لتخسيس الوزن 1

2- اعتمدي على الالياف:

الفاصوليا السوداء, براعم بروكسل, الافوكادو, البروكلي, التفاح, والجزر بتحتوي على عنصر خاص اسمه الالياف القابلة للذوبان, والنوع ده من الالياف مش بس بتحافظ على وزن الجسم, ولكن كمان مفيدة للصحة بشكل عام, لانها بتساعد على تقليل خطر الاصابة بالسكر وامراض القلب.

والدراسات اثبتت ان كل 10 جرام زيادة من الالياف دي, بيقلل نسبة الدهون في الجسم بنسبة 3.7%, عشان كده الابحاث بتوصي باستهلاك من 25 – 38 جرام منها في اليوم.

عادات لتخسيس الوزن 2
عادات لتخسيس الوزن 2

3- متقعديش قدام الاكلات اللي ممكن تغريكي:

ممكن الموضوع يبان بسيط, لكن كتير مننا مش بيعملوه, لو رايحة مكان متقعديش قدام اكلات ممكن تغريكي, لان شهيتك ناحيتها هتزيد وهتبقي عايزة تاكليها.

الافضل لما تروحي اي كافية او مطعم اختاري مكان يكون بعيد عن مواجهة الاكلات اللي ممكن تغريكي.

عادات لتخسيس الوزن 3
عادات لتخسيس الوزن 3

4- خدي كفايتك من فيتامين D:

ضوء الشمس ليه تأثير ايجابي على فقدان الوزن, وده بيحصل بسبب فيتامين D, واثبتت الدراسات ان في ارتباط ما بين ارتفاع نسبة فيتامين D وانخفاض الوزن.

وفي حالة انك ماخدتيش كفايتك من فيتامين D من ضوء الشمس, تقدري تستخدمي المكملات الغذائية, او القعدة في الشمس من 10 – 15 دقيقة كل يوم الصبح هيكون فعال جدا.

عادات لتخسيس الوزن 4
عادات لتخسيس الوزن 4

5- كلي مجموعة متنوعة من الاطعمة في الوجبة:

ممكن كتير خلال وجباتنا مش بننوع في الاطعمة او في الاصناف, وده بيخلينا بعد اكل وجبة كبيرة لسه بيكون في مكان اننا ناكل حلويات كمان.

عشان تهربي من الافراط في الاكل, الافضل انك تاكلي اجزاء صغيرة من اطعمة مختلفة في الوجبة الواحدة (زي المقبلات), هتلاقي نفسك انك استمتعتي بكل الاكل اللي موجود وفي نفس الوقت معدتك مش مليانة على الاخر, والافضل انك تستخدمي اطباق صغيرة, يعني مثلا وجبة الفطار حطي مجموعة اصناف مختلف في اطباق صغيرة بحيث انك تاكلي وجبة متكاملة وفي نفس الوقت بكمية صغيرة وباكلات متنوعة, بدل اكل صنف واحد بكمية كبيرة.

عادات لتخسيس الوزن 5

6- متشربيش الشاي مع اللبن:

ممكن في اوقات كتير تكوني واكلة وجبة العشا ولكن تحسي قبل ما تنامي انك عايزة تاكلي تاني, وفي بعض الاشخاص بيفضلوا شرب الشاي مع اللبن لتقليل الشهية بالليل, ولكن حسب الدراسات دي مش فكرة كويسة.

الباحثين صرحوا ان الشاي بيحتوي على مستويات عالية من المركبات اللي بتساعد على تقليل الدهون, ولما تضيفي عليه اللبن البروتينات اللي موجودة في اللبن بتلغي القدرة دي اللي موجودة في الشاي على مكافحة الدهون, عشان كده لو انتي عايزة تقتلي الشعور بالجوع بالليل, كل اللي هتعمليه انك تشربي كوباية شاي من غير لبن.

عادات لتخسيس الوزن 6

7- خدي استراحة بين كل معلقة والتانية:

الجسم ممكن يحس بالشبع فورا, ولكن العقل في العادة بياخد حوالي 20 دقيقة, ومن هنا هنعرف ضرورة الاكل ببطء.

حاولي انك بين معلقة والتانية او كل لقمة والتانية تاخدي استراحة, ده هيساعد على مد وقت الوجبة بتاعتك وهيمنعك تاكلي زيادة, لانك هتدي فرصة للعقل توصله اشاره ان الجسم مش محتاج اكل تاني ويوقف الاكل.

عادات لتخسيس الوزن 7

8- اقسمي وجبتك مع شخص لو هتاكلي بره:

تقسيم الوجبات والمقبلات مع شخص تاني تعتبر حيلة كويسة جدا, لان ده هيخليكي تاكلي كمية اكل اقل, لما تروحي اي مكان اطلبي وجبة واحدة وطبقين واقسمي وجبتك مع الشخص اللي معاكي, وبكده بعد ما تخلصي وجبتك مش هتحسي بالذنب لو اكلتي قطعة حلويات صغيرة بعد الوجبة.

عادات لتخسيس الوزن 8

مقالات متعلقه

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

7 اطعمة ابعدي عنهم تماما لو بتحاولي تخسري وزن

7 اطعمة ابعدي عنهم تماما لو بتحاولي تخسري وزن

وصفات لسد الشهية وتخسيس الوزن

وصفات لسد الشهية وتخسيس الوزن