ازاي تعالجي الم الضهر من غير تمارين ب 6 اوضاع سهلة
كتير من الاشخاص بيشتكوا من آلام الضهر الحادة تقريبا بشكل يومي, وده ممكن يبقى سببه ساعات الشغل الطويلة, القعدة فترات طويلة قدام الكمبيوتر, كل ده ممكن يسبب اضرار في الجسم, ولعلاج الالم ده في اكتر من طريقة ممكن تاخدي مسكنات الالم من الصيدلية او علاج دائم او ممارسة التمارين الرياضية بانتظام, واكيد مش الكل بيبقى عنده الوقت لممارسة الرياضة او الاعتماد على الادوية, وكبديل هنقولك النهاردة اوضاع لعلاج آلام الضهر اللي ممكن تجربيهم بسهولة وهتساعدك في تخفيف الالم.
اوضاع لعلاج آلام الضهر:
1- الوضع (1):
الوضع ده بيساعد على استرخاء عضلات الضهر وبيخلص الجسم من التوتر والتشنجات.
– نامي على ضهرك بشكل مريح.
– اتني الركبتين ولفيهم في جنب واحد, وحركي الجزء اللي فوق من الجسم للجنب التاني, ولو انتي لسه مبتدئة ممكن متلفيش الجزء اللي فوق من الجسم, وتحافظي عليه ثابت ومستقيم.
– واتأكدي من انك مترفعيش الفخد او الضهر, وخليه مستوي في خط واحد مع الارض او السطح اللي نايمة عليه.
– اثبتي على الوضع ده لمدة من 2 – 3 دقايق, وبعدين بدلي للجنب التاني.
– كرري الوضع ده لمدة دقايق, وهتحسي بالفرق بشكل فوري, ممكن كمان انك تحطي فوطة تحت الركبتين عشان يبقى في دعم وراحة اكتر.
2- الوضع (2):
الوضع ده في عالم اليوجا معروف باسم الكوبرا او ابو الهول, وبيساعد على علاج الم الضهر وتقوية منطقة البطن.
– نامي على بطنك, وخلي رجليكي الاتنين جنب بعض.
– خلي الكوعين مسندوين على الارض تحت منطقة الكتفين, وارفعي وشك لفوق.
– حافظي على استرخاء الكتفين, ولكن حاولي رفع العمود الفقري مع انخفاض الجزء السفلي من جسمك.
– اثبتي على الوضع ده لمدة دقيقتين.
– كرريه من 4 – 5 مرات.
افتكري انك متبالغيش في الحركة, يعني اعملي تمدد للجسم على قد ما تقدري وجسمك يتحمل لكن متضغطيش على الجسم زيادة عن اللزوم.
3- الوضع (3):
الوضع ده بيساعد على تخفيف آلام الضهر واسفل الضهر.
– نامي على ضهرك واتني ركبتك.
– حافظي على القدمين مسطحين على الارض.
– اسحبي ركبة واحدة ناحية الصدر والتانية تفضل في مكانها ثابتة ومستقيمة.
– اثبتي على الوضع ده لمدة ثواني, وكرريه من 3 – 4 مرات.
– بدلي للركبة التانية واعملي نفس الحركة.
لما هتعلمي الحركة دي وزن جسمك هيتركز حوالين ضهرك, وده هيعمل تدليك طبيعي للعضلات المتشنجة.
4- الوضع (4):
الوضع ده بيعمل استريتشينج للفخدين والوركين, وده بيساعد على تقليل التوتر والشد اسفل الضهر.
– نامي على ضهرك, واتني الركبتين.
– حطي الرجل اليمين على ركبتك الشمال, بحيث انك تعملي رقم “4”.
– امسكي رجلك الشمال وحاولي تسحبيها ناحية الصدر.
– اثبتي على الوضع ده لمدة دقايق, وبعدين بدلي للجنب التاني.
– كرريه على قد ما تقدري او حسب ما تلاقي نفسك ارتاحتي.
والوضع ده يعتبر من اكتر الاوضاع الفعالة, اللي بتساعد في علاج آلام الضهر الناتج عن ساعات جلوس كتير في وضعية واحدة.
5- الوضع (5):
– اقعدي على الارض قعدة مريحة ورجليكي مفرودة على الارض.
– ابعدي رجليكي عن بعض شوية.
– اتني جسمك وخلي راسك لتحت وحاولي تلمسي القدمين بايديكي.
– اثبتي على الوضع ده لمدة ثواني مع اخد انفاس عميقة.
الوضع ده هيساعد على تمدد عضلات الضهر, وهيريحها ويخفف الالم.
والوضع ده تقدري تعلميه بشكل مريح اكتر باستخدام مخدة, هاتي فوطة طبقهيا وحطيها تحت منطقة الركبتين, وحطي مخدة في حضنك لدعم اكتر, وانحني بجسمك لقدام, واحضني المخدة, والحركة بالطريقة دي ممكن كمان انها تساعد على تهدئة اعصابك.
6- الوضع (6):
– اقعدي على الارض مع تني الركبتين.
– وانزلي بجسمك وراسك لتحت, وايدك مفرودة قدامك.
– اثبتي على الوضع ده لمدة دقايق.
– كرريه على قد ما تقدري او لحد ما تحسي انك ارتاحتي.
وبالنسبة للمبتدئين, الوضع ده يعتبر اسهل وضع, بيساعد على تقوية العمود الفقري وبيسكن الم عضلات الضهر.
مفيدين أفضل 4 تمرينات شد للرجل foot stretches لازم تعمليهم كل يوم
