10 اسرار ليه اجسام الآسيويين رشيقة ومثالية

ريهام محمود
ريهام محمود
35431

الآسيويين معروفين انهم من انحف الاجسام, وده ممكن يكون داخل فيه جزئية الجينات والوراثة, ولكن ده مش السبب الوحيد لان العادات بتاعتهم ليها دور كبير في الحفاظ على لياقتهم البدنية, والنهاردة من خلال موضوعنا هنشارك معاكم اسرار رشاقة الآسيويين, وازاي بيحافظوا على لياقتهم البدنية من غير نظام غذائي قاسي او تمارين مرهقة.

اسرار رشاقة الآسيويين:

1- موقفهم او طريقة نظرتهم للاكل:

بصرف النظر عن جودة وكمية الاكل, موقفك منه بيأثر على جسمك, في ناس كتير بيتعاملوا مع الاكل انه مش مجرد حاجة طبيعية محتاجها الجسم, ولكن بيوصل انه متعة حياتية عندهم, ولكن الآسيويين بيتعاملوا مع الاكل بطريقة مختلفة هما اكيد بيحبوا الاكل  زيهم زي اي شخص عادي طبيعي, ولكن في النهاية هما بيبصوا للاكل انه مجرد وسيلة للحفاظ على الحياة وعلى صحتهم سليمة.

اسرار رشاقة الآسيويين 1
اسرار رشاقة الآسيويين 1

2- كمية الاكل:

الآسيويين بشكل عام بيفضلوا تناول كمية صغيرة من الاكل, ممكن يختاروا اكتر من نوع اكل عشان يجربوا كل حاجة ولكن بكميات صغيرة.

والدراسات اكدت انه تقليل ولو حتى جزء صغير من كمية اكلك ممكن انه يساعد في تخسيس الوزن, وعلى حسب تجربة اتعملت على مجموعة من الاشخاص بتقديم ليهم كمية صغيرة من الاكل في وجبة الغدا وفي نفس الوقت اكلوا كل اللي هما عايزينه خلال باقي اليوم, كانت النتيجة انهم فقدوا وزن حوالي 500 جرام في اسبوعين, والتجربة دي كمان بتثبت خطأ المعتقد ان الشخص هيعوض عجز السعرات الحرارية عن طريق اكل كميات اكتر.

اسرار رشاقة الآسيويين 2
اسرار رشاقة الآسيويين 2

3- طريقة الطبخ:

المطبخ الآسيوي اكيد بيحتوي على كتير من الاطعمة المقلية, ولكن طريقة القلي تعتبر مش من الطرق الاكتر استخدام للطبخ عندهم, اغلب وصفاتهم تقريبا بتعتمد على الطبخ على البخار او السلق, وده معناه ان جسمهم مش بيدخل فيه دهون كتير اللي تعتبر من اكتر اسباب زيادة الوزن.

اسرار رشاقة الآسيويين 3
اسرار رشاقة الآسيويين 3

4- الاطعمة المخمرة:

شوربة الميسو, الكيمتشي, ناتو فول الصويا, دي بعض الاطعمة الآسيوية المخمرة اللي تعتبر اساسية على المائدة الآسيوية, والاطعمة دي تعتبر بروبيوتيك طبيعي, واكلها بيساعد على فقدان الوزن, وخصوصا فقدان الدهون اللي بتتراكم حوالين منطقة البطن.

اسرار رشاقة الآسيويين 4
اسرار رشاقة الآسيويين 4

5- السي فود:

صعب تخيل المطبخ الآسيوي من غير السمك والسي فود اللي بتحتوي على احماض اوميجا 3 الدهنية المتعددة غير المشبعة, بالاضافة لفوايدها على الجهاز المناعي والاوعية الدموية والتناسلية, والاوميجا 3 بتساعد على فقدان الوزن.

الباحثين عملوا تجربة لمدة 3 اسابيع اظهرت ان في ظل نفس الظروف (تقييد السعرات الحرارية وممارسة التمارين الرياضية بانتظام) ان المجموعة اللي اخدت كبسولات اوميجا 3 فقدت حوالي 1.5 كجم اكتر من المجموعة اللي اخدت علاج بديل.

اسرار رشاقة الآسيويين 5
اسرار رشاقة الآسيويين 5

6- الكتير من الخضروات:

زي ما قولنا فوق ان نادرا تبقى في كميات كبيرة من الاكل في الاطباق الآسيوية, ولكن ده مش بينطبق على الخضروات, وخصوصا الخضروات اللي لونها اخضر, بياكلوا منه بكميات كبيرة.

اسرار رشاقة الآسيويين 6
اسرار رشاقة الآسيويين 6

7- الشاي بدل المية الباردة:

على عكس الاوربيين والامريكيين, عادة الآسيويين مش بيشربوا بعد الاكل المية الباردة او الصودا ولكن بيشربوا شاي اخضر, المعروف انه بيساعد على فقدان الوزن, ده غير انه ثبت ان المية الباردة خصوصا مع الاطعمة الدهنية بيأدي لابطاء عملية الهضم وممكن نتيجة لده يأدي لزيادة الوزن.

اسرار رشاقة الآسيويين 7

8- الحلويات والوجبات الخفيفة الصحية:

في آسيا مشهور عندهم جدا والاكتر شعبية الحلويات والوجبات الخفيفة اللي بتعتمد بشكل اساسي على الارز والاعشاب البحرية والفاصوليا الحمرا, وكمان المكسرات والبذور والفواكه, واكيد المكونات دي كلها صحية اكتر من الكوكيز, الشيبسي, والكيك.

اسرار رشاقة الآسيويين 8

9- المشي:

المشي عندهم مرتبط بالكثافة السكانية العالية, لان سكان المدن الكبيرة عادة بيستخدموا وسائل النقل العامة بدل عربياتهم عشان الزحمة, ده غير انهم بيعيشوا في شقق صغيرة على مسافة قريبة من المناطق اللي فيها المحلات والمغاسل والاماكن العامة التانية, بسبب ده الشخص الآسيوي العادي بيمشي مسافة اطول يوميا من الشخص الامريكي اللي بيتحرك على طول بعربيته الخاصة.

اسرار رشاقة الآسيويين 9

10- التمارين والتأمل:

الطب الآسيوي التقليدي بيلاقي الاهتمام والاولوية للوقاية من الامراض وللقضاء على جذور المرض, وده السبب الرئيسي لممارسة التأمل, التاي تشي, وغيرها من الانشطة بشكل واسع في آسيا لمنع تطور بعض الامراض, بما فيهم السمنة.

اسرار رشاقة الآسيويين 10

تمرين لمدة دقيقة واحدة بس لبطن مسطحة:

كل اللي هتحتاجيه هو سطح تقدري تعتمدي عليه زي (الترابيزة) ودقيقة واحدة من وقتك.

ازاي تعمليه:

– اقفي بشكل مستقيم وضهرك للترابيزة, خلي الكتفين مفرودين, ارفعي دقنك زي ما هو باين قدامنا في الصورة.

– ارفعي ايدك الاتنين لفوق وافرديهم ووصليهم لاعلى نقطة مع التبديل بين الايد اليمين والشمال, يعني ارفعي الايد الاتنين ولكن خلي ايد مرخية شوية والتانية شديها وصليها لاعلى نقطة وبعدين بدلي للايد التانية.

– لفي بجذعك ناحية اليمين (مع الحفاظ على القدمين في وضعهم الاصلي) والمسي الترابيزة بايدك, وكرري نفس الحركة للناحية الشمال.

– كرري التمرين ده كل يوم لمدة دقيقة واحدة بس, وهتلاحظي النتايج الاولية في اقل من اسبوع.

اسرار رشاقة الآسيويين 11

طريقة التمرين بالفيديو:

اعرفي ازاي تعملي دايت الخيار السهل والصحي لخسارة 10 كيلو في 10 أيام

اعرفي ازاي تعملي دايت الخيار السهل والصحي لخسارة 10 كيلو في 10 أيام
اعرفي ازاي تعملي دايت الخيار السهل والصحي لخسارة 10 كيلو في 10 أيام

مقالات متعلقه

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

7 اطعمة ابعدي عنهم تماما لو بتحاولي تخسري وزن

7 اطعمة ابعدي عنهم تماما لو بتحاولي تخسري وزن

وصفات لسد الشهية وتخسيس الوزن

وصفات لسد الشهية وتخسيس الوزن