8 اجزاء في الجسم ممكن تقول كتير عن شخصيتك
على الرغم من ان بناء جسمنا بيعتمد على الحمض النووي الخاص بينا (الوراثة), ولكن مازال في اجزاء من جسمك ممكن انها تنقل كتير عن شخصيتك, والنهاردة من خلال موضوعنا هنشوف مع بعض 8 اجزاء في الجسم بتحلل شخصيتك وممكن تقول عنها حاجات وتفاصيل كتير.
اجزاء في الجسم بتحلل شخصيتك:
1- شكل الانف:
كل انف ليه الشكل الخاص بيه, وحسب الدراسات اللي عملتها مجلة جراحة الوجة لعام 2013, ان الانسجة اللي بتربط عضم وبتشكل الانف ممكن انها تنقل حاجات كتير عن شخصيتك, والباحثين درسوا حوالي 1700 صورة لانوف الاشخاص وصنفوها كلها في 14 نوع, وحللوا اشكال الانف ونشروا النتايج.
– الاشخاص اصحاب الانف الطويل: بيكونوا طموحين جدا في حياتهم المهنية, وبيشتغلوا بجدية جدا, وبيميلوا دايما ان كل حاجة تكون كاملة ومثالية اوي, وعادة بيحطوا حياتهم المهنية في المرتبة الاولى وحياتهم الشخصية في المرتبة التانية, على عكس الاشخاص اللي بيتميزوا بشكل انف اقصر بيكونوا اشخاص حساسين ومخلصين جدا, وبيقدروا المشاعر اكتر من اي حاجة تانية, وبيفضلوا انهم يكونوا سعدا في حياتهم الشخصية والاسرية اكتر من ان يكون عندهم حياة مهنية او عملية ناجحة.
– الاشخاص اصحاب الانف المدببة: الاشخاص اللي شكل انفهم مدبب مناسبين جدا للمناصب المالية زي مستشارين ماليين مثلا, وده لانهم بيتعاملوا مع اموالهم بحكمة جدا وبيعرفوا يديروها كويس, على عكس الاشخاص اللي انفهم بتكون مشقوقة من النص عندهم مشاكل في الالتزام.
– الاشخاص اصحاب فتحات الانف الكبيرة: دي علامة ان الشخص ده بيحب انفاق المال بدل ادخاره او حفظه, واصحاب فتحات الانف الصغيرة بيكونوا اشخاص عندهم التزام قوي بالعلاقات الشخصية والعائلة.
2- شكل الوجه:
الوجه هيكل معقد جدا وممكن يقول كتير عن الصفات الشخصية, لدرجة ان في علم الانثروبولوجيا الاجرامية, كل نوع من الجرايم ممكن تحديده من خلال بنيه وجه الشخص يقدروا يحددوا نوع الجريمة اللي ممكن يعملها.
والدراسات اثبتت ان اصحاب الوجوه الطويلة معروف عنهم انهم اذكياء جدا, والاشخاص اللي بنية وشهم نحيفة عطوفيين اكتر من انهم اذكياء, والدراسة اثبتت كمان ان الاشخاص اصحاب الوجوه العريضة شخصيتهم بتميل للتحيز او التعصب, وغير عطوفيين, وناجحين جدا في حياتهم.
3- لون العين:
لما شكسبير قال جملتة المشهورة اللي بتقول “العيون هي النافذة لروحك”, مكنش يتوقع ان بعد قرون ان العلماء هيدعموا ويأكدوا كلامه بالادلة الواقعية, والعلماء في جامعة السويد عملوا دراسات على عيون 428 شخص, عشان يشوفوا اذا كان فعلا عيونهم بتعكس شخصياتهم ولا لا.
وقالوا من خلال ابحاثهم ان الشخصية وهيكل العين مرتبطين بالفص الجبهي للمخ المسؤول عن تكوين شخصيتنا.
– الاشخاص اصحاب العيون البنية الكبيرة: هما مولودين قادة بالفطرة يعني مناسبين جدا للمناصب القيادية, واذكياء جدا, والاشخاص اللي عيونهم بني غامق اوي شخصيتهم بتتميز بالانطواء والغموض والسرية.
– الاشخاص اصحاب العيون الزرقا والقزحية المنحنية: بيتمتعوا بقدر كبير من القوة الداخلية, وشخصيتهم بتكون تنافسية جدا, اما الاشخاص اللي عيونهم ازرق غامق بيتميزوا بالقوة البدنية العالية وبيكونوا حساسين جدا.
– الاشخاص اصحاب الون العيون الغامقة: الاشخاص اللي عيونهم غامقة بشكل عام شخصيتهم بتتميز بالغموض, على عكس الاشخاص اللي عيونهم افتح بيكونوا اجتماعيين ومنفتحين اكتر.
4- شكل العين:
العين مراية الشخص, ممكن انك مجرد ما تبص لعيون شخص تعرف اذا كان حزين, سعيد, غضبان, بيمر بحالة عاطفية معينة, ولكن اللي متقدرش تعرفه من مجرد النظر للعين هو صفات شخصيته, ومن الاف السنين اعتقد خبراء قراءة الوجه ان شكل العين ممكن تظهر بدقة الصفات الخفية لشخص ما, بسبب الهيكل العظمي للجمجمة.
– الاشخاص اصحاب العيون الواسعة: بيميلوا انهم بيكونوا اكتر تعبير عن اللي جواهم وعاطفيين في حياتهم الشخصية, وشخصيتهم بتتميز بالحذر الشديد بشكل عام.
– الاشخاص اصحاب العيون الكبيرة: بتميل انها تكون منفتحة الذهن, ذكي , وودود.
– العيون اللي حجمها صغير وواسعة: بيميلوا للكمال في كل حاجة.
– العيون العميقة: الاشخاص اصحاب العيون العميقة بيميلوا انهم يكونوا غامضين, وملتزمين, وانفعاليين.
– العيون اللوزية: الاشخاص اصحاب العيون على شكل لوزة بيكونوا عاطفيين ورومانسيين, على عكس الاشخاص اللي عيونهم ضيقة بيكونوا اشخاص انفعاليين واصحاب شخصية صارمة او صلبة.
5- الشفايف:
شفايفنا مش بس ليها رسمة مميزة وخاصة بينا زي صوابعنا, ولكن هي ممكن كمان تكشف كتير عن صفاتنا الشخصية, واكتشف واحد من خبراء قراءة الوجه ان الشفايف بتأثر على شخصيتك وبالطريقة اللي بتحسي بيها ناحية اللي حواليكي وطريقة تصرفاتك, والشفايف بتظهر الجانب العاطفي من شخصيتك وازاي بتتصرفي في علاقاتك الشخصية.
– الاشخاص اصحاب الشفايف متوسطة الحجم: الشفايف اللي حجمها متوسط ومافيهاش تفصيل كتير اصحابها بيكونوا مستقلين في علاقاتهم, وبيقدروا المحبة, وبيكرهوا الدراما في الحياة.
– اصحاب الشفايف الكبيرة: بيميلوا انهم اشخاص بيدوا اهتمام ورعاية للي حواليهم, وبيحطوا احتياجات ومتطلبات كل الناس قبل احتياجاتهم هما شخصيا.
– الاشخاص اصحاب الشفايف العريضة: بتكون شخصية كريمة جدا, وبتلبي احتياجات كل الناس اللي بتحبهم.
– الاشخاص اصحاب الشفايف الرقيقة: شخصياتهم بتتميز بالتنافس, بيحبوا الوحدة بيفضلوا في اوقات كتير انهم يقضوا وقت لوحدهم اكتر من انهم يقضوه مع اشخاص تانيين, ولكن اللي حواليهم بيحبوا يتقربوا منهم بسبب صفاتهم الشخصية القوية.
6- عضم الخد:
عضم الخد البارز او المتحدد واحدة من اكتر المميزات الجذابة في وش الشخص, ومع ذلك الاشخاص اصحاب عضم الخد السميك والوجوه العريضة بييملوا انه بيكون عندهم مستويات اعلى من هرمون التستوستيرون, وحسب الدراسات ان الاشخاص اللي عضم الخد عندهم بارز ومستويات هرمون التستوستيرون عالي بيتميزوا بشخصيات عدوانية اكتر وبيكونوا اكتر عرضة انهم يبقوا اشخاص عنيفين, بالاضافة ان الاشخاص اللي عندهم عضم الخد بارز بيكونوا اكتر تكبر او غرور.
والدراسات اثبتت ان كل ما الشخص عضم الخد عنده كان متحدد وبارز اكتر, كل ما كانت شخصيته انفعالية او قوية اكتر بسبب ارتفاع مستويات هرمون التستوستيرون.
7- الصوابع:
هل بصيتي لصوابعك قبل كده وسألتي نفسك ليه الصوباع اللي في النص اطول من صوباعك السبابة او العكس؟ الدراسات اثبتت ان طول الصوابع بتحدد مستويات هرمون التستوستيرون اللي اتعرضتي له وانتي جنين في الرحم.
– لو صوباعك اللي في النص اطول من السبابة: ده معناه انك شخص جذاب وبتميل للمخاطرة في كل حياتك الشخصية والمهنية.
– لو الصوباع السبابة اطول من الصوباع اللي في النص: ده معناه انك شخص قائد بالفطرة.
– لو الصوباع اللي في النص والصوباع السبابة نفس الطول: ده معناه انك شخص عندك قدرات تواصل عالية, وبيعرف يحافظ كويس على التوازن في حياته.
8- الايد:
مش الصوابع بس اللي ممكن تقولنا حاجات كتير عن شخصيتنا ولكن كمان الايدين حسب الاكاديمية الامريكية لتحليل اليد, ان كل ايد ليها بنية فريدة اللي تقريبا مستحيل تكون شبه ايد اي شخص تاني, بالظبط زي الصوابع والشفايف, الايد ليها البنية الخاصة بكل شخص.
وافضل طريقة لتحليل اليد رفع الايد اللي انتي بتشوفي انها اقوى عندك وخلي راحة اليد مواجهة ليكي.
لو صوابعك بعيدة عن بعض (اكتر من 0.5 سم), ده معناه انك شخص بيحب الاستكشاف وتجربة حاجات جديدة.
لو صوابعك قريبة من بعض (اقل من 0.5 سم), ده معناه انك شخص حذر ومنظم جدا.
ايه رأيكم بالنتايج دي؟ يا ترى حللت شخصياتكم صح ولا لا؟ شاركونا بالتعليقات.
