12 علامة تقولك انك مش بتاكلي بما فيه الكفاية..اسبابه وطريقة علاجه

بقلمريهام محمود فيصحة visibility745

بعض الاشخاص ممكن انهم يتخطوا بعض وجبات الطعام في حالة المرض مثلا, وغيرهم ممكن يبذلوا اقصى مجهود عندهم ويقاموا رغبتهم في الاكل عشان يحافظوا على لياقتهم ورشاقتهم, وفي بقى الاشخاص اللي ممكن ينسوا الاكل تماما بسبب جدول مواعيدهم المليان وانشغالهم, وبغض النظر عن السبب في النهاية النتيجة واحدة وهي انك مش بتاكلي كفاية, وده ممكن يكون ليه عواقب على جسمك, والنهاردة من خلال موضوعنا هنقولك علامات تدل على نقص الاكل.

لسوء الحظ ان في ناس كتير بيفكروا ان قلة الاكل, بيدي جسمهم او نظامهم راحة وبيساعد على تعزيز النحافة والحفاظ على اللياقة البدنية للجسم, ولكن مع ذلك, قلة الاكل زي الافراط في الاكل, ليها تأثيرات سلبية على الجسم.

وللاسف اوقات كتير ممكن متعرفيش انك مش بتاكلي كفاية, خصوصا مع الانشغال الكتير خلال اليوم, عشان كده احنا هنساعدك بال 12 علامة اللي هنعرفهم دلوقتي مع بعض.

علامات تدل على نقص الاكل:

1- دايما هتحسي بالارهاق, وان مستويات الطاقة عندك منخفضة, وبتحسي انك مش عايزة تعملي اي حاجة ولا تقومي من مكانك.

2- هتعاني من الامساك بشكل منتظم.

3- هتعاني من الجوع المستمر, ودايما هتحسي انك عايزة تاكلي اي حاجة.

4- هيحصل تقلب في المزاج, وهتلاقي نفسك بتتعصبي بسرعة وبسهولة.

5- مستويات تركيزك هتبقى ضعيفة, وهتلاقي نفسك مش قادرة تركزي في اي حاجة لفترة طويلة.

6- هتحسي احيانا بالدوخة والضعف.

7- هيحصل عدم انتظام في الدورة الشهرية, وممكن كمان توصل انها تنقطع خالص او لفترات طويلة.

8- مش هيبقى عندك قدرة على الحمل.

9- هتحسي بالعطش طول الوقت.

10- هتحسي بالبرد طول الوقت, حتى لما تكون درجات الحرارة عالية.

11- هتعاني من تساقط الشعر, هشاشة وتكسر الاظافر.

12- بشرتك هتبقى باهتة ولونها شاحب.

واكيد طبعا فقدان الوزن يعتبر علامة واضحة جدا انك مش بتاكلي كويس, ولكن فقدان الوزن ليه اسباب تانية كتير, عشان كده احنا مش حاطينه مع ال 12 علامة الحيوية اللي احنا قولناها.

وخبراء التغذية بيأكدوا ان جسم الانسان ذكي جدا وقادر انه يدي اشارات لما يحصل على كمية الاكل اللي لزماه عشان يحافظ على صحته مقارنة بوقت جوعه.

يعني لما الجسم بياخد كفايته من الاكل, هيحس فورا بالحيوية والنشاط, وهيكون قادر على التركيز والقيام بكل المهام ومش اي هيواجه اي رغبة شديدة في تناول الطعام لانه هيكون راضي تماما.

على العكس الناحية التانية, هتتعرضي بشكل متكرر للحرقة, والارهاق, والرغبة الشديدة في الاكل, وهتعاني من تقلبات الوزن, ودي كلها علامات واضحة ان جسمك مش واخد كفايته من الاكل.

علامات تدل على نقص الاكل
علامات تدل على نقص الاكل

ايه سبب قلة الاكل؟

خبراء التغذية صرحوا ان قلة الاكل او النقص في تناول الطعام ده ممكن يكون ليه كذا سبب, منها التقيد بعدد سعرات حرارية معينة او ممارسة الرياضة طول الوقت للحفاظ على الوزن, وفي نفس الوقت تكون السعرات الحرارية مش بتدي الجسم الطاقة اللي لزماه, بمعنى انك بتبذلي مجهود كبير ومش بتعوضي قصاده بكمية اكل كفاية, وده اكيد هيأدي لانقاص وزن وهيسبب كل الحاجات اللي احنا قولناها فوق.

يعني لو ماشية على نظام غذائي منخفض السعرات الحرارية حتى لو كان مغذي فهو في النهاية هيأدي لنقص في الاكل.

علامات تدل على نقص الاكل

تعملي ايه عشان تصلحي ده؟

اول حاجة المفروض تعمليها لو بتعاني من علامات نقص الاكل, انك تستشيري دكتور متخصص.

لازم تركزي على تحسين نظامك الغذائي, وممكن كعامل مساعد تاخدي مكملات غذائية للحصول على المواد الغذائية اللي مش بتحصلي عليها من الاكل.

دخلي في نظامك الغذائي اطعمة غنية بالدهون الصحية, ممكن تاكلي وجبات خفيفة مغذية وغنية بالطاقة للحفاظ على صحتك, ومن الوجبات الخفيفة اللي ممكن تعتمدي عليها طبق مكسرات صغير,  سموزي بالمكسرات, زبادي بالفاكهة, او جرانولا.

في النهاية طول ما انتي بتلبي احتياجاتك اليومية من الطاقة, مش هتتعرضي لاعراض نقص الاكل, عشان كده بنقولك لازم تاخدي بالك من صحتك وتاكلي كويس اكل صحي ومغذي.

ايه اللي هيحصل لجسمك لو شربتي مية الزبيب كل يوم الصبح اول ما تصحي من النوم

فوايد صحية للزبيب