11 طريقة لتقليل الم ازالة الشعر بقدر الامكان

ريهام محمود
ريهام محمود
في
بشرة
8800

ازالة الشعر سواء بالسويت او الشمع او المكنة ايا كانت الوسيلة اللي بتستخدميها, الحاجة المشتركة بينهم كلهم هي الالم, والنهاردة من خلال موضوعنا هنشارككم طرق تقليل الم ازالة الشعر الزائد بقدر الامكان.

طرق تقليل الم ازالة الشعر:

1- استخدمي رغوة او كريم للجسم لازالة اكتر سلاسة:

لو هتعتمدي على المكنة كوسيلة لازالة الشعر, استخدمي رغوة او كريم على المناطق اللي هتشيلي منها الشعر, عشان الشعر والجلد يكون اكتر نعومة ويسهل عليكي عملية الازالة, لو انتي عايزة تتجنبي الالم اكيد لازم تتجنبي الحلاقة على بشرة جافة, لان ده بيخلي ازالة الشعر اصعب, حطي الرغوة او الكريم على البشرة وابدأي في عملية ازالة الشعر.

طرق تقليل الم ازالة الشعر 1
طرق تقليل الم ازالة الشعر 1

2- حاولي ازالة الشعر اثناء الشاور باستخدام مكنة مضادة للمية:

يمكن قليل من البنات يعرفوا ان افضل طريقة لازالة سريعة ومش مؤلمة هي انك تزيلي الشعر اثناء الشاور بجهاز ازالة الشعر المضاد للمية, لان اثناء الشاور الشعر بيكون اكتر ليونة والمسام مفتوحة, وده هيخلي ازالة الشعر اسهل وبألم اقل, بالاضافة ان مكنة ازالة الشعر بتشتغل بالبطاريات يعني تعتبر وسيلة عملية لان هتقدري تاخديها معاكي اي مكان واثناء سفرك.

طرق تقليل الم ازالة الشعر 2
طرق تقليل الم ازالة الشعر 2

3- استخدمي سكراب او جوانتي السبا لعمل تقشير قبل ايام من ازالة الشعر:

عملية التقشير قبل ايام قليلة من ازالة الشعر بتساعد على ازالة الجلد الميت, وممكن انها تخرج كل الشعر اللي تحت الجلد, وده هيخلي الازالة اسهل ومش مؤلمة, ممكن تعملي مقشر طبيعي في البيت بخلط سكر مع الشاور جل بتاعك او زيت زيتون لتنعيم المنطقة وازالة الجلد الميت, استخدمي جوانتي حمام, او ليفة مغربية, او سفنجة, او ايديكي لعمل تقشير خفيف على المناطق المشعرة قبل يومين او تلاتة من ازالة الشعر.

طرق تقليل الم ازالة الشعر 3
طرق تقليل الم ازالة الشعر 3

4- زيلي الشعر على مراحل او قصه قبل الازالة:

ممكن تستخدمي طريقة ازالة الشعر على مراحل يعني تزيلي الشعر بالمكنة وبعدها بيومين او تلاتة تجربي انك تزيلي الشعر تاني باي طريقة ازالة تانية, يعني جربي تشيلي الشعر كل كام يوم لحد ما تتخلصي منه كله, دي هتكون طريقة سهلة ليكي لان بتقللي من كمية الشعر كل مرة وبالتالي الالم بيقل, او تقصي الشعر قبل ما تبدأي في عملية الازالة لتفادي الم سحب الشعر الطويل.

طرق تقليل الم ازالة الشعر 4
طرق تقليل الم ازالة الشعر 4

5- استني من 6 – 8 ساعات بعد شرب القهوة او الصودا:

بما ان الكافيين منشط, فشرب مشروبات الكافيين قبل ازالة الشعر على طول ممكن انه يزود الاحساس بالالم, عشان كده الافضل انك تستني لما الكافيين كله يخرج من نظامك او جسمك قبل بداية عملية ازالة الشعر.

طرق تقليل الم ازالة الشعر 5
طرق تقليل الم ازالة الشعر 5

6- خدي شاور دافي قبل ازالة الشعر:

البخار السخن والمية الدافية بتفتح مسام البشرة وبتنعم الشعر, فلو اخدتي شاور قبل ازالة الشعر على طول, هتلاحظي الفرق الكبير بنفسك فورا اثناء عملية الازالة, الالم هيكون اقل بكتير والشعر هيتشال بسهولة اكبر.

طرق تقليل الم ازالة الشعر 6
طرق تقليل الم ازالة الشعر 6

7- كل ما زاد عدد الملاقط في جهاز ازالة الشعر, قل الالم:

لو بتستخدمي جهاز ازالة الشعر للتخلص من الشعر الزائد, اختاري الجهاز اللي بيحتوي على عدد ملاقط اكتر, لان الاجهزة دي بتستخدم عدد ضربات او نبضات اقل فوق المنطقة المشعرة, لانها بتشيل عدد كبير من الشعر في المرة الواحدة, بالطريقة دي هتتجنبي الالم والتهيج.

طرق تقليل الم ازالة الشعر 7

8- الضغط على المنطقة المشعرة:

كلنا تقريبا عارفين طريقة تمدد او شد الجلد لازالة الشعر, ولكن الخدعة الاقل الم لازالة الشعر هي بدل مد او شد الجلد الضغط عليه, الطريقة دي اسهل بكتير واقل الم, كل اللي عليكي تعمليه اضغطي على المنطقة اللي عايزة تشيلي منها الشعر باستخدام صوابعك السبابة والابهام مع بعض, بالطريقة دي بتعملي حظر او منع لمستقبلات الالم وهتقدري توصلي للشعر بسهولة من خلال مكنة ازالة الشعر, وده هيخلي النبضه او الضربة بتاعة المكنة مش مؤلمة.

طرق تقليل الم ازالة الشعر 8

9- اتجنبي ازالة الشعر مباشرة قبل او اثناء الدورة الشهرية:

بسبب ارتفاع مستويات الهرمونات, الجسم بتكون حساسيته اعلى قبل واثناء فترة الدورة الشهرية, عشان كده افضل وقت لازالة الشعر هو بعد انتهاء الدورة الشهرية ب 3 – 4 ايام, خلال الفترة دي ازالة الشعر هتكون اقل الم, ولكن مع ذلك ده ممكن يختلف من جسم للتاني.

طرق تقليل الم ازالة الشعر 9

10- التخلص من التوتر والتنفس بشكل صحيح:

اثناء عملية ازالة الشعر, زي بالظبط ممارسة الرياضة, التنفس بشكل سليم هيعمل فرق كبير, دايما افتكري انك تتخلصي من التوتر قبل عملية الازالة, واخد النفس والزفير بشكل صحيح, وخلال عملية سحب الشعر خدي نفس عميق, لان لو انتي بتعاني من التوتر او الضغط بشرتك هتبقى مشدودة وهيبقى صعب على المكنة ازالة الشعر وبالتالي ده هيسبب الم زيادة.

طرق تقليل الم ازالة الشعر 10

11- اصرفي انتباهك واعملي حاجات تانية اثناء ازالة الشعر:

لو عايزة تخففي الالم اثناء عملية الازالة, فافضل طريقة انك تلهي نفسك في حاجة تانية, يعني ممكن تتابعي حاجة في التليفزيون, او تتكلمي مع صاحبتك في التليفون, التركيز على حاجة تانية بدل الالم هيقلل من الطاقة اللي عقلك ممكن يستهلكها على الالم.

طرق تقليل الم ازالة الشعر 11

اعرفوا معانا طرق لتخفيف الالم عند ازالة الشعر بالسويت

طرق ازالة الشعر من غير الم
طرق ازالة الشعر من غير الم

مقالات متعلقه

ازالة الشعر بطريقة طبيعية في البيت استخدام الحجر الخفاف

ازالة الشعر بطريقة طبيعية في البيت استخدام الحجر الخفاف

طريقة ازالة الشعر من منطقة البكيني بمكون واحد بس من غير الم

طريقة ازالة الشعر من منطقة البكيني بمكون واحد بس من غير الم

الشمع البارد: فوايده, ازاي تعمليه, واثاره الجانبية

الشمع البارد: فوايده, ازاي تعمليه, واثاره الجانبية