الكعب العالي مش بس بيتعب رجلك: في 3 اجزاء كمان من الجسم الكعب خطر عليهم

ريهام محمود
ريهام محمود
في
صحة
1685

حوالي 71% من النساء اللي بيلبسوا كعب عالي بيتعرضوا للألم بسببه, وحسب تصريحات جمعية الطب الامريكية, ان مش بس القدمين اللي بتتأثر من الكعب العالي بشكل سلبي, ولكن في اجزاء تانية من الجسم ممكن تتأثر, وتأدي لمشاكل صحية خطيرة, والنهاردة من خلال موضوعنا هنعرف مع بعض اضرار الكعب العالي على الجسم, وهنقولك ايه المشاكل اللي ممكن تحصل للقدمين لو بتلبسي الكعب العالي زيادة عن اللزوم.

اضرار الكعب العالي على الجسم:

1- الوركين:

لما تلبسي الكعب العالي, لازم جسمك يحافظ على توازنه, وعشان ده يحصل بيتم دفع اسفل الضهر للامام, وتغيير محاذاة الوركين وتغيير وضعية العمود الفقري, لان عضلات الفخدين لازم تتني باستمرار للحفاظ على التوازن, ولو انتي بتلبسي الكعب العالي باستمرار ولفترات طويلة, ده ممكن يسبب تقصير وتقلص العضلات, وده بدوره ممكن يأدي لألم في الفخدين.

اضرار الكعب العالي على الجسم 1
اضرار الكعب العالي على الجسم 1

2- الركبتين:

وزنك بيتنقل لكرات القدمين “العضمتين اللي في القدم من تحت اسفل الصوابع” لما بتلبسي كعب عالي, وبسبب ده, الركبتين لازم يحافظوا على توازن الجسم, وده بيحط ضغط اضافي عليها, وده ممكن يسبب هشاشة العضم, وهيحصلك اعراض زي الم المفاصل, التصلب, صعوبة الحركة.

اضرار الكعب العالي على الجسم 2
اضرار الكعب العالي على الجسم 2

3- العمود الفقري:

العمود الفقري طبيعي بيكون فيه انحناء خفيف, لان ده بيسمح بتقليل الضغط الناتج عن حركة جسمك, ولما تلبسي كعب عالي, منطقة اسفل الضهر بيحصل فيها انحناء بشكل مبالغ فيه, وبيغير وضعية العمود الفقري, وده ممكن يسبب آلام الضهر.

والتغييرات في وضعية العمود الفقري ممكن تأدي لمشاكل صحية كتير زي تطور حالة العصب الفقري, اللي ممكن تسبب الم وضعف العضلات والتشنجات وتقلص الاعصاب.

اضرار الكعب العالي على الجسم 3
اضرار الكعب العالي على الجسم 3

المشاكل اللي ممكن يسببها الكعب العالي للقدمين:

– تورم عضمة الصوباع الكبير: حشر الصوابع كلها في مساحة صغيرة جدا ومدببة, ده ممكن يتسبب في ميل الصوباع الكبير ناحية الصوباع اللي جنبه, وده بيخلق ورم عضمة الصوباع الكبير, وبرغم ان كتير بيفكروا ان المشكلة دي وراثية, ولكن انتي ممكن تطوريها وتخليها اسوأ لو شكل رجلك مسطحة وبتلبسي كعب عالي كتير.

– التهاب وتر اخيل: لبس الكعب العالي بيخلي مفاصل الكاحل محدودة الحركة والقوة, وممكن انه يأدي كمان لانسداد وتر اخيل المرتبط بعضم الكعب, وده ممكن يأدي لالتهاب الاوتار, اللي من اعراضها الالم في الجزء الخلفي من الكعب, والتورم, وصعوبة الحركة عند تني القدمين.

اضرار الكعب العالي على الجسم 4

شوفي من هنا 11 نصيحة ازاي تلبسي الجزمة الكعب من غير ما توجع رجلك!

– اصبع القدم المطرقة: في مشكلة تانية ممكن تحصل بسبب لبس الكعب العالي الضيق والمدبب, وهو اصبع القدم المطرقة, لما الصوابع بتبقى كلها جنب بعض في مساحة صغيرة, ده بيخليها تلف او تتعوج لتحت مع مرور الوقت, والحالة دي ممكن تبقى مؤلمة وتخليكي متقدريش تتني صوابع القدمين.

– مسمار القدم: الضغط اللي بيسببه الكعب العالي على القدمين, ممكن يأدي لظهور مسمار القدم, وخصوصا لو كانت الشوز ضيقة اوي, لان ده بيسبب احتكاك اضافي, وعادة ممكن ميبقاش مؤلم, ولكن ممكن انها تسبب الم وحتى كمان عدوى في القدمين.

اضرار الكعب العالي على الجسم 5

– ورم مورتون العصبي: بسبب الضغط الزيادة على القدمين, ده ممكن يخلي الاعصاب تبقى مضغوطة وملتهبة, ونتيجة لده ممكن العصب المؤدي للصوباع الكبير انه يورم ويبقى مؤلم.

– التهاب اللفافة الاخمصية: لبس شوز ضيق ممكن يسبب مشكلة التهاب اللفافة الاخمصية, وهو بيكون عبارة عن نسيج بيربط عضمة الكعب بصوابع القدم, ولبس الكعب العالي الضيق ممكن يسبب التهاب وتهيج للنسيج ده, والنسيج ده عادة يعتبر هو درع القدمين وبيشتغل كممتص للصدمات, ولما هيحصل فيه ضرر, ده ممكن يسببلك الم وتيبس وتورم في الكعب.

يا ترى بتلبسي الكعب العالي كام مرة؟ وهل لاحظتي تأثيره على جسمك ولا لا؟ شاركينا تجربتك.

اضرار الكعب العالي على الجسم 6

3 طرق تختاري بيهم ارتفاع الكعب المثالي ليكي عشان تتجنبي الم القدمين

اختيار ارتفاع الكعب الصحيح والمناسب ليكي
اختيار ارتفاع الكعب الصحيح والمناسب ليكي

مقالات متعلقه

افضل 8 اطعمة صحية للفطار والسحور في رمضان

افضل 8 اطعمة صحية للفطار والسحور في رمضان

نصايح لصيام صحي في رمضان

نصايح لصيام صحي في رمضان

10 تمارين واطعمة هتساعدك على بناء عضلات جسمك

10 تمارين واطعمة هتساعدك على بناء عضلات جسمك