12 نوع طعام المفروض متحفظيهمش ابدا في التلاجة
التلاجة بالنسبة لنا كلنا بنعتبرها اامن مكان لاي حاجة, لو في مثلا نوع طعام معين مش عارفين ممكن نحطه فين, فاول حاجة بنفكر فيها هو اامن مكان للتخزين وهي التلاجة, ولكن هل تعرفي ان في بعض انواع الاطعمة المفروض متتحفظش في التلاجة؟ والحقيقة ان حفظهم في التلاجة مش هيأذيكي باي شكل من الاشكال, ولكن الاكل نفسه النسيج بتاعه هيتعرض للتلف, وطعمه هيتغير وممكن يبوظ, عشان كده النهاردة من خلال موضوعنا هنقولك قايمة اطعمة متتحفظش في التلاجة.
اطعمة متتحفظش في التلاجة:
1- الموز:
درجة الحرارة المنخفضة بتبطء من نضج الثمرة, عشان كده لو انتي عايزة تحفظي الموز في التلاجة او لا ده هيعتمد على مستوى النضج اللي انتي عايزاه, لو حطيتي الموز الاخضر في التلاجة, هيفضل اخضر لمدة طويلة, ولكن في الحالة دي خليه بره لحد ما يبقى ناضج, وبعد النضج ممكن تحطيه في التلاجة عشان تبطيء من عملية النضج وتحافظي عليه, ممكن لون القشرة يتغير ويبقى بني غامق او حتى اسود, ولكن الثمرة نفسها من جوه هتفضل سليمة ومثالية جدا للاكل.
2- الزيوت:
الزيوت بتكون سائلة وملمسها ناعم, واكيد نسيجها مش هيتغير كتير لو اتعرضت للحرارة المنخفضة, ولكن درجة الحرارة المنخفضة ممكن تخلي الزيوت سميكة زيادة عن اللزوم وتغير في قوامها, وزيت الزيتون وزيت جوز الهند بشكل خاص بيتجمدوا في درجات الحرارة المنخفضة, ولكن وضعها شوية في الميكروويف بيرجعها لقوامها الطبيعي.
3- البطاطس:
البطاطس لما بتتحفظ في درجة حرارة منخفضة, بتبدأ تفقد النشا بتاعها, وده بيخلي البطاطس رملية وطعمها بيبقى فيه حلاوة او مسكر شوية, وللاسف فقدان النشا ده مينفعش عكسه, عشان كده ده مجرد ما بيحصل للبطاطس, مافيش اي حاجة تتعمل ممكن تغيره, عشان كده تبريد البطاطس في التلاجة مش فكرة كويسة.
4- القهوة:
حبوب البن سواء المطحونة او السليمة, هي بتشبه السفنجة الصغيرة, على الرغم من ان ريحتها قوية جدا, الا انها عندها قدرة بجذب اي نوع من الروايح ليها, وبمجرد ما تحطي القهوة في التلاجة مش هتشمي ريحتها القوية دي تاني, لانها هتمتص كل الروايح اللي حواليها, وده هيغير نكهتها, كمان لو حفظتي القهوة في التلاجة سواء المطحونة او الفورية, التغيير في درجات الحرارة هيدخل فيها رطوبة يخليها تفقد نكهتها.
5- البصل:
البصل بيطرى وبيحصل له عفونة لو اتحط في التلاجة, ومعظمنا تقريبا مش بيحفظ البصل في التلاجة لان دي تعتبر معلومة معروفة, ولكن لو عندك بصلة مقطوعة ومتعودة دايما تحفظيها في التلاجة, يبقى دلوقتي جيه الوقت انك تبطلي العادة دي, بغض النظر انك ممكن تكوني لفاها كويس او حتى محطوطة في علبة او برطمان محكم الغلق, فالبصل في كل الاحوال هيبوظ بسرعة وهو محطوط في التلاجة, ده غير ان البصل ريحته بتنتشر بسهولة جدا, وبالتالي هتلاقي تلاجتك كلها بكل حاجة فيها ريحتها بصل.
6- العسل:
العسل الطبيعي الخام ليه طرق عشان يحافظ على نفسه لفترة طويلة جدا, يعني لو عندك عسل من فترة كبيرة هتفتحيها بعد سنين هتلاقيها زي ما هي, عشان كده لو انتي بتفكري انك لو حفظتي العسل في التلاجة هتحافظي عليه طازه اكتر, فانتي غلطانة, ولكن على العكس تماما, درجات الحرارة المنخفضة هتسبب تبلور السكر بسرعة, وده هيأدي بدوره لتغيير قوامه لسميك جدا, وهياخد وقت عشان يرجع لقوامه الطبيعي, او انه يتحط في الميكروويف شوية, ومش من المستحب ان العسل يتسخن.
7- الطماطم:
دي ممكن تكون معلومة مفاجئة ان الطماطم المفروض متتحفظش في التلاجة, لان درجات الحرارة المنخفضة بتدخل في نسيجها, ودي بيخليها تطرى بسرعة, وزي البصل بالظبط, الطماطم ممكن يحصلها تعفن في التلاجة.
8- الثوم:
كل انواع الخضروات الدرنية زي الثوم بتميل انها ممكن تعفن ويبقى قوامها مطاطي لو اتحطت في التلاجة, والاسوأ انك مش هتقدري تعرفي مدى سوء حالتها الى لما تطبخ, لان لونها وملمسها بيكون مش متغير من بره.
9- الافوكادو:
الافوكادو عادة ثمرة بتتباع وهي خضرة وصلبة, وبتحتاج انها تتساب تنضج شوية في البيت, ولو حطتيه في التلاجة ده هيوقف عملية النضج بتاعته, زيه زي الموز, الافوكادو مش بينضج في درجات الحرارة المنخفضة.
10- الخبز:
من المفاهيم الغلط ان الخبز لو اتحفظ في التلاجة هيفضل طازة لفترة اطول, ولكن على العكس نسيجه هيتغير بشكل اسرع, وهينشف, الحالة الوحيدة اللي المفروض يتحفظ فيها الخبز في التلاجة وهو على شكل ساندوتش.
11- الشمام:
الشمام او البطيخ او غيرها من الفواكه اللي من نفس الفصيلة تتحفظ في التلاجة بس لما تتفتح, ولكن قبل فتحها تفضل بره عشان تحافظي على المواد المضادة للاكسدة اللي فيها سليمة, عشان كده الافضل تتساب بره في درجة حرارة الغرفة.
12- الاعشاب الطازة:
زي القهوة, الاعشاب بتمتص كل الروايح اللي حواليها, وبمجرد ما ده يحصل هتفقد ريحتها ونكهتها, كمان حفظ الاعشاب الطازة في التلاجة هيخليها تجف بسرعة كبيرة, ولكن في مشكلة ان الاعشاب ممكن يحصلها تعفن لو متحفظتش في التلاجة, يبقى الحل هنا حفظها في علبة محكمة الغلق بره التلاجة.
في النهاية تخزين الخضروات والطعام بشكل سليم, هيقلل في الهدر او انك ترمي اطعمة كتير, لانك هتحافظي عليها سليمة لحد ما تستخدميها كلها.
افضل الطرق عشان تحافظي على الخضار والفاكهة المتقطعة من تغيير لونها وطعمها
