10 كذبات عن تخسيس الوزن كتير مننا لسه بيصدقها

بقلمريهام محمود فيتخسيس الوزن visibility1066

في كتير من خبراء التغذية ومدربين اللياقة البدنية اللي بيقولوا لنا طول الوقت نصايح عن التخسيس, اللي وصلتنا لدرجة اننا مبقناش عارفين نصدق اي نصيحة وايه الصح وايه الغلط منهم, البعض بيقول ان المفروض ناكل وجبات اصغر 6 مرات في اليوم, وبعضهم بيقول انه لا المفروض ناكل 3 وجبات بس في اليوم وان وجبة الفطار المفروض تكون الوجبة الاكبر والاعلى في السعرات الحرارية طول اليوم, واكيد كل النصايح دي بتحيرنا ومش بنعرف نختار الاصح منها, عشان كده احنا النهاردة من خلال موضوعنا هنقول لكل بنات حوا 10 كذبات عن تخسيس الوزن محتاجين اننا نصححها.

10 كذبات عن تخسيس الوزن:

1- اتباع نظام غذائي منخفض الكربوهيدرات هو الطريقة الوحيدة لتخسيس الوزن:

الحمية منخفضة الكربوهيدرات بتدي نتايج كويسة جدا في تخسيس الوزن, ولكن ليها عيوب على المدى الطويل, وواحد من الاسباب الرئيسية لشعبية النظام الغذائي منخفض الكربوهيدرات هو انك بتشوفي نتايج فعالة بشكل سريع جدا بسبب انخفاض وزن المية في الجسم, ولكن لسوء الحظ ان كتير من الاشخاص بيعانوا من نقص الطاقة لما بيمنعوا الكربوهيدرات من نظامهم الغذائي, افتكري ان اتباع نظام غذائي منخفض الكربوهيدرات مش هو الطريقة الوحيدة لفقدان الدهون, بدل كده ممكن تجربي نظام غذائي قليل الدسم او منخفض البروتين.

كذبات عن تخسيس الوزن
كذبات عن تخسيس الوزن

2- المفروض متاكليش بعد الساعة 6 بالليل:

اكيد سمعنا كتير عبارة “افطر فطار الملوك, واتغدى زي الامراء, واتعشى عشا الفقرا”, بمعنى ان الفطار تكون وجبة كبيرة, والغدا وجبة متكاملة, والعشا وجبة بسيطة, وكتير سمعنا ان المفروض مناكلش بعد الساعة 6 بالليل, ولكن ده مش صح بنسبة 100% لان كتير من الدراسات اثبتت انه مش المهم تناول الطعام ولكن كمية السعرات الحرارية اللي بتدخل الجسم هي المهمة, عشان كده القاعدة الاساسية عشان تنقصي وزنك هي حرق سعرات حرارية اكتر من اللي بتاكليه.

كذبات عن تخسيس الوزن

3- اكل كميات اكل اصغر وعدد وجبات اكتر:

اكيد سمعنا انه من الحاجات اللي بتساعد على تخسيس الوزن هي اكل وجبات صغيرة 6 مرات في اليوم, ولكن الدراسات الحديثة اثبتت ان الاشخاص اللي بياكلوا اكتر من 3 مرات في اليوم بيكون عندهم زيادة في الوزن اكتر من الاشخاص اللي بياكلوا عدد وجبات اقل, وان الاشخاص اللي بياكلوا من 5 – 6 مرات في اليوم بيميلوا للافراط في الاكل.

كذبات عن تخسيس الوزن

4- كل ما قضيتي وقت اكتر في الجيم, هتشوفي نتايج احسن:

لما الامر يكون متعلق بالجيم والتمارين, هيكون اهم حاجة هو جودة التمارين, مش طول المدة اللي بتقضيها في الجيم, يعني ممكن تقضي 4 ساعات متواصلين في الجيم كل يوم, وفي النهاية متوصليش لنتايج مرضية لو انتي مش عارفة انتي بتعملي ايه, ولكن بعض التمارين الاكتر فاعلية ممكن تعمليها لمدة 15 دقيقة بس وتجيب معاكي نتايج مرضية جدا وسريعة.

كذبات عن تخسيس الوزن

5- النوافذ المنشطة:

النوافذ المنشطة دي المفروض بتحصل بعد التمرين على طول وبتستمر لمدة 30 دقيقة والمفروض ان التغذية خلال الفترة دي بتزود من نتايج التمرين, ولكن مع ذلك مافيش ادلة علمية بتثبت وجود النوافذ المنشطة فعليا, والابحاث اثبتت ان العلاقة بين العناصر الغذائية المستهلكة مباشرة بعد التمرين ونتايج تمارين افضل مشكوك فيها ومش اكيدة.

كذبات عن تخسيس الوزن

6- الدهون بتزود وزنك:

الدهون بتحتوي على 9 سعرات حرارية لكل جرام, والبروتين بيحتوي على 4 سعرات حرارية بس لكل جرام, عشان كده المفروض تاكلي الاطعمة الغنية بادلهون بحذر, ولكن ده مش معناه انك تستبعدي كل الدهون من نظامك الغذائي عشان تخسي, كل اللي عليكي تعمليه بس انك تحسبي السعرات الحرارية وتوازني ما بين الدهون والكربوهيدرات والبروتين في نظامك الغذائي.

7- وزنك هيزيد كل ما تكبري في السن:

مش هتكسبي وزن زيادة مع التقدم في السن طول ما انتي محافظة على اسلوب حياة صحي, لو بتمارسي التمارين الرياضية بانتظام, فاكيد هيكون جسمك مظبوك لما توصلي لسن ال 60 او 70, لان مفتاح الحفاظ على لياقتك البدنية هو التمرين بانتظام طول العمر, يعني لازم نروح الجيم ونمارس الرياضة بشكل منتظم مش بس عشان مناسبة مثلا او حاجة معينة.

8- التمرين مش هيكون فعال الا لوحسيتي بألم:

كتير من الناس بيفكروا ان عشان التمرين يكون فعال يبقى لازم تحسي بألم ومتعرفيش تتحركي تاني يوم بعد التمرين, لكن ده مش صح خالص, التعب بيحصل بعد التمرين لما تستخدمي عضلات ممرنتيهاش قبل كده لما مثلا تعملي تمارين جديدة, وفي عوامل كتير اللي بتساهم في موضوع الالم بعد التمرين, وحتى اكتر الاشخاص اللي بيتمرنوا بشكل عالي ومكثف ممكن يحسوا بتعب او باحساس مختلف بعد الجيم.

9- تمارين التمدد قبل التمارين:

دايما بنسمع اننا المفروض نعمل تمارين ستريتشينج او تمدد قبل التمارين الاساسية عشان نهيء جسمنا, ولكن اثبت ان المفروض الموضوع يكون عكس كده, والابحاث كشفت ان الاشخاص اللي معملوش تمدد قبل التمارين كانوا قادرين على عمل تمرين السكوات بوزن 8.36% خلال التمارين اكتر من الاشخاص اللي عملوا تمدد قبل التمارين, الافضل انك توفري التمدد للنهاية بعد التمارين لما تكون عضلاتك خلاص مستعدة للاسترخاء.

10- تقدري تاكلي او تشربي اي حاجة خلال فترة الاكل في نظام الصيام المتقطع:

في قاعدتين مهمين جدا لازم تمشي عليهم في نظام الصيام المتقطع, متجوعيش نفسك, ومتاكليش الوجبات السريعة خلال فترة الاكل, لازم تستهلكي كمية كافية من السعرات الحرارية وتاكلي الطعام النضيف او الصحي بقدر الامكان اثناء نظام الصيام المتقطع عشان تحافظي على مستويات الانسولين منخفضة, ولكن ده مش معناه انك متقدريش تاكلي او تشربي ابدا حاجة مش صحية لو نفسك راحت ليها, كلي بس بكمية بسيطة جدا, او ممكن تستبدلي حاجة بحاجة تانية صحية اكتر, مثلا ممكن تشربي قهوة من غير سكر بدل الكابتشينو العادي.

دايت الشوفان – ازاي الشوفان هيساعدك على خسارة الوزن