8 طرق هيساعدوكي انك تقدري تاخدي القرار الصح دايما

ريهام محمود
ريهام محمود
1088

انك تاخدي قرار ده ممكن يكون صعب جدا ومش مهمة بسيطة, خصوصا انك عشان تاخدي قرار معين في حياتك لازم تبصي لكل النتايج اللي هتحصل نتيجة القرار ده, واي قرار هتاخديه ممكن يخليكي سعيدة؟ ازاي تاخدي القرار الصح في وقت مربك بالنسبة لك؟ هل ممكن قرار يلخبط حياتك بدل ما يظبطها؟ يعني هنلاقي انه صعب انك دايما تاخدي القرار الصح, واكيد كلنا بنبقى عايزين ناخد القرارات الصح باستمرار. لكن هل ده ممكن؟ الواقع ان مافيش حاجة مثالية, ولكن اللي تقدري تعمليه انك تستغلي مهاراتك في الاختيار بحيث انك تحققي افضل الاختيارات الممكنة في الوقت ده بشكل موثوق, والنهاردة من خلال موضوعنا هنقولك 8 طرق هتساعدك تاخدي القرار الصح.

طرق هتساعدك تاخدي القرار الصح:

1- حافظي على هدوئك:

غالبا لما بنكون في حالة توتر بناخد قرارات انفعالية غلط, ومشاعر زي القلق والغضب والاحباط والتوتر والضغط, مش مشاعر مثالية لاتخاذ قرارات صح, عشان كده قبل ما تاخدي القرار لازم تحاولي انك تهدي نفسك.

هنقولك تمرين رائع جدا للتهدئة تقدري تعمليه عشان تفكري بشكل ايجابي:

1- اقعدي في وضع مريح.

2- حطي ايدك على بطنك بحيث انها تكون تحت القفص الصدري.

3- وحطي ايدك التانية على صدرك.

4- خدي نفس بعمق وببطء من خلال انفك وانتي بتعدي لحد 4 تقريبا, استرخي وسيبي عقلك وركزي على ايدك وشعور الصدر اثناء ما الرئتين بيتملوا بالهوا, يعن انسي كل حاجة وركزي على نفسك.

5- امسكي النفس اللي انتي اخدتيه لمدة ثانيتين تقريبا.

6- طلعي النفس ببطء وانتي بتعدي لحد 4, وتقدري تخرجي النفس عن طريق الانف او الفم.

7- كرري العملية دي اكتر من مرة, حاولي تعمليها من 6 – 10 مرات كل دقيقة خلال 10 دقايق تكوني خلصتي العدد.

مش هتقدري تاخدي 10 دقايق للتنفس؟ عايزة تاخدي قرار بشكل اسرع. غمضي عينيكي وخدي كام نفس ورا بعض بعمق وببطء عشان تدي نفسك دفعة مهدئة سريعة.

لو عندك وقت اكتر من ال 10 دقايق تقدري تعملي حاجات تانية للاسترخاء زي:

– روحي اتمشي.

– اسمعي اغاني.

– مارسي تمارين رياضية.

– تدوين افكارك.

– التأمل.

– العبي مع حيوان اليف.

القرار الصح 1
القرار الصح 1

2- اتخلصي من الافكار والمشاعر السلبية:

المشاعر السلبية ممكن تكون ضارة جدا في اتخاذات القرارات الصح, وممكن انها تخليكي تاخدي قرارات واختيارات غير منطقية او عقلانية, وممكن تاخدي قرار يمنعك من التقدم وتحسين حياتك.

والمشاعر اللي لازم تتخلصي منها عشان تاخدي القرار الصح هي:

– الاحباط:

لما تكوني محبطة او يائسة هتروحي لاي قرار متاح قدامك من غير تفكير بشكل متهور, احيانا ممكن تحسي ان العالم انتهى بالنسبة لك, لكن افتكري دايما انه فعليا منتهاش, وان في حل كويس موجود وتقدري انك توصلي له.

– الخوف:

لما هتحسي بمشاعر خوف, ده هيخليكي تاخدي القرارات اللي هتحسسك بالامان حتى لو مش صح, وده ممكن يخليكي متتقدميش وتفضلي في حالة ركود, عشان كده انتي محتاجة وقت عشان تشوفي حقيقة الموقف كويس عشان تبقي شجاعة وتتغلبي على خوفك وتقدري تاخدي القرار الصح.

– الذنب:

كتير من الناس ممكن ياخدوا قرارات بدافع الذنب, ممكن تحسي انك مضطرة تاخدي قرار معين بسبب الضغط الخارجي, وده هيأدي في النهاية لاتخاذ قرار هتندمي عليه بعد كده لمجرد انك تخلي شخص تاني سعيد او ترضيه.

استني لحد ما يكون تفكيرك ايجابي اكتر, ومتسمحيش لاي شخص انك يحسسك بالذنب ويخليكي تاخدي قرار انتي مش متأكدة منه بنسبة 100%.

– عدم الصبر:

ساعات كتير مش بيبقى عندنا صبر وبناخد قرارات سريعة متهورة ومش مدروسة كويس, وعدم الصبر ده ممكن يأدي لقرارات واختيارات كارثية.

القرار الصح 2
القرار الصح 2

3- تجميع المعلومات:

مهم جدا انك تجمعي معلومات قبل ما تاخدي اي قرار, لان لو مش عندك المعلومات الكافية, مش هتقدري تاخدي الاختيار او القرار الافضل بالنسبة لك.

هنقولك ازاي تجمعي المعلومات:

– اعملي بحث:

دلوقتي الانترنت بقى يسهل علينا اننا نوصل لكل المعلومات, تقدري تعملي بحث عن اي معلومات انتي عايزاها.

يعني لو مثلا عايزة تاخدي قرار انك تتنقلي لشقة جديدة, اعملي بحث عن الاسعار في المكان, والاماكن الحيوية القريبة منه, المدة اللي هتاخديها في تنقلاتك اليومية, وكل المعلومات اللي ممكن تفيدك في اتخاذ قرارك.

لو مثلا بتفكري انك تبدأي مشروع تجاري, دوري ايه المطلوب عشان تبدأي, هتحتاجي راس مال قد ايه, ايه شكل السوق, وازاي تعملي المعاملات القانونية بتاعة المشروع.

وبغض النظر عن قرارك, فالانترنت هو صديقك في عملية البحث, هتلاقي فيه كل المعلومات اللي انتي محتاجاها.

– اسألي اسئلة:

لو قرارك محتاج انك تسألي شخص, متخافيش انك تسأليه, ومتحسيش بالخجل من رغبتك في جمع معلومات اكتر منه, والشخص اللي انتي هتلجأي له ده لازم ميكونش عنده مشكلة مع رغبتك في اتخاذ قرار بطريقة ايجابية.

– خدي الافضل من رأي كل شخص:

الاشخاص بيكون ارائهم مختلفة وممكن البعض يتحيز لحاجة معينة على حساب حاجة تانية, وبعضهم يكونوا عكسهم في الرأي, ولكن ده مش معناه انك تاخدي برأي الاغلبية مثلا , ولكن انتي ممكن تاخدي منهم كل المعلومات والاراء وتختاري افضلها وتدمجيها مع بعض في معلومات متماسكة.

القرار الصح 3
القرار الصح 3

4 – خدي راي شخص ثقة:

حيرانة انك تاخدي قرار معين؟ ممكن تتكلمي مع شخص ثقة وتاخدي رايه, سواء من الاصدقاء او العيلة او زميل في الشغل او اي شخص تاني ممكن تثقي فيه, لكن متاخديش اراء كتير في نفس الوقت عشان متربكيش نفسك.

ممكن كمان انك تلجأي لاشخاص اخدوا قرارات قبل كده شبه قرارك, او اشخاص عندهم خبرة في الموضوع اللي انتي بتسألي عنه, كمان التجمعات او الجروبات على السوشيال ميديا, ممكن يقدمولك المساعدة بشكل كبير.

القرار الصح 4
القرار الصح 4

5- خليكي صبورة:

احنا اتكلمنا في نقطة قبل كده عن عدم الصبر في القرارات, وانك لو عايزة تاخدي اختيار ايجابي, فلازم تتأكدي انك متستعجليش.

هنقولك نصايح تساعدك على ده:

– خدي وقتك:

انتي محتاجة لوقت عشان توازني اختياراتك, اتوقفي شوية وفكري في القرارات المحتملة, وفكري في ردود افعالك عليها, وخدي نفس, ولو اتطلب منك انك تاخدي القرار فورا, اطلبي وقت اكتر عشان تفكري اكتر لو امكن.

– نامي بعد ما تقرري:

عشان تتأكدي ان قرارك صح ولا ايه, بعد ما تاخدي القرار نامي, وشوفي هل هتحسي بنفس الاحساس ونفس الطريقة الصبح اتجاه القرار ده ولا لا.

– اتوقفي عن التفكير لفترة:

كتير من الاشخاص ممكن يوصلوا لافضل افكارهم لما ميركزوش انهم يخرجوها على طول, وبيدوا نفسهم وقت يفكروا فيها اكتر, وبعدين تصرفي انتباهك على الفكرة او القرار ده لفترة وتفكري في حاجة تانية, وسيبي المسافة بين افكارك تكبر, وممكن ساعتها الحل الحقيقي يجيلك وانتي مش متوقعاه.

– جربي وجهتين نظر مع نفسك:

حاولي انك تعيشي مع نفسيتك شخصيتين مختلفتين, وتبصي للقرار من الجانب التاني او من وجهة نظر مختلفة كانك شخص تاني, والطريقة دي شائعة جدا لصنع القرار والاكاديمين اكدوا ان ليها تأثير ايجابي على عملية تفكيرك.

القرار الصح 5

6- نظمي افكارك:

لما تكوني هتاخدي قرار كبير هيبقى في مخك افكار كتير وممكن متبقاش منظمة بشكل كافي, ومن المهم جدا تنظيمها قبل ما تاخدي قرارك.

هنقولك طرق ازاي تنظمي افكارك:

– دوني اختياراتك:

شوفي كده ايه هي كل الاختيارات اللي قدامك, ودونيها كلها بطريقة منظمة, بالطريقة دي تقدري تشوفي قراراتك بموضوعية اكتر من غير تداخل افكار كتير مع بعض.

– دوني النتايج:

دلوقتي بعد ما دونتي اختياراتك, دوني النتايج المحتملة للقرارات دي, ده هيساعدك في معرفة الاختيارات الافضل اللي هيكون ليها افضل نتايج على المدى الطويل.

– اعملي قايمة بالسلبيات والايجابيات:

هل لسه حاسه ان القرار صعب؟ اكتبي ايجابيات وسلبيات كل حاجة, لان ممكن بعض السلبيات يخليكي تلغي اختيار او قرار معين, واختيارات فيها ايجابيات اكتر.

– اتكلمي عن القرار:

لو كل حاجة من اللي قولناها فشلت معاكي, اتكلمي عن القرار او الاختيار, ومش لازم يكون مع شخص, ممكن بس مع نفسك, اتكلمي مع نفسك بصوت عالي عشان تفهمي غضبك, الطريقة دي ممكن تكون فعالة جدا مع افكارك وهتوجهك للافكار الصح.

القرار الصح 6

7- خدي قرار يمشي مع مبادئك:

قرارك المفروض ميأثرش بشكل سلبي على ضميرك, اختياراتك لازم تتماشي مع مبادئك واخلاقك الشخصية.

هنقولك ازاي تاخدي القرار الصح بالطريقة دي:

– فكري في الاشخاص اللي هيتأثروا:

هل قرارك هيأثر على اللي حواليكي؟ اكيد في النهاية المفروض تاخدي القرار المناسب ليكي واللي هيغير حياتك, ولكن لازم تشوفي كمان تأثير الاختيارات دي على الاشخاص اللي حواليكي المهمين بالنسبة لك.

– حافظي على قيمك:

ايه المهم بالنسبة لك؟ هل قيمة الاسرة والعيلة؟ العدالة الاجتماعية؟ تحقيق مكاسب مالية؟  القانون؟ مهما كان المهم ليكي, خلي القيمة دي هي اللي توجه اختياراتك.

– متثيريش غيرة اللي حواليكي:

اكيد من حقك تفرحي بنجاحك او قرار صح وصلتي له من غير قصد, ولكن ده ممكن يثير غيرة وحقد من بعض الاشخاص حواليكي, عشان كده الافضل انك تكملي في طريقة من غير ما تحاولي تثيري غيرة الاشخاص اللي حواليكي.

القرار الصح 7

8- خلي عندك ثقة في حدسك:

حدسك او احساسك الداخلي يستحق الثقة, لو فشلت معاكي كل حاجة تانية, افتكري دايما الانطباعات الاولى اللي حسيتي بيها, لان دي غالبا بتكون الصح, يعني لو مقدرتيش تعرفي القرار الصح, فحدسك او احساسك الداخلي هيكون هو الرهان الآمن بالنسبة لك.

وفي الاساس متبالغيش في التحليل, لان عادة اللي بياخدوا قراراتهم بناء على مشاعرهم لما بيضطروا لده بينتهي بيهم الامر لمشاعر اكتر ايجابية اتجاه القرار, خدي لحظة للتفكير بنفسك والتواصل مع اللي انتي عايزاه فعلا.

وكل ما وصلتي لقرارات افضل بناء على مشاعرك, كل ما ده بيثبت اكتر ان حدسك دقيق وصح من البداية, عشان كده حاولي تمرني نفسك ومع الوقت هتثقي في حدسك اكتر.

في النهاية بنقولك ان اتخاذ القرارات دي مهارة, تقدري انك تحسنيها مع الوقت, عشان كده بنقولك متخافيش من التجربة لان دي اللي هتخليكي مع الوقت تختاري صح بشكل اكبر, لانك كل ما هتغلطي وتاخدي قرار غلط, هتتعملي منه, ومش هتكرريه.

واكتر من اي حاجة تانية خلي عندك ثقة في نفسك وفي قدرتك على اتخاذ الاختيارات المناسبة ليكي, والثقة انك ممكن تتأقلمي مع التغيير او اي حاجة ممكن تيجي في طريقك.

القرار الصح 8

5 نصايح سهلة هتساعدك في تقليل التوتر والقلق وانتي في الشغل

نصايح سهلة هتساعدك في تقليل التوتر والقلق وانتي في الشغل
نصايح سهلة هتساعدك في تقليل التوتر والقلق وانتي في الشغل

مقالات متعلقه

ازاي يبقى عندك الشجاعة تتخلي عن الحاجات اللي مش قادرة تغيريها

ازاي يبقى عندك الشجاعة تتخلي عن الحاجات اللي مش قادرة تغيريها

طرق ازاي تدربي مخك انه يتوقف عن القلق

طرق ازاي تدربي مخك انه يتوقف عن القلق

4 اسئلة تسأليهم لنفسك كل يوم الصبح ممكن انها تغير عقلك

4 اسئلة تسأليهم لنفسك كل يوم الصبح ممكن انها تغير عقلك