3 علاجات منزلية سهلة تساعدك في التحكم في تساقط الشعر
تساقط الشعر دلوقتي بيعتبر واحدة من أحد أكبر المشكلات اللي بتواجهها البنات عموما في اي سن وفي أي وقت في السنة، وده لأن المشكلة مابقتش مرتبطة بفصل معين وعشان نقدر نساعدك تتحكمي في مشكلة التساقط وانك تحجميه وتقلليه بطريقة فعالة، في المقال ده هنقولك علاجات منزلية هتساعدك وكمان هتخلي شعرك يطول، اعرفي معانا 3 علاجات منزلية سهلة تساعدك في التحكم في تساقط الشعر
3 علاجات منزلية سهلة تساعدك في التحكم في تساقط الشعر
العلاج الأول: استخدمي زيت تساقط الشعر قبل الشامبو
لتحضير زيت تساقط الشعر هتحتاجي المكونات دي اللي هتقدري تلاقيها بسهولة عند أي عطار كويس وبتكلفة مش مرتفعة:
2 ملعقة كبيرة من زيت جوز الهند
2 ملعقة كبيرة من زيت الخروع
من 10 لـ 15 حبة من زهرة كركديه منقوع ومتصفي من المياه “تقريبا معلقة كبيرة كركديه ناشف”
3 كبسولات فيتامين E
2 ملعقة كبيرة من زيت اللوز
الطريقة:
1- ضيفي جميع الزيوت في طبق وسخنيها دقايق بسيطة على نار هادئة، لما تبقى دافية لمتوسطة السخونة، ارفعيها من على النار وسيبيها على جنب.
2- اطحني الكركديه كويس اوي لحد ما يتحول لمعجون ناعم.
3- ضيفي مزيج الزيت لمعجون الكركديه، وفضي عليهم محتويات كبسولة من فيتامين E، وسيبيهم منقوعين في مكان دافي طول الليل.
4- تاني يوم صفي الخليط ودلكي بيه فروة راسك 5 دقايق قبل النوم، ونامي بيه، لما تصحي اغسلي شعرك بشامبو خفيف وكرري استخدام الخليط ده بانتظام مرتين في الأسبوع لحد ما تلاحظي تغيير.
العلاج الثاني: ماسك وقف تساقط الشعر
الماسك ده بيعتبر من أكتر الوصفات الفعالة في وقف تساقط الشعر، هتحتاجي المقادير دي:
من 10 لـ 15 حبة من زهرة كركديه
ملعقة كبيرة بذور حلبة
كوباية ماية دافية
شاور كاب أو حاجة نايلون أو بلاستيك تغطي بيها شعرك
الطريقة:
1- انقعي بذور الحلبة في المية طول الليل، والصبح اغسلي ورق الكركديه كويس أوي واضربيه في الكبة مع الحلبة المنقوعة بعد ما تصفيه من المياة، اطحنيهم كويس لحد ما يكونوا معجون.
2- قسمي شعرك ورطبيه بنقط بسيطة من الميةن وافردي الماسك كويس على شعرك من الجذور للأطراف، دلكي فروة الرأس بلطف مع الماسك لمدة 5 دقايق.
3- غطي شعرك باستخدام الشاور كاب وسيبيه لمدة 20 لـ 30 دقيقة، بعد مرور الوقت اغسلي شعرك من الماسك كويس الأول بالمية وبعد كده بالشامبو، واستمري في استخدام الماسك من مرتين لـ 3 مرات في الأسبوع.
العلاج الثالث: المكملات الغذائية مع أكل صحي متوازن
النظام الغذائي الصحي والمتوازن مع المكملات الغذائية والفيتاميات ممكن تكون هي الحل الأهم لتقليل ومنع تساقط الشعر، فيتامينات زي A و C و D و E وجميع فيتامينات B تقدر تخلي شعرك ينمو بشكل طويل وسميك، كمان جميع منتجات الألبان والبيض والجزر والبطاطس هي مكمل كبير A، والخضروات الورقية والحبوب الكاملة والأسماك واللحوم هي مكملات غنية بفيتامينات H – D – C لكن مهم جدا انك تاخدي الفيتامينات دي بجرعات محددة ومناسبة تحت اشراف طبيب متخصص.
اعرفي معانا كمان ماسك ليلي لتنعيم وتطويل وتكثيف الشعر
