5 وصفات سناكس كرسبي سهلة وسريعة بالخطوات والفيديو

ريهام محمود
ريهام محمود
في
مطبخ
3945

لو عايزة وصفات سناكس او وجبات خفيفة تاكليها بين الوجبات او كطبق جانبي مع الاطباق الرئيسية, تابعي معانا السطور الجايه, هنشوف مع بعض 5 وصفات سناكس كرسبي سهلة وسريعة بالخطوات والفيديو.

وصفات سناكس كرسبي:

1- تشيلي ماك اند تشيز بوبس:

الكمية دي تكفي 18 شخص تقريبا.

مقادير التشيلي:

– 1 معلقة كبيرة زيت زيتون.

– 1 بصلة كبيرة متقطعة مكعبات.

– 1 ثمرة فلفل اخضر متقطعة مكعبات.

– 455 جرام لحمة مفرومة.

– 3 ثمرة طماطم متقطعة مكعبات.

– 440 جرام فاصوليا حمرا “علبة”.

– 125 جرام فلفل اخضر حار.

– 3 معالق كبيرة صلصة طماطم.

– 2 معلقة صغيرة كمون.

– ½ معلقة صغيرة فلفل اسود.

– 1 معلقة صغيرة ملح.

– 1 معلقة كبيرة ثوم بودر.

– 1 معلقة كبيرة بابريكا.

– ¼ معلقة صغيرة شطة.

– عصير ليمونة.

مقادير ماك اند تشيز:

– 5 كوبايات لبن كامل الدسم.

– 455 جرام مكرونة.

– ½ كوباية زبدة غير مملحة “115 جرام”.

– 1 معلقة صغيرة ملح.

– ½ معلقة صغيرة فلفل اسود.

– 1 ½ كوباية جبنة شيدر مبشورة “165 جرام”.

– 1 كوباية جبنة شيدر مبشورة.

– 255 جرام شيبسي ذرة “ممكن تستخدمي دوريتوس”.

– 1 كوباية دقيق “125 جرام”.

– 3 بيضات مخفوقين.

– زيت للقلي.

– 3 معالق كبيرة كزبرة خضرا مفرومة للتزيين.

طريقة التحضير:

1- في حلة على نار متوسطة حطي زيت الزيتون, ولم يسخن ضيفي البصل وقلبيه لحد ما يبقى لونه دهبي, حوالي 10 دقايق.

2- ضيفي الفلفل الاخضر, وقلبيه مع البصل لحد ما يطرى, حوالي 3 دقايق.

3- ضيفي اللحمة المفرومة وقلبيها مع باقي المكونات لحد ما تتخلص من اللون البينك بتاعها, حوالي 5 دقايق.

4- ضيفي الطماطم, الفاصوليا الحمرا, الفلفل الاخضر الحار, صلصة الطماطم, الكمون, الملح, الفلفل, الثوم البودر, البابريكا, الشطة, وعصير الليمون, قلبي المكونات كلها مع بعض كويس, وسيبيها تغلي حوالي 10 دقايق, ارفعي الحلة من على النار وسيبيها على جنب.

5- في حلة تانية كبيرة على نار عالية, حطي اللبن والمكرونة, قلبيهم مع بعض وسيبيهم يغلوا لحد ما المكرونة تستوي.

6- اطفي النار, وضيفي الزبدة, الملح, الفلفل, و 1 ½ كوباية جبنة شيدر, وقلبي المكونات مع بعض لحد ما الزبدة والجبنة تسيح.

7- في صينية مستطيلة, حطي ورق خبز او ورق زبدة وخلي فيه زيادة طالعة من الصينية عشان تقدري تطلعيه بسهولة, حطي 1/3 كمية المكرونة وساويها بالمعلقة كويس, فوقيها حطي ½ كمية الجبنة الشيدر المبشورة, حطي ½ كمية التشيلي اللي حضرناها في الاول, حطي 1/3 كمان من المكرونة فوق التشيلي, حطي باقي الجبنة الشيدر, وفوقيها باقي كمية التشيلي, وبعدها على الوش حطي باقي كمية المكرونة.

8- غطي الصينية بورق خبز, حطيها في الفريزر على الاقل 6 ساعات لحد 12 ساعة.

9- طلعي المكرونة من الصينية, وابدأي اغرزي فيها ستيك خشب ممكن تستخدمي الاسياخ الخشب بتاعة الشوي, اغرزيهم جنب بعض بالاحجام اللي انتي عايزاها, وقطعيها على شكل مستطيلات.

 10- اطحني الدوريتوس او اي نوع شيبسي الذرة اللي انتي هتستخدميه بس خليه خشن, وحطيه في طبق, وفي طبق تاني حطي شوية دقيق, وطبق كمان حطي فيه بيض.

11- امسكي واحدة واحدة من سيخ المكرونة اللي انتي قطعتيه حطيه في الدقيق, وبعدين البيض, وبعدين في الدوريتوس المطحون, اعملي الكمية كلها.

12- في زيت سخن ابدأي حمريهم, لمدة 8 دقايق تقريبا, لحد ما لونها يبقى دهبي وكرسبي.

13- طلعيها على ورق مطبخ عشان تمتص كل الزيوت الزيادة.

14- وقدميها مع رشة من الكزبرة الخضرا على الوش.

وصفات سناكس كرسبي 1
وصفات سناكس كرسبي 1

الطريقة بالفيديو:

2- فلفل حار محشي جبنة:

المقادير:

– 12 حبة فلفل حار “فلفل هالبينو لو متوفر”.

– اي نوع جبنة بالفلفل الاسود.

– 4 بيضات.

– 2 كوباية دقيق “250 جرام”.

– 2 كوباية خبز مطحون او بقسماط “230 جرام”.

طريقة التحضير:

1- اقطعي الجزء اللي فوق من الفلفل وبمعلقة صغيرة فرغيه من جوه وطلعي من البذور بتاعته.

2- احشيه الفلفل من جوه بالجبنة.

3- حطي الجزء اللي فوق اللي قطعتيه من الفلفل تاني, واقفليه بخلتين سنان.

4- اغمسي الفلفل في الدقيق, وبعدين البيض, وبعدين الخبز المطحون او البقسماط, وعشان تعملي طبقة سميكة من بره ممكن تحطي في البيض تاني وبعدين في البقسماط مرة كمان.

5- سخني الزيت واقلي حبات الفلفل لحد ما لونها يبقى دهبي, حوالي من 2 – 3 دقايق.

6- طلعيها على ورق مطبخ عشان يمتص الزيوت الزيادة, وشيلي منها خلة السنان, وبالهنا والشفا.

وصفات سناكس كرسبي 2
وصفات سناكس كرسبي 2

الطريقة بالفيديو:

3- حمص مقلي:

المقادير:

– 2 كوباية دقيق حمص “200 جرام”.

– 4 كوبايات مية “960 مل”.

مقادير الصوص:

– ½ كوباية زبادي “145 جرام”.

– 1 معلقة كبيرة بقدونس مفروم.

– 1 معلقة كبيرة شبت مفروم.

– 1 فص ثوم مفروم.

– 1 معلقة صغيرة عصير ليمون.

– ملح.

طريقة التحضير:

1- في حلة كبيرة حطي المية على النار وسيبيها لحد ما تغلي, وبعدين ضيفي دقيق الحمص وافضلي قلبي فيها لحد ما الخليط يبقى سميك زي سمك الشوفان كده.

2- هاتي صينيه رشيها زيت, وانقلي فيها خليط الحمص, وامسكي الصينية اخبطيها لحد ما تساوي الخليط كله, وطلعي منه الهوا.

3- غطي الصينية بالبلاستيك واضغطي عليه بايدك عشان تتأكدي ان السطح كله متساوي, وحطيها في التلاجة لمدة ساعتين.

4- دلوقتي حضري الصوص, في طبق اخلطي الزبادي, الملح, البقدونس المفروم, الشبت المفروم, الثوم, وعصير الليمون, وقلبي المكونات كلها مع بعض كويس.

5- طلعي الحمص من التلاجة, واقلبيه طلعيه من الصينية, قطعيه صوابع زي البطاطس بس سميكة شوية, وحمريها في زيت سخن على كل الجوانب لحد ما لونها يبقى دهبي وكرسبي.

6- طلعيها من الزيت على ورق مطبخ, ورشي عليها وهي لسه سخنة شوية ملح وبقدونس مفروم, وكليها مع الصوص.

وصفات سناكس كرسبي 3

الطريقة بالفيديو:

4- بطاطس ودجز بالثوم والجبنة الباميزان:

المقادير:

– 3 حبات بطاطس.

– 3 بيضات.

– 1 كوباية جبنة بارميزان مبشورة “110 جرام”.

– ¼ كوباية بقدونس مفروم “10 جرام”.

– 1 معلقة كبيرة زعتر مجفف.

– 1 معلقة صغيرة بابريكا.

– 1 معلقة صغيرة ثوم بودر.

– 1 معلقة صغيرة ملح.

– 1 معلقة صغيرة فلفل اسود.

– ½ معلقة صغيرة شطة.

طريقة التحضير:

1- سخني الفرن على درجة حرارة 190 درجة مئوية.

2- قطعي البطاطس ودجز.

3- في طبق اضربي ال 3 بيضات بالشوكة.

4- وفي طبق تاني اخلطي باقي المكونات الجافة مع بعض.

5- اغمسي البطاطس في البيض, وبعدين في الخليط الجاف.

6- هاتي صينية ادهنيها بالزيت, ورصي عليها البطاطس جنب بعض. وحطيها في الفرن لمدة 30 دقيقة.

7- طلعيها وسيبيها تبرد شوية لمدة 5 دقايق, وكليها مع الكاتشب او المايونيز حسب اختيارك.

وصفات سناكس كرسبي 4
وصفات سناكس كرسبي 4

الطريقة بالفيديو:

5- حلقات البصل مع الموتزاريلا:

المقادير:

– 2 حبة كبيرة بصل ابيض.

– 3 شرايح جبنة موتزاريلا.

– 2 كوباية دقيق “250 جرام”.

– 5 بيضات.

– 2 كوباية خبز مطحون او بقسماط “230 جرام”.

– زيت للقلي.

– صوص المارينارا او اي نوع صوص من اختيارك للتغميس.

طريقة التحضير:

1- قشري البصل وقطعيه حلقات بسمك 1 سم, وافصلي الحقات عن بعض.

2- قطعي كل شريحة من الجبنة الموتزاريلا لـ 4 صوابع.

3- هاتي حلقة بصل كبيرة وحطي جواها حلقة اصغر, وبين الحلقتين حطي شرايح الجبنة.

4- هاتي 3 اطباق, حطي في طبق الدقيق, وفي التاني البيض, وفي التالت الخبز المطحون او البقسماط.

5- اغمسي حلقات البصل في الدقيق, وبعدين في البيض, وبعدين في البقسماط, واغمسيها مرة تانية في البيض, ومرة كمان في البقسماط, ورصي الحلقات على صينية ودخليها  في الفريزر شوية لحد ما تتجمد وتمسك نفسها.

6- في طاسه فيها زيت سخن, حمري حلقات البصل لحد ما يبقى لونها دهبي وكرسبي.

7- طلعيها على ورق مطبخ, وبعدين كليها مع صوص المارينارا او اي نوع صوص من اختيارك.

وصفات سناكس كرسبي 5
وصفات سناكس كرسبي 5

الطريقة بالفيديو:

طريقة عمل البطاطس المخبوزة في الفرن مع حشوة البيتزا والمكرونة والجبنة

البطاطس المخبوزة مع حشوة البيتزا
البطاطس المخبوزة مع حشوة البيتزا

مقالات متعلقه

طريقة عمل صدور الفراخ بالسبانخ والجبنة Hasselback Chicken

طريقة عمل صدور الفراخ بالسبانخ والجبنة Hasselback Chicken

طريقة عمل رول البطاطس باللحمة المفرومة والجبنة

طريقة عمل رول البطاطس باللحمة المفرومة والجبنة

وصفة يخنة الفراخ مع السجق الاسبانية السهلة

وصفة يخنة الفراخ مع السجق الاسبانية السهلة