خطوات عمل بشرة زجاجية كورية بالمكياج

ريهام محمود
ريهام محمود
في
مكياج
16201

البشرة الزجاجية من اكتر التريندات الكورية المشهورة في عالم العناية بالبشرة, والمقصود بالبشرة الزجاجية هي البشرة اللي بتكون صافية وبتلمع وفيها نضارة, واكيد عشان توصلي لبشرة زجاجية محتاجة انك تمشي على نظام روتين العناية بالبشرة الكوري, عشان في النهاية المكياج يكون على بشرة صحية ونضرة ويطلع حلو وشكله مختلف, والنهاردة من خلال موضوعنا هنقولك خطوات عمل بشرة زجاجية كورية, وازاي تحضري بشرتك قبل المكياج عشان توصلي للبشرة المطلوبة.

خطوات عمل بشرة زجاجية كورية:

البشرة الزجاجية الكورية بتعتمد على منتجات التنضيف والعناية بالبشرة الخفيفة, والمرطبات الخفيفة, عشان توصلك لبشرة ناعمة ونضرة, ودلوقتي هنقولك بالخطوات ازاي توصلي لده.

1- الخطوة (1) – منظف خفيف:

اول خطوة استخدام منظف عشان تتخلصي من كل الشوائب الموجودة على سطح البشرة, وعشان الخطوة التانية بعد المنظف هتبقى التقشير, اختاري منظف يكون خفيف على البشرة وفعال.

ولاننا عايزين نوصل في النهاية لبشرة زجاجية, ممكن تعتمدي على منظف يساعد على تفتيح البشرة, حطي كمية بسيطة من المنظف على ايدك, وضيفي له المية عشان تحوليه لرغوة, وابدأي دلكي البشرة بخفة في حركات دائرية, وبعدين اغسليه بمية فاترة.

والافضل عشان نوصل للبشرة اللي احنا عايزنها تستخدمي طريقة التنضيف المزدوج, والطريقة دي بتبدأ باستخدام منظف لازالة المكياج, وبعده منظف تاني لتخليص البشرة من اي شوائب او اتربه, وبننصحك باستخدام منظف زيتي الاول وبعدها منظف طيني او رغوي.

ممكن تستخدمي منظف L’oreal paris pure-clay detox & Brighten cleanser.

خطوات عمل بشرة زجاجية 1
خطوات عمل بشرة زجاجية 1

2- الخطوة (2) – تقشير البشرة:

دلوقتي بعد ما نضفنا البشرة, هتيجي خطوة التقشير, التقشير بانتظام عموما لازم يكون جزء اساسي من اي روتين للعناية بالبشرة, وخطوة مهمة جدا بشكل خاص للوصول لبشرة زجاجية لانها بتزيل كل خلايا الجلد الميتة من على سطح البشرة, اتأكدي انك تختاري مقشر مناسب لنوع بشرتك ومشاكلها, وافتكري ان الهدف من المقشر هو تحقيق تقشير لطيف لبشرة مشرقة ومتجددة, مش احمرار او التهاب.

لو بتعاني من الجلد الجاف اختاري مقشر مغذي, ولو بشرتك دايما بيظهر فيها رؤوس سودا, استخدمي مقشر يخترق المسام بعمق مخصص لازالة الرؤوس السودا وهكذا, اختاري حسب احتياج بشرتك.

بمجرد ما تختاري المقشر المناسب لبشرتك, خدي كمية منه على اطراف صوابعك, وعلى بشرة رطبة, دلكي الوش بلطف بحركات دائرية باطراف صوابع مبللة, ومتفكريش البشرة بعنف عشان متتجرحش او تسببي لها احمرار, وبعدها اغسلي البشرة بمية فاترة.

خطوات عمل بشرة زجاجية 2
خطوات عمل بشرة زجاجية 2

3- الخطوة (3) – Sheet mask:

ال Sheet mask من الطرق الرائعة جدا عشان تدي بشرتك علاج مغذي, لانه بيخترق البشرة بعمق وبيزود من تأثير الماسك وبيرطب البشرة وبيغذيها.

خطوات عمل بشرة زجاجية 3
خطوات عمل بشرة زجاجية 3

4- الخطوة (4) – استخدمي تونر مرطب:

على عكس المعروف ان التونر بينشف البشرة, ولكن مش كل الانواع بتنشف الجلد, المفتاح هو استخدام تونر خالي من الكحول اللي بيدخل في تركيبته مكونات مرطبة زي فيتامين B5, هيساعدك على حماية بشرتك من فقدان الرطوبة وهيحافظ عليها ناعمة ومرنة, كل اللي هتعمليه على قطعة قطن خدي شوية من التونر وامسحي بيه الوش والرقبة.

خطوات عمل بشرة زجاجية 4
خطوات عمل بشرة زجاجية 4

5- الخطوة (5) – حطي سيروم مرطب:

البشرة الزجاجية زي ما قولنا في البداية هي البشرة الصحية الناعمة, عشان كده ترطيب بشرتك من الخطوات المهمة جدا, بعد التنضيف والتقشير والتونر, حطي السيروم على بشرة رطبة او مبللة شوية, ولو انتي مش بتستخدمي السيروم بشكل منتظم في روتين العناية ببشرتك, يبقى لازم تبدأي تستخدميه لانه ليه فوايد كتير جدا وهيفرق مع بشرتك اوي.

وعشان توصلي للبشرة الزجاجية الكورية, دوري على السيروم اللي داخل في مكوناته حمض الهيالورونيك, لانه بيرطب البشرة بشكل عالي جدا, والبشرة بتمتصه بسرعة وبيديها مظهر شبابي ونضر, حطي كام نقطة من السيروم على الوش والرقبة, ودلكيه بلطف في حركات دائرية من تحت لفوق, مع تجنب منطقة العين.

خطوات عمل بشرة زجاجية 5
خطوات عمل بشرة زجاجية 5

6- الخطوة (6) – طبقة مرطب خفيف:

المرطب هو الخطوة السادسة معانا, واكيد كتير هيسألوا هل محتاجين مرطب بعد السيروم؟ بنقولك ايوه محتاجة طبقة مرطب خفيف فوق السيروم, لانه هيحفظ الرطوبة جوه البشرة بشكل فعال وهيساعدك على عمل مظهر متوهج للبشرة, وزي المنتجات اللي فاتت اختاري المرطب المناسب لنوع بشرتك.

خطوات عمل بشرة زجاجية 6
خطوات عمل بشرة زجاجية 6

7- الخطوة (7) – وضع الفونديشن:

دلوقتي بعد ما جهزتي بشرتك كويس, هنيجي لاول خطوة في المكياج وهي الفونديشن او كريم الاساس, استخدمي فونديشن مرطب وميكونش مات, لان المكياج المات مش هيديكي النتيجة المطلوبة للبشرة الزجاجية اللي لازم يكون فيها لمعة شوية, واختيار الفونديشن اللي تغطيته متوسطة هيكون مناسب للوك البشرة الزجاجية اللي بيعتمد على المكياج الخفيف, ممكن تستخدمي فونديشن لوريال باريس انفلابيل برو جلو.

خطوات عمل بشرة زجاجية 7
خطوات عمل بشرة زجاجية 7

8- الخطوة (8) – وضع الهايلايتر:

بعد الفونديشن عشان تضيفي لمعان للبشرة وتديها مظهر زجاجي, استخدمي الهايلايتر, ممكن تستخدمي هايلايتر كريمي او سائل, قدامك اكتر من اختيار ممكن تستخدمي هايلايتر كريمي على الوش كله وتركزي اكتر على عضم الخدين وطرف الانف, وممكن تستخدمي الهايلايتر السائل على المناطق اللي عايزين تبرزها اكتر بس زي الانف, الجبهة, الدقن, عضمة الخدين, عضمة الحاجب.

وفي طريقة تانية عشان تعملي اللمعة دي بشكل اسرع وهي بدمج الخطوة دي مع الخطوتين اللي فاتوا, بانك تخلطي شوية من الفونديشن مع الهايلايتر مع الكريم المرطب وتحطيه على الوش كله للوك طبيعي بيلمع.

خطوات عمل بشرة زجاجية 8
خطوات عمل بشرة زجاجية 8

9- الخطوة (9) – اضافة طبقة توهج نهائية:

عشان تضيفي توهج اكتر على اللوك كاضافة نهائية, استخدمي مضيء سائل, حطيه على عضمة الخد, جسر الانف, منتصف الجبهة,  قوس كيوبيد, حطي نقطة او اتنين على كل منطقة, وادمجيه على البشرة بالبيوتي بلندر.

كده احنا عملنا البشرة الزجاجية الكورية, تقدري بعدها تكملي لوك المكياج بتاعك بالطريقة اللي انتي عايزاها, وبننصحك انك تحافظي على المكياج الخفيف.

خطوات عمل بشرة زجاجية 9

هنقولك بعض الاقتراحات اللي ممكن تعتمدي عليها عشان تكملي اللوك بتاعك:

1- حطي لون على الخدين:

اللوك الزجاجي محتاج انك تدي الخدين لون, وعشان تكملي اللوك ممكن تستخدمي برونزر بيلمع على عضم الخد وعند منابت الشعر, وممكن باطراف صوابعك بشكل خفيف اوي تحطي هايلايتر وردي بودر على عضم الحاجب, وعضم الخدين, وقوس كيوبيد.

خطوات عمل بشرة زجاجية 10

2- حافظي على مكياج عيون رقيق:

عشان نحافظ على لوك البشرة الزجاجية الناعم, خلي مكياج عينيكي بسيط وناعم, ممكن تستخدمي ايشادو بالوان نيود, مع رسمة ايلاينر رفيعة على الجفن اللي فوق, وانهي لوك مكياج العين بالماسكارا.

وممكن تكتفي بس بالايشادو النيود مع الماسكار, وتستغني عن الايلاينر.

خطوات عمل بشرة زجاجية 11

3- رسم الحواجب:

اكيد مافيش اي لوك هيكمل من غير رسمة الحواجب, املي حواجبك باللون المناسب باستخدام القلم او الجل.

خطوات عمل بشرة زجاجية 12

4- شفايف بتلمع:

اللمسة النهائية للوك البشرة الزجاجية هي الشفايف, وعشان تكملي اللوك اعتمدي على ليب جلوس لامع.

خطوات عمل بشرة زجاجية 13

بالفيديو لوك مكياج كوري طبيعي:

7 اسرار لبشرة صافية خالية من العيوب من النساء الآسيويات

اسرار لبشرة صافية خالية من العيوب
اسرار لبشرة صافية خالية من العيوب

مقالات متعلقه

6 تقنيات مختلفة لوضع البلاشر على الطريقة الكورية

6 تقنيات مختلفة لوضع البلاشر على الطريقة الكورية

طريقة تصغير حجم المسام بالمكياج .. خطوات ونصايح

طريقة تصغير حجم المسام بالمكياج .. خطوات ونصايح

ازاي تعملي المكياج الفرنسي في 5 خطوات بسيطة

ازاي تعملي المكياج الفرنسي في 5 خطوات بسيطة