طرق لعلاج التبول اللاإرادي عند طفلك..ووصفات طبيعية لحل المشكلة
على الرغم من انك تكوني دربتي طفلك على البوتي بدري او في سن صغير, لكن التبول اللاإرادي في السرير بالليل ممكن يكون شائع جدا بين سن 4 – 7 سنين, وحوالي 15% من الاطفال تقريبا في السن ده بيحصلهم تبول لاإرادي بالليل مرتين على الاقل في الاسبوع, ولو ده استمر انه يحصل لطفلك افتكري دايما انه امر طبيعي جدا, وان في بعض الحاجات اللي تقدري تعمليها عشان تمنعي ان ده يحصل في المستقبل, والنهاردة من خلال موضوعنا هنقولك 9 طرق لعلاج التبول اللاإرادي عند طفلك, ووصفات طبيعية لعلاج لمشكلة.
طرق لعلاج التبول اللاإرادي عند طفلك:
1- قللي عدد المشروبات قبل النوم:
عشان تمنعي امتلاء مثانة الطفل بشكل مفرط اثناء فترة بالليل, مهم جدا انك تتحكمي في كمية السوائل اللي الطفل بيشربها في متأخر بعد الضهر وقبل النوم على طول, اسمحي لاطفالك انهم يشربوا كمية كافية من السوائل اللي محتاجينها خلال فترة الصبح واثناء وقت الغدا, وبعدها ابدأي قللي كمية السوائل ببطء وبالتدريج خلال باقي اليوم, وضروري جدا ان الطفل يدخل التواليت كل يوم قبل النوم على طول, خلي ده جزء من الروتين المسائي للطفل.
2- تجنب بعض الاطعمة اللي ممكن تسبب تهيج للمثانة:
في انواع اطعمة معينة ممكن انها تسبب تهيج المثانة عند الاطفال, اللي بدوره بيسبب لهم التبول اللاإرادي اثناء نومهم لانهم مش قادرين يسيطروا على المثانة بتاعتهم بشكل كافي, عشان كده الافضل تجنب الاطعمة الحمضية زي عصاير الفواكة اللي داخل فيها ليمون, برتقان, اناناس, تفاح, او توت بري.
تجنب منتجات الالبان زي اللبن او الزبادي, لان الالبان ممكن تخلي الطفل يحس انه عايز ينام ويمنعه من انه يصحى لما يحس ان محتاج للتبول, تجنب كمان شرب الهوت تشوكليت, الشاي, المشروبات الغازية, لانها بتحتوي على كتير من السكر والكافيين.
ومن اكتر المنتجات اللي ممكن تسبب تهيج المثانة هي عصاير الفاكهة, الفيتامينات المتعددة وخصوصا اللي بتحتوي على فيتامين C, القهوة والشاي, المشروبات الغازية, منتجات الطماطم, الكافيين, حبوب الحمية, الشوكولاتة, السكر, العسل, شراب الذرة, الاطعمة الحارة او المتبلة اوي, الاطعمة الحمضية (البرتقان, الليمون, الخوخ, الاناناس, التفاح, الشمام, التوت البري), الفلفل الحار, الفلفل, البصل, الزبادي, الجبن, كريمة الطبخ, الخل, الفول السوداني, الجوز, المحليات الصناعية وخصوصا الاسبارتام, فيتامين C.
3- قوميه في نص الليل يدخل الحمام:
الاطفال طبيعي انه بيناموا نوم تقيل, وبيكون صعب عليهم يصحوا في نص الليل يدخلوا الحمام, والفكرة هي انك تصحيهم في نص الليل عشان يدخلوا الحمام, ده هيساعدهم انهم يتعودوا على العادة دي ويقوموا في نص الليل لوحدهم يدخلوا الحمام.
وخلال اليوم ممكن تراقبي الطفل وتشوفي بيدخل الحمام كام مرة, وتصحيهم يدخلوا الحمام في نص الليل اعتمادا على ده, يعني مثلا, لو طفلك خلال اليوم دخل الحمام 7 مرات, كل 3 ساعات, يبقى في الحالة دي هتصحيه يدخل الحمام كل 3 ساعات, بعد كده ممكن تغيري التوقيت بالتدريج ل 4 ساعات, لحد ما توصلي لمرة واحدة في الليلة, ولما يوصل الطفل انه يقعد اسبوع من غير تبول لاإرادي بالليل, اتوقفي انك تصحيه, لانه في الحالة دي هيكون خلاص اتدرب انه يصحى لوحده يدخل الحمام.
4- ضاعفي كمية المغنسيوم:
حسب الدراسات, ان الاطفال ممكن يعانوا من السلس الليلي “التبول في السرير”, لان عندهم نقص في المغنسيوم في نظامهم الغذائي, نقص المغنسيوم ممكن يخلي الجهاز العصبي اقل استجابة, وبالتالي مش هيعرف امتى هو محتاج يدخل الحمام.
وانتي مش محتاجة تدي لطفلك مكملات غذائية, لكن بس دخلي المغنسيوم في نظامه الغذائي, وزودي له الاطعمة الغنية بالمغنسيوم زي بذور السمسم, الافوكادو, الموز, السلمون, البقوليات, التوفو, الشوكولاتة الغامقة, المكسرات, الحبوب الكاملة, الخضروات الورقية الخضرا.
5- دوني تصرفات الطفل:
الاطباء بينصحوا انك تدوني خلال اليوم تصرفات طفلك, ده هيساعدك على مراقبة طفلك وانشطتة وعاداته, وكمية الاكل والمشروبات بتاعته خلال اليوم, وصحته النفسية والعقلية.
ده كمان هيساعدك انك تفهمي هو ليه بيعاني من تبول لاإرادي بالليل, ممكن تكون بعض الاطعمة او المشروبات بتسبب له تهيج وبتأثر على استجابة الجهاز العصبي, عشان كده مهم جدا انك تدوني كل حاجة يوميا عشان يساعدك على فهم السبب الاساسي للسلس الليلي.
6- اتكلمي مع طفلك:
اتكلمي مع طفلك واعرفي منه هو حاسس بايه وحالتة النفسية عاملة ازاي, ومش بس المقصود تتكلمي معاه في حالة التبول اللاإرادي ولكن عن الحالة العاطفية بشكل عام, ولو مروا بتغيير في حياتهم, مثلا في المدرسة او اي موقف عاطفي تاني ممكن يكون اثر عليهم وسبب لهم توتر او قلق, لانه ممكن يكون ده هو سبب التبول اللاإرادي بالليل في السرير, لان معرفة اساس الحالة هيحل المشكلة, واثناء ده هما لازم يحسوا بالدعم مش بالحرج, ويعرفوا انك موجودة عشانهم.
7- استخدمي انذار ترطيب السرير:
في بعض الاحيان ممكن استخدام انذار ترطيب السرير هو الحل في الموقف ده, وده بيكون نوع معين من الانذار بيتم تثبيته في ملابس الطفل الداخلية وبمجرد انه يحس بالرطوبة بيبدأ يصدر صوت, وفي احتمال ان ممكن ده ميصحيش طفلك ولكن اكيد هيصحيكي انتي.
وبمجرد ما تسمعي الصوت, قومي فورا دخلي طفلك للحمام, ده هيفيد انه هيدرب طفلك انه يصحى لوحده في نص الليل ويروح الحمام.
8- اديه مكافأة:
مهم جدا انك تستخدمي التعزيز الايجابي ومكافأة طفلك على الانشطة اللي بيقدر يتحكم فيها, يعني لو هو مش بيقدر يتحكم في التبول اللاإرادي بالليل في ايام معينة, لو جيتي انتي كافئيه على الايام اللي محصلش فيها تبول لاإرادي, ده ممكن يكون ليه تأثير سلبي, وهتخليهم يحسوا انهم فشلوا, عشان كده الافضل انك تديهم مكافآت مرتبطة بحاجات تساعدهم على تجنب التبول في السرير, يعني مثلا:
– اديه مكافأة لما يشرب السوائل الصبح, ويتجنب شرب السوائل كتير بالليل.
– لما ياكل وجبات غنية بالمغنسيوم.
– لما يدخل الحمام قبل النوم مباشرة.
9- حفزيهم من خلال انك تديهم مسئولية:
مهم جدا تحفيز طفلك عشان يكون مسؤول ومستقل الى حد ما, يعني لو بل السرير في يوم, بدل من انك تسيبيه لوحده قاعد حاسس بالذنب والخجل اثناء ما انتي بتنضفي مكانه, وريه بهدوء جدا وبالراحة ازاي يغير ملايته, واطلبي منه انه يساعدك.
اطلبي منه انه ياخد هدومه اللي كان لابسها يحطها في الغسيل, واطلبي منه يساعدك في الغسيل, ده هيخليهم يحسوا بالتقدير من ناحيتك وهيخليهم عايزين يبقوا مسؤولين اكتر انهم يوقفوا التبول اللاإرادي.
اعرفي امتى المفروض تستشيري دكتور:
زي ما قولنا في البداية ان التبول اللاإرادي طبيعي جدا, لكن في بعض الحالات هتكوني محتاجة لاستشارة دكتور لما تحسي ان المشكلة مش بتتحسن مع الوقت.
استشيري الدكتور لو:
– طفلك بيعاني من التبول المستمر الصبح وبالليل, وعمرهم يكون عدى ال 5 سنين.
– لو دايما بيبل السرير بالليل وهو فوق ال 7 سنين.
– لو مر شهور من غير ما طفلك يحصله تبول لاإرادي, وفجأة حصله كده, ويكون عمره فوق ال 5 سنين.
وصفات طبيعية لعلاج التبول اللاإرادي:
1- العسل:
العسل يعتبر من المكونات المفيدة جدا للجسم كله بشكل عام, وبيساعد بشكل فعال جدا على علاج مشكلة التبول اللاإرادي عند الاطفال, لانه بيساعد على تهدئة الاعصاب وامتصاص السوائل من الجسم, ادي طفلك معلقة صغيرة من العسل النحل كل يوم قبل النوم بنص ساعة, هتساعد جدا على حل المشكلة خلال فترة قصيرة.
2- الزنجبيل:
اخلطي 20 جرام زنجبيل مطحون مع 200 جرام عسل, وقلبيهم مع بعض كويس, وادي الطفل من الخليط ده معلقة صغيرة يوميا قبل النوم, هتقلل من نسبة التبول اثناء الليل.
3- الزبيب الاسود:
اطحني كمية من الزبيب الاسود, واخلطيها بعسل النحل, لحد ما الخليط يبقى زي المعجون, ادي الطفل من الخليط معلقة صغيرة كل يوم قبل النوم لمدة اسبوعين على الاقل.
4- البابونج المغلي:
البابونج من انواع الاعشاب المهمة اللي بتساعد على علاج التبول اللاإرادي, شربي الطفل كل يوم كوباية صغيرة من مغلي البابونج المحلى بالعسل.
