هيحصل ايه لو استبدلتي كل المشروبات بالمية!
القهوة, الشاي, المشروبات الغازية, كلها مشروبات معظمنا تقريبا بيشربها طول اليوم يوميا, لكن هل فكرتي في مرة تستبدلي كل المشروبات دي بالمية؟ ده اللي هنشوفه النهاردة مع بعض من خلال المقال بتاعنا هنقولك فوايد المية للجسم والصحة وايه اللي هيحصل لو استبدلتي كل المشروبات بالمية بعد شهر واحد.
فوايد المية للجسم والصحة:
1- هتخسي بشكل اسرع:
لو تمارين الكارديو والانظمة الغذائية مجبتش معاكي نتيجة, المية هتجيب معاكي نتيجة فعالة جدا, لو استبدلتي المية بكل مشروباتك خلال اليوم لمدة 9 ايام, هتفقدي كتير من السعرات الحرارية كأنك كنتي بتمارسي رياضة الجري 8 كم كل يوم.
2- هيبقى عندك طاقة للاستمرار طول اليوم:
عنصر ال H2O اللي هو المية بيساعد بشكل فعال جدا على تقوية عملية التمثيل الغذائي, يعني لو شربتي حوالي 500 ملل من المية كل يوم الصبح, هيحصل زيادة بنسبة 30% في معدل الايض او حرق السعرات الحرارية, وده معناه ان الجسم هيكون فيه طاقة اضافية, عشان كده اتأكدي ان شرب كوبايتين مية هو اول حاجة تعمليها اول ما تصحي من النوم.
3- المخ هيشتغل باقصى طاقته:
كلنا بيجي علينا اوقات ممكن نفقد التركيز بسبب الضغط والاجهاد, ومن الحاجات اللي هتساعدك انك تخرجي من الحالة دي هي المية لان من 75 – 85% من عقلك من المية, عشان كده المية ممكن تعمل المعجزات وتساعد عقلك انه يصحصح ويبقى في كامل تركيزه.
4- هيبقى عندك سيطرة كاملة على شهيتك:
الشراهة اثناء الاكل هي مشكلة خطيرة معظمنا تقريبا بيمر بيها من وقت للتاني, خصوصا في فترات التوتر والقلق, فلو انتي بتحاولي تسيطري على شهيتك, المية هتساعدك في المهمة دي, من خلال شرب المية بشكل متكرر طول اليوم, هتحسسك ان معدتك مليانة ومش هتجوعي بسرعة, وده هيساعدك بدوره على انقاص وزنك.
5- هتخلص جسمك من السموم:
السموم المتراكمة بتأثر على الجسم كله والصحة والبشرة بتبقى باهتة وممكن حتى كمان انها تسرع من شيخوخة البشرة, وللتخلص من السموم دي, لازم انك تزودي الاستهلاك اليومي من المية, شرب المية بس هيخلصك من كل سموم الجسم بطريقة اسرع وبشكل فعال جدا.
6- هتخلصك من المشاكل الصحية:
المية عندها القدرة انها تعالج كتير من المشاكل الصحية, زي آلام الجسم, الصداع, وغيرها من المشاكل اللي المية هتساعد على منعها وتقليلها بشكل فعال جدا زي مشاكل المثانة وارتفاع ضغط الدم.
7- قلبك هيبقى اقوى:
الازمات القلبية بقت من الامراض الشائعة والمنتشرة جدا الفترة الاخيرة حتى انها بقت تأثر كمان على الاشخاص اللي في سن صغير, ولكن الخبر الحلو ان شرب 5 كوبايات مية كل يوم ممكن انها تساعد بشكل فعال جدا انها تبعد عنك الازمات القلبية, لو بتشربي الحد الادنى من كمية المية اللي المفروض تشربيها يوميا, ده هيقلل فرص الاصابة بازمة قلبية بنسبة 41%.
8- هتساعد على توهج ونضارة البشرة:
المية مفيدة جدا للبشرة, فلو انتي عايزة بشرة نضرة ومشرقة وصحية, فالمية هي الطريق الصح لده, شرب كمية كبيرة من المية يوميا هيساعد على ترطيب وتنقية البشرة, وهيخلي ملمسها ناعم ونضرة.
9- هتوفرلك فلوسك:
اكيد كل المشروبات زي الشاي والقهوة والمشروبات الغازية وعصاير الفاكهة وغيرها من المشروبات مكلفة وخصوصا لو انتي بتشربي منها كتير, في حين انه المية من ناحية تانية مجانا ومتوفرة واسهل في الوصول ليها, وبالتالي هتوفري فلوسك اللي هتصرفيها على المشروبات التانية.
المفروض تشربي كمية مية قد ايه في اليوم الواحد؟
من الناحية المثالية, المفروض تشربي من 8 – 10 كوبايات مية كل يوم, وكل كوباية مية تكون حوالي 250 مل, الكمية دي هتكون كافية عشان تخليكي رطبة طول ال 24 ساعة, ولكن مع ذلك لو انتي بتمارسي رياضة او بترضعي رضاعة طبيعية, في الحالة دي هتحتاجي اكتر من 8 – 10 كوبايات, حتى مع بعض الامراض زي مثلا عدوى المسالك البولية هتأدي لزيادة استهلاكك اليومي من المية.
بعد ما عرفنا فوايد المية بننصحك بتغيير اسلوب حياتك, واتخلصي من كل المشروبات واستبدليها بالمية عشان تحافظي على صحتك.
طريقة جديدة ومفيدة هتشجعك علي شرب الميه أكتر
