طريقة ازالة شعر الوجه بالشفرة بشكل صحيح..وايه ايجابياتها وسلبياتها

بقلمريهام محمود فيبشرة visibility1721

يمكن كتير من البنات يشوفوا ان طريقة ازالة شعر الوجه بالشفرة تعتبر غريبة, لان الطريقة دي معروفة انها للرجالة, ولكن الشفرة المستخدمة لازالة شعر الوجه للبنات مختلفة, وهي اللي هنتكلم عنها النهاردة في المقال بتاعنا, وهنتعرف على ايجابياتها وسلبياتها.

نوع الشفرة المستخدمة:

اول حاجة نوع الشفرة المستخدمة لازالة شعر الوش, غير الشفرة اللي بنستخدمها لازالة شعر الرجل, شفرة الوجه بتكون نوع شفره مخصوص ناعمة ومخصوص للوش بس, وبيكون شكلها زي اللي موجودة قدامنا في الصورة دي, وهنلاقيها متوفرة في الصيدليات الكبيرة, او ممكن تشتروها من سيفورا.

ازالة شعر الوجه بالشفرة
ازالة شعر الوجه بالشفرة

ازاي تستخدمي الشفرة بطريقة صح:

ازالة الشعر بالشفرة بسيطة وسهلة جدا ومش محتاجة تستخدمي معاها كريم او اي حاجة على الوش, الحلاقة بتكون على وش جاف او ممكن ترطبيه بالمية بشكل بسيط جدا, وتبدأي في ازالة الشعر من تحت لفوق او العكس تنفع بالطريقتين, وبعدها ادهني البشرة بالكريم المرطب عشان تحافظي عليها من الجفاف.

ازالة شعر الوجه بالشفرة

ايجابيات ازالة شعر الوجه بالشفرة:

– تقشير البشرة:

الشفرة مش بس بتزيل الشعر, لكن كمان بتساعد على تقشير البشرة بشكل فعال جدا, ونتجيتها تقريبا بتوازي نتيجة استخدام الماسكات والكريمات اللي بتستخدم لتقشير البشرة, لانها بتساعد بشكل كبير على تقشير البشرة وازالة الجلد الميت.

– بتساعد على تنعيم البشرة وبتهيئها للمكياج:

لانه زي ما قولنا النقطة اللي فاتت ان الشفرة بتساعد على ازالة الجلد الميت من البشرة, فده معناه ان بشرتك هتبقى ناعمة بعد الحلاقة بالشفرة, وده هيهيء البشرة لاستقبال المكياج وهيطلع شكله احلى على بشرتك.

– تأخير ظهور علامات الشيخوخة:

ازالة الشعر بالشفرة بتساعد على تأخير ظهور علامات الشيخوخة بما فيها التجاعيد والخطوط الرفيعة, لان الطريقة دي بتكون ناعمة جدا على البشرة, ومش بتأثر عليها بشكل سلبي, بعكس الشمع او السويت اللي بيزودا الخطوط الرفيعة بسبب عملية الشد المفرط اللي بتحصل اثناء ازالة الشعر.

سلبيات ازالة الشعر بالشفرة:

– برغم ان الطريقة دي ايجابياتها كتير, الا انها مش هتكون طريقة مناسبة ليكي لو بشرتك حساسة, لانه ممكن تظهر بعض الاعراض الجانبية زي الاحمرار, بالاضافة كمان لو انتي بتعاني من بثور في وشك, الافضل انك تتجنبي استخدام الشفرة لانها ممكن تزود من ظهور البثور.

– الشعر بيبدأ يظهر تاني بعد يومين من ازالته, وبالتالي انتي محتاجة انك تستخدمي الطريقة دي بشكل منتظم, مرتين في الاسبوع على الاقل.

– هل الطريقة دي بتزيد من كثافة وسمك الشعر ولا لا؟ الاراء مختلفة حوالين النقطة دي, بعض المتخصصين بيقولوا ان ازالة الشعر بالشفرة بيزود من كثافة وسمك الشعر وخصوصا لو بشرتك سمرا او قمحية, لكن من ناحية تانية وفريق تاني من المتخصصين بيقولوا ان ده مش صحيح وازالة الشعر بالشفرة مش بتزود كثافة او سمك للشعر, لان المرأة عادة بيكون عندها عدد بصيلات شعر معينة, والعدد ده مش بيتغير, الا في حالة تدمير البصيلات دي بالليزر بس.

بالفيديو طريقة ازالة شعر الوجه بالشفرة من خبيرة التجميل هدى قطان:

افضل 10 انواع من مكنة الحلاقة النسائية لازالة الشعر

انواع مكنة الحلاقة النسائية