طريقة عمل البطاطس المخبوزة في الفرن مع حشوة البيتزا والمكرونة والجبنة

ريهام محمود

في

1354

النهاردة هنقولكم على طريقة سهلة ولذيذة جدا لعمل البطاطس وهي البطاطس المخبوزة مع حشوة البيتزا والمكرونة والجبنة, الطريقة سهلة ومختلفة وتنفع كطبق جانبي على الغدا, او كوجبة عشا سريعة ومغذية جدا.

البطاطس المخبوزة مع حشوة البيتزا والمكرونة والجبنة:

المكونات:

– 2 بطاطس بحجم كبير مخبوزة في الفرن.

– 2 معلقة كبيرة زبدة.

– ½ كوباية + 2 معلقة كبيرة لبن.

– ملح – فلفل.

– 2 كوباية مكرونة مسلوقة.

– 1 معلقة كبيرة دقيق.

– 1 كوباية جبنة شيدر مبشورة.

– ¼ كوباية ببروني, او فراخ مسلوقة, سجق “اي مكونات متوفرة عندك”.

– ¼ كوباية مشروم متقطع.

– ¼ كوباية فلفل اخضر متقطع.

– ¼ كوباية بصل متقطع.

– ¼ كوباية صلصة بيتزا.

طريقة التحضير:

1- هاتي البطاطس خرميها بالشوكة وادهنيها زيت ولفيها بورق فويل وحطيها في الفرن تقريبا حوالي 45 دقيقة لحد ما تستوي خالص.

2- طلعي البطاطس من الفرن اقسميها نصين, فرغيها من جوه, حطي البطاطس اللي انتي طلعتيها في طبق وضيفي عليها معلقة كبيرة زبدة, و 2 معلقة كبيرة لبن, وملح وفلفل, وبودرة ثوم, وقلبي المكونات كلها مع بعض كويس, وحطي الخليط ده تاني جوه البطاطس.

3- في طاسه على نار متوسطة حطي معلقة كبيرة زبدة, وضيفي عليها الدقيق وقلبيهم مع بعض لحد ما الدقيق ياخد لون دهبي فاتح, ضيفي اللبن وقلبي المكونات كويس لحد ما الخليط يبقى سميك ومن غير كتل, ارفعيه من على النار وضيفي له الجبنة الشيدر المبشورة مع الملح, وقلبيهم لحد ما الجبنة تدوب.

4- ضيفي المكرونة المسلوقة لصلصة الجبنة اللي حضرناها, وضيفي عليهم الببيروني او اي مكون تختاريه, والفلفل الاخضر, والمشروم, والبصل, قلبي المكونات كلها مع بعض, وخدي منه بالمعلقة حطي كمية صغيرة جوه كل بطاطساية.

5- على الوش حطي معلقة من صلصة البيتزا غطي بيها المكونات, وعليها رشة جبنة شيدر مبشورة, حطي البطاطس على صينية على ورق زبدة ودخليها الفرن لمدة 15 دقيقة على درجة حرارة 170 درجة مئوية تقريبا, لحد ما الجبنة تسيح على الوش.

6- طلعيها من الفرن, وكده تبقى البطاطس بتاعتنا جاهزة, وبالهنا والشفا.