8 حاجات تاكليها لما تحسي ان عندك رغبة شديدة في اكل الوجبات السريعة

ريهام محمود
ريهام محمود
1885

مافيش حد مش بيمر عليه لحظات رغبة شديدة للاكل, والاسوأ لما تكون الرغبة دي للوجبات السريعة والاطعمة الغير صحية, يعني نادرا جدا لما هتبقي جعانة اوي هتفكري انك تاكلي فاكهة او خضار, لكن دايما هتلاقي رغبتك رايحة ناحية الشوكولاتة والايس كريم والشيبسي وكل الاطعمة المليانة بالسعرات الحرارية, عشان كده النهاردة من خلال موضوعنا هنقولك بدايل صحية للوجبات السريعة تاكليها لما تحسي برغبة شديدة في اكل الاطعمة الغير صحية.

الرغبة الشديدة في الاكل بتيجي من نفس الجزء في المخ المسؤول عن الذاكرة والسعادة والمكافأة, والرغبة دي مش بيتم اشباعها الا لما الشخص بياكل اطعمة غنية بالسعرات الحرارية اللي تشبع جوعه, واول ما بيتم اشباع الرغبة دي الشخص بيوصل لحالة رضا بسبب الهرمونات اللي بتدي للجسم جرعة سعادة بسبب الوجبة دي, ولو فكرنا في الموضوع كويس هنلاقي المخ بيمشي بنفس الطريقة في حالة الادمان, وده السبب ان ناس كتير بتحس برغبة شديدة في الاكل لما بيحسوا بالتوتر او عدم الرضا, ولكن الرضا ده بيكون وقتي او لفترة قصيرة, لكن على المدى الطويل,  بيكون ليها اثار جانبية على الصحة.

استهلاك الوجبات السريعة بكميات كبيرة بيرتبط ارتباط مباشر بزيادة الوزن وكتير من الامراض, وممكن يخليكي كمان تحسي بالكسل والخمول دايما, عشان كده ضروري جدا اننا نلاقي بدايل صحية للوجبات السريعة عشان تشبعي الرغبة الشديدة في الاكل, والنهاردة معانا قايمة بالاطعمة الصحية اللي جسمك هيشكرك عليها, والاطعمة دي تعتبر بدايل صحية جدا هتشبع رغبتك في اكل الاطعمة الغير مرغوب فيها او الغير صحية.

بدايل صحية للوجبات السريعة:

1- التوت او الفاكهة المجففة بدل الحلوى:

الحلوى داخل فيها نسبة كبيرة من السكر الصناعي او السكر الطبيعي, ومالهاش اي قيمة غذائية على الاطلاق ومضرة بالصحة, بعكس التوت والفواكة المجففة المفيدة للجسم, عشان كده بننصحك المرة الجاية لما يكون عندك رغبة في اكل اي نوع حلويات استبدليها بشوية توت او فاكهة مجففة, وتقدري كمان تجميدهم وتاكليهم, ودي تعتبر طريقة ممتعة جدا وفعالة تخدعي بيها جسمك انك بتاكلي حلوى.

بدايل صحية للوجبات السريعة 1
بدايل صحية للوجبات السريعة 1

2- استبدلي البطاطس المقلية ببطاطا ودجز في الفرن.

البطاطس المقلية تقريبا كلنا بنضعف قدامها وبنحس برغبة شديدة في اكلها, ولكن البطاطس المقلية بتكون غنية جدا بالدهون, عشان كده بننصح انك تستبدليها بشرايح البطاطا الودجز اللي معمولة في الفرن, وتحضيرها سهل جدا, قطعيها ودجز وحطيها على صينية ورشي عليه كمية بسيطة من زيت الزيتون, وتبليها بالملح والفلفل ودخليها في الفرن تتشوي, دي تعتبر بديل مثالي جدا للرغبة الشديدة في الوجبات السريعة.

بدايل صحية للوجبات السريعة 2
بدايل صحية للوجبات السريعة 2

3- الشوكولاتة الغامقة كبديل للشوكولاتة العادية:

كمان الشوكولاتة من الحاجات اللي بتبقى عندنا رغبة شديدة جدا في اكلها, ولكن الشوكولاتة بتحتوي على السكريات المضافة اللي بتكون مش كويسة للصحة, ولكن من ناحية تانية الشوكولاتة الغامقة بتحتوي على نسبة سكر اقل بكتير من العادية, وكمان اثبتت قدرتها على تحسين صحة القلب والاوعية الدموية, عشان كده تعتبر بديل صحي جدا.

بدايل صحية للوجبات السريعة 3
بدايل صحية للوجبات السريعة 3

4- استبدلي الصودا بالمية بالليمون او المية الباردة:

الصودا او المشروبات الغازية اللي في اشخاص كتير بيشربوا منها كميات كبيرة بشكل يومي, ولكن كلنا عارفين هي قد ايه مضره للصحة, عشان كده بننصح انك تستبدليها بالمية بالليمون او بالمية السقعة العادية, المشروبات دي هترطبك وهخليكي تحسي بالحيوية والنشاط من غير ما تضر بصحتك.

بدايل صحية للوجبات السريعة 4

5- استبدلي الايس كريم بالزبادي المثلجة:

اكيد في اوقات كتير بتمر علينا بنحس برغبتنا الشديدة في اكل الايس كريم بنكهاته المختلفة اللذيذة, ولكن في بديل صحي ولذيذ جدا للايس كريم وهو الزبادي المثلجة, وهتلاقي كمان متوفر بنكهات كتير زي الايس كريم بالظبط, يعني هيكون عندك اختيارات كتير تختاري منها اللي انتي عايزاه وتنوعي.

بدايل صحية للوجبات السريعة 5

6- استبدلي الشيبسي بالفشار اللي معمول في البيت:

الشيبسي من الحاجات المغرية جدا اللي مش بنضعف قدامها, ولكن من ناحية تانية في بديل صحي اكتر ليه وهو الفشار الخالي من اي دهون, يعني يتعمل من غير اي زبدة او زيت.

بدايل صحية للوجبات السريعة 6

7- استبدلي الكوكيز بالمكسرات والتمر:

الكوكيز من اسهل الوجبات الخفيفة والسريعة اللي ممكن تاكليها في نص الليل لو حسيتي بالجوع, ولكن زيها زي باقي الحلويات بتحتوي على كمية كبيرة من السكريات, وكبديل صحي ليها ممكن تاكلي مكسرات, او تمر الغني بالحديد المفيد للجسم, ودي تعتبر طريقة صحية تتغلبي بيها على الرغبة الشديدة والجوع.

بدايل صحية للوجبات السريعة 7

8- استبدلي خبز الهامبرجر بالخس:

المرة الجاية لما تحسي برغبة شديدة في اكل الهامبرجر, استبدلي خبز البرجر بالخس, هاتي شريح خس حطيها عليها شريحة البرجر وضيفي عليها الجبنة والطماطم او اي حاجة تانية بتحبي تضيفيها عادة للبرجر “ولكن برغم اي حاجة حافظي على صحتك” وحطي من فوق شريحة خس تانية زي الساندوتش بالظبط, وبكده يبقى عندك وجبة برجر لذيذة وصحية.

بدايل صحية للوجبات السريعة 8

مقالات متعلقه

وصفات سناكس صحية من غير زيت

وصفات سناكس صحية من غير زيت

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

7 اطعمة ابعدي عنهم تماما لو بتحاولي تخسري وزن

7 اطعمة ابعدي عنهم تماما لو بتحاولي تخسري وزن