12 جملة ممكن تسبب اذى لطفلك, و 12 حاجة المفروض تقوليها بدالهم

بقلمريهام محمود فيمنوعات visibility285

الكلمة ليها تأثير قوي جدا, والحاجات اللي بيقولها الاب والام للاطفال ممكن تتفضل في الذاكرة بتاعتهم للابد ومينسوهاش ابدا, وكلمات الحب بتكون شخصية افضل في المستقبل, ولكن الكلمات اللي كلها غضب او تأنيب دي بتخلي الشخصية في المستقبل مهزوزة والطفل يكبر وهو معندوش ثقة في نفسه, وفي جمل وكلمات ممكن الاباء والامهات بيشوفوا انها عادية وآمنه جدا ولكن هي بالعكس بتكون مؤذية, وممكن انها تقلل من احترام الطفل لنفسه وتخليه يحس بعدم الامان, والنهاردة من خلال موضوعنا هنتعرف على جمل مؤذية لطفلك المفروض تتجنبيها, وايه الحاجات اللي اللي ممكن تقوليها بدالها.

جمل مؤذية لطفلك:

اتجنبي: “انا فخورة بيك” او “عمل رائع او جميل”.

جربي: “لازم تكون فخور جدا بعملك او بانجازك” او “انت عملت الهوم ورك او حليت البازل بالسرعة دي”.

الجملة الاولانية يمكن تظهر عادية وبريئة جدا ومافيهاش مشكلة, لكن الاب والام لما يمدحوا الطفل على اي حاجة وعلى كل الحاجات البسيطة من اول انه خلص اكله لحد انه رسم صورة مثلا, هيبقى المدح مع الوقت مالوش معنى وهيفقد قيمته, عشان كده لازم المدح يكون على حاجات محددة متعلقة بانجازات ابنك وشجعيه انه يكون منتقد لنفسه عشان يحسنها اكتر, وانه كيون فخور بالحاجات اللي عملها بشكل كويس.

اتجنبي: “استنى لما باباك (مامتك) يرجع البيت.

جربي: “متعملش كده مرة تانية لان التصرف ده بيضايقني لانه … وتكملي الجملة حسب الموقف اللي اللي الطفل عمله”.

لما تقولي للطفل اول جملة “وتأجلي” عقاب الطفل على الحاجة الغلط اللي عملها, لما الاب يرجع للبيت او العكس لما الام ترجع للبيت, اول حاجة الطفل هينسى اساسا هو عمل ايه, والحاجة التانية ده هيخوف طفلك, لما يتحول الام او الاب ل “لشخص سيء” وهيقلل من سلطتك, عشان كده حاولي حل المشكلة بنفسك واشرحي لطفلك سبب غضبك من سلوكه او تصرفاته.

جمل مؤذية لطفلك
جمل مؤذية لطفلك

اتجنبي: “يومك كان عامل ازاي”.

جربي: “ايه افضل حاجة في يومك”.

“يومك كان عامل ازاي” هو في الحقيقة سؤال فاضي وعام اوي وهتبقى اجابته بالكتير كلمة او كلمتين, لكن لو عايزة فعلا تعرفي يوم طفلك كان عامل ازاي, اسأليه اسئلة محددة تشجعه انه يقول اجابات طويلة وفيها تفاصيل اكتر.

اتجنبي: “مافيش حاجة حلوة لحد ما تخلص وجبتك”.

جربي: “اولا, هناكل الاكل بتاعنا, وبعدها هناكل الحلويات”.

الجملة الاولى لما هتقوليها انتي هتقللي من قيمة الحاجة الحلوة اللي هتديها للطفل, وهتقللي فرحته من الوجبة نفسها, عشان كده حاولي انك تغيري في شكل الجملة شوية, ان الوجبة والحلويات الاتنين طعمهم لذيذ بس لازم يتاكلوا بترتيب معين ان الحادق وبعدين الحلو.

اتجنبي: “خليك سريع او اسرع”.

جربي: “خلينا نبقى اسرع” او “تعالى نشوف مين هيلبس الهدوم او الشوز اسرع”.

لما تضغطي على ابنك انه يعمل كل حاجة بسرعة, كده بتزودي عليه الاجهاد وهتخليه يبقى خايف على طول انه ممكن يتأخر او يفوته حاجة, حاولي انك تحرفي الجملة شوية بطريقة تخلي طفلك يحس انك معاه في نفس الفريق وهو مش لوحده.

جمل مؤذية لطفلك

اتجنبي: “سيبني لوحدي”.

جربي: “ايه اللي حصل؟” او “اديني دقيقة اخلص اللي في ايدي, وهنتكلم”.

لو دايما بتبعدي طفلك عنك, ده هيخليه يحس او يفكر انه مافيش فايدة من طلب المساعدة منك او النصيحة, لانك دايما مشغولة, ولما الاطفال مش بيحصلوا على الدعم الكافي في طفولتهم, لما يكبروا هيبقوا اقل مشاركة في عواطفهم وافكارهم مع آبائهم, لو مش هتقدري تدي انتباهك لطفلك في نفس اللحظة, فاطلبي منه انه يصبر ويديكي شوية وقت لحد ما تخلصي الحاجة اللي في ايدك وبعدين هتكلميه.

اتجنبي: “لازم تتكسف او تخجل من نفسك (Shame on you).

جربي: “الحاجة اللي انت عملتها ضايقتني لان… وكملي حسب الموقف”.

طفلك ممكن يكون سنه صغير جدا انه يفهم يعني ايه يخجل من نفسه, الجملة دي مش بتدي للطفل اي فكرة عن سبب ان الحاجة اللي عملها دي غلط باي شكل بالظبط, والاكتر من كده الدراسات اثبتت ان الجملة دي ممكن تخلي الاطفال اكتر عدوانية, عشان كده الافضل انك تحاولي تشرحي للطفل ايه الغلط بالظبط في سلوكهم وازاي يتجنبه في المستقبل.

جمل مؤذية لطفلك

اتجنبي: “متعيطش”.

جربي: “ايه اللي حصل؟” او “ايه اللي مزعلك او مضايقك”.

العياط امر طبيعي جدا, حتى لو كان سبب عياط طفلك شيفاه مش مهم بالنسبة لك, لانه بكلمة “متعيطش” انتي بتقللي من مشاعر طفلك, وهتخليه يحس ان عواطفه ومشاعره مش مهمة, وبدل كده حاولي تبيني له انك مهتمة وانك عايزة تساعديه.

اتجنبي: “مافيش حاجة تخاف منها”.

جربي: “انا شيفاك خايف, وانا هنا معاك”.

الجملة الاولي لو قولتيها مش هتحسس بالطفل باي راحة لو هو خايف فعلا من حاجة, ومرة تانية بتبعتي رسالة لطفلك ان مشاعره مش مهمة, بدل كده, اتعاطفي مع مشاعر طفلك واتناقشي واتكلمي معاه في سبب خوفه.

اتجنبي: “لاني قولت كده”.

جربي: “دلوقتي ميعاد قفل التليفزيون وبداية عمل الهوم ورك”.

الجملة الاولى مش بتدي طفلك اي فكرة عن السبب اللي المفروض يوقف او يبدأ في عمل الحاجة اللي انتي عايزاها منه, وهيحسس طفلك انه مالوش حقوق, وان انتي دايما اللي بتتحكمي في كل حاجة, بدل كده حاولي انك تديه تعليمات واضحة وبسيطة ومفهومة والشرح باختصار السبب ورا كلامك.

اتجنبي: “انا كنت بعمل ده لما كنت قدك”.

جربي: “خليني اعلمك تعمل ده”.

كل الاطفال بيتطوروا بشكل مختلف ومقارنة طفلك مع الاطفال التانيين, حتى لو كان انتي وانتي صغيرة, مش افضل فكرة, بدل كده, حاولي تعلمي طفلك ازاي يعمل حاجة هو مش عارف يعملها.

اتجنبي: “انا حاسه بخيبة امل فيك”.

جربي: “الحاجة اللي انت عملتها ضايقتني لان… وكملي حسب الموقف”.

جملة “انا حاسة بخيبة امل فيك” او “انت خيبت املي”, الجملة دي هتخليه يحس انه مش بيحقق توقعاتك فيه, عشان كده الافضل انك تفهمي طفلك وتشرحي له تصرفاته بتأثر عليكي ازاي وبتخليكي تحسي بايه من غير استخدام كلمات “خيبة امل” او “خيبت املي”.

في النهاية بننصحك لو انتي بتستخدمي جمل من اللي احنا قولناها لطفلك, حاولي انك تتجنبيها وتستبدليها بالجمل الصح اللي تبني لطفلك شخصية سليمة.

7 جمل بتأثر بشكل سلبي على طفلك المفروض متقوليهمش ابدا !

جمل بتأثر بشكل سلبي على طفلك
جمل بتأثر بشكل سلبي على طفلك