طرق مختلفة لعمل البيض للفطار كل يوم..واسباب ليه المفروض تاكلي بيض على الفطار

ريهام محمود
ريهام محمود
في
صحة
2207

البروتين من العناصر المهمة جدا للجسم, واللي بتساعد على الحفاظ على العضلات واللياقة البدنية لجسمك, وواحد من اكتر الاطعمة الغنية بالبروتين هو البيض, البيض يعتبر الطريقة الاسهل والارخص والاكتر تنوع اللي ممكن يمد جسمك بالبروتين اللي محتاجه يوميا, ومش بس هيساعدك على زيادة البروتين في الجسم ولكن كمان هيساعد على تحسين الصحة العامة, لانه غني بالحديد والاحماض الامينية ومضادات الاكسدة, وصفار البيض لوحده بيحتوي على الكولين, وهي مادة مغذية بتساعد على تقليل الدهون, وافضل طريقة عشان تتأكدي انك بتحصلي على فطار صحي انك تخلي البيض جزء من وجبة فطارك كل يوم, عشان كده النهاردة من خلال موضوعنا هنساعدك تنوعي وهنقولك طرق لعمل البيض عشان يبقى وجبة الفطار الاساسية بتاعتك كل يوم من غير ما تزهقي, وليه المفروض تدخليه في وجبة فطارك كل يوم.

طرق لعمل البيض:

1- البيض المسلوق:

اول طريقة معانا عشان تدخلي البيض في وجبة الفطار بتاعتك وتحصلي على البروتين, هي البيض المسلوق اللي تعتبر اسهل وابسط طريقة لاكل البيض, وممكن عشان توفري في وقتك في يوم اجازتك تسلقي بيض للاسبوع كله, وتاخدي كل يوم بيضة لوجبة الفطار.

طرق لعمل البيض 1
طرق لعمل البيض 1

2- ساندوتش بيض:

اضافة شرايح او قطع بيض للساندوتش من الطرق اللي ممكن تعتمدي عليها لوجبة فطار سهلة وسريعة, وفي نفس الوقت هتملى معدتك لفترة طويلة ومش هتخليكي تحسي بالجوع بسسرعة, لان البيض هو مزيج بين حاجتين بروتين التخسيس بالاضافة للدهون الصحية, اعملي ساندوتش البيض كوجبة فطار ولاحظي الفرق بنفسك.

طرق لعمل البيض 2
طرق لعمل البيض 2

3- كلاسيك فرنش توست مع البيض:

بدل البانكيك الحلو على وجبة الفطار اللي يعتبر وجبة غير صحية, استبدليه بالفرنش توست مع البيض, كل اللي هتحتاجيه شريحة او شريحتين توست اغمسيها في لبن خالي من الدسم وحمريها في طاسه مع قطعة زبدة لحد ما يبقى لونها دهبي فاتح, وكليها مع البيض.

طرق لعمل البيض 3
طرق لعمل البيض 3

4- البيض المخفوق مع الخبز البلدي:

البيض السكرامبلد او المخفوق من اسهل الطرق اللي ممكن تعمليها على الفطار, ولو انتي متعودة تاكلي البيض المخفوق بالطريقة العادية, ممكن تغيري فيه وتاكليه في الخبز البلدي بالقمح الكامل مع شرايح الخس والطماطم والبصل, او مع شريحة جبنة.

طرق لعمل البيض 4
طرق لعمل البيض 4

5- بيض بالخضار “فريتاتا”:

ممكن تغيري من الطرق التقليدية زي البيض المخفوق والمسلوق او الاومليت, وتعملي بيض بالخضار او الفريتاتا, وممكن تعملي الطريقة دي في الفرن او على البوتاجاز من فوق, اخفقي البيض كويس جدا لمدة كام دقيقة, وحطي عليه اي نوع خضروات مفضلة عندك ممكن فلفل, بروركلي, كوسة, وضيفي له التوابل, واقليه في الطاسة مع الزبدة او عشان تخليه صحي اكتر ممكن تستخدمي بدل الزبدة زيت زيتون, وممكن تعمليه في الفرن.

طرق لعمل البيض 5

6- مج اومليت في الميكروويف:

طريقة سريعة لعمل البيض لو معندكيش وقت, اخفقي البيض في المج وضيفي عليه شوية لبن مع الملح والفلفل, واختاري اي نوع خضار مفضل عندك قدعية صغيرة وحطيه على الوش, وبعدين دخلي المج في الميكروويف, في دقيقتين بس هتكون وجبة فطارك جاهزة.

طرق لعمل البيض 6

اسباب ليه المفروض تدخلي البيض في وجبة فطارك:

1- البيض هيخلي معدتك مليانة لفترة اطول بكتير مقارنة بحبوب الفطار او التوست.

2- البيض هيساعدك على فقدان الوزن, لان زي ما قولنا النقطة اللي فاتت انه بيملى المعدة فترة طويلة, وبالتالي مش هتحسي بالجوع بسرعة ومش هتاكلي كتير.

3- البيض مش بيأدي لرفع مستويات الكوليسترول في الدم زي ما هو معروف عنه, المعلومة دي مش صح هي مجرد اسطورة او معلومة غلط عن البيض.

4- عنصر الكولين الموجود في البيض بيساهم في نمو المخ, وتحسين الذاكرة.

5- اللوتين والزياكسانثين في البيض, يعتبروا من مضادات الاكسدة اللي بتساعد على حماية البصر من التلف اللي ممكن يحصل بسبب التعرض للاشعة فوق البنفسجية.

طرق لعمل البيض 7

وصفة ازاى تعملى طبق بيض omelet مثالى فى خمس دقايق بس

وصفة ازاى تعملى طبق بيض omelet مثالى فى خمس دقايق بس
وصفة ازاى تعملى طبق بيض omelet مثالى فى خمس دقايق بس

مقالات متعلقه

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

دايت القلب لمدة 3 ايام: هيساعدك تخسي 4 كيلو مع الاطعمة الصحية للقلب

7 اطعمة ابعدي عنهم تماما لو بتحاولي تخسري وزن

7 اطعمة ابعدي عنهم تماما لو بتحاولي تخسري وزن

وصفات لسد الشهية وتخسيس الوزن

وصفات لسد الشهية وتخسيس الوزن