ليه الشتا هو افضل وقت لممارسة الرياضة لخسارة الوزن

بقلمريهام محمود فيتخسيس الوزن visibility1049

معظمنا تقريبا عندنا اعتقاد ان ممارسة الرياضة لفقدان الوزن في الصيف افضل, والسبب ورا ده اننا بنعرق كتير فبنفتكر انه اسهل حرق السعرات الحراية, لكن المفاجأة ان فصل الشتا هو افضل موسم لفقدان الوزن, والنهاردة هنتعرف بالتفصيل مع بعض ليه ممارسة الرياضة في الشتا افضل بكتير من اي وقت تاني في السنة.

ممارسة الرياضة في الشتا:

1- حرق دهون الجسم في الشتا اسرع من اي موسم تاني:

الجسم بيخزن نوعين من الدهون, واحد معروف باسم الدهون البيضا, والتاني باسم الدهون البني, الدهون البيضا هي اللي بتخلينا نكتسب وزن, والدهون البنية هي اللي بيحرقها الجسم لانتاج الطاقة اللي بنستخدمها في الانشطة البدنية اليومية, فلو بتسألي نفسك ازاي الشتا هيكون ليه دور في عملية حرق الدهون, الفكرة ان في فصل الشتا الجسم بيحرق كل الدهون المتخزنة عشان يحافظ على التدفئة, وبيتم حرق الدهون دي عشان جسمنا يتحمل الطقس البارد خلال موسم الشتا.

وده معناه ان جسمنا بيحرق دهون زيادة خلال فصل الشتا, عشان يحافظ على التدفئة اكتر من اي موسم تاني, والدهون البنية مش بس بتوفر لنا الطاقة لما بتتحرق, ولكن كمان بتمنع الاصابة بمرض السكر من النوع التاني, وتقدري تزودي الدهون البنية في الجسم بطريقة بسيطة جدا وهي انك تنامي في اوضة باردة, ده هيزود الدهون البنية بشكل طبيعي في الجسم.

ممارسة الرياضة في الشتا
ممارسة الرياضة في الشتا

2- رعشات البرد خلال فصل الشتا بتساعد في عملية حرق الدهون:

ايام البرد الشديد جسمنا ممكن تجيله رعشات برد لو الجسم مش مدفي كويس, هل تعرفي ان الرعشات دي تعتبر وسيلة لحرق الدهون في الجسم؟ الحقيقة انها فعلا بتساعد على ده, لما الجسم مش بيكون فيه نسبة كافية من الدهون البنية لحرقها وانتاج الطاقة عشان يحافظ على نفسه دافي, العضلات بتميل للانكماش, والانكماش المفاجيء ده للعضلات بيتسمى الارتعاش, الارتعاش ده بيساعد على انتاج الدهون البنية اللي بتساعد على حرق السعرات الحرارية لانتاج طاقة للجسم.

والدراسات اثبتت ان 15 دقيقة من الارتعاش ممكن انها تساعدك على حرق 100 سعرة حرارية في الجو البارد, لان الجسم بينتج هرمونات بتساعد على بتزود معدل حرق الدهون البنية.

ممارسة الرياضة في الشتا

3- النوم في اوضة باردة بيساعد على فقدان الوزن:

النوم في اوضة ضلمة في درجة حرارة منخفضة هيخليكي تنامي بشكل احسن وده هيساعد على فقدان الوزن, لان معروف ان واحد من الاسباب الرئيسية في زيادة الوزن هو النوم الغير كافي, وحسب الدراسات حددت درجة الحرارة المثالية اللي المفروض ننام فيها بين 15 – 19 درجة, ودرجة الحرارة دي هي المناسبة للجسم عشان ينام بشكل مثالي, والنوم الكافي بدوره هيساعدك على فقدان الوزن.

4- زيادة الدافع في الشتا:

حطي دايما في بالك انك تستفادي بالشتا اقصى استفادة عشان تحافظي على لياقتك البدنية, عشان تبقي جاهزة لموسم الصيف, والشتا هيبقى فرصة ليكي تستغليها عشان تفقدي وزنك بشكل اسرع, عشان كده بدل القلق والتفكير شكلك هيبقى ازاي في لبس الصيف, اعتبري الشتا هدية ليكي واشتغلي على نفسك وابدأي ظبطي جسمك فيه استعدادا لموسم الصيف.

اطعمة المفروض تتجنبيها للحصول على بطن مسطحة

اطعمة بتسبب الكرش