15 حيلة جمالية بالبيوتي بلندر هتخلي مكياجك يطلع احلى

ريهام محمود
ريهام محمود
في
مكياج
9647

البيوتي بلندر تعتبر من ادوات المكياج اللي ليها استخدامات كتير, ممكن نستخدمها مع الفونديشن والبودر والهايلايتر, وحتى كمان مع الايشادو, والنهاردة من خلال موضوعنا هنتعرف على استخدامات البيوتي بلندر وازاي تستفادي بيها اكتر في المكياج بشكل صح.

استخدامات البيوتي بلندر:

1- متهدريش من المنتج: استخدمي برايمر

قبل ما تستخدمي البيوتي بلندر لوضع الفونديشن, هاتي نقطة برايمر وحطيها على البيوتي بلندر, الحيلة دي هتعمل زي حاجز هيمنع ان البيوتي بلندر تمتص المنتج, وهيساعد كمان ان المكياج يطلع شكله احلى وناعم اكتر, وهيساعد على اخفاء المسام والعيوب.

استخدامات البيوتي بلندر 1
استخدامات البيوتي بلندر 1

2- لتغطية عالية بالفونديشن: استخدمي البيوتي بلندر رطبة

عشان الفونديشن يديكي تغطية كاملة ومثالية لكل عيوب البشرة, رطبي البيوتي بلندر بالمية قبل ما تستخدميها, واستخدمي طريقة الطبطبة او الضغط بالبيوتي بلندر في تطبيق الفونديشن عشان يديكي اعلى تغطية, واتجنبي مسحها على البشرة لانها كده مش هتديكي التغطية اللي مستنياها.

استخدامات البيوتي بلندر 2
استخدامات البيوتي بلندر 2

3- لو عايزة تظهري النمش: خففي الفونديشن بالبيوتي بلندر

النمش يعتبر من علامات الجمال وفي بنات مش بيحبوا يداروه بالمكياج, وعشان تعملي ده هاتي البيوتي بلندر رطبيها شوية وبعد ما تحطي الفونديشن, اضغطي بالبيوتي بلندر على عضم الخدين وجسر الانف, هتلقط شوية من المنتج وتخففه من المناطق دي, وهتظهر النمش.

استخدامات البيوتي بلندر 3
استخدامات البيوتي بلندر 3

4- عشان بشرتك تبقى Dewy: استخدمي بيوتي بلندر رطبة

لبشرة Dewy او شكلها نضر, استخدمي بيوتي بلندر رطبة بتطبيق المكياج, والطريقة دي ممكن تستخدميها مع اي نوع فونديشن, كل اللي هتعمليه بلي البيوتي بلندر بالمية واعصريها كويس جدا عشان تتخلصي من المية الزيادة قبل تطبيق الفونديشن.

استخدامات البيوتي بلندر 4
استخدامات البيوتي بلندر 4

5- لتصليح ال Cakey makeup:

لو مكياجك في نص اليوم حسيتي انه باظ او شقق, اسهل طريقة عشان تصلحيه, اول حاجة استخدمي منديل عادي او منديل امتصاص الزيوت الزيادة واضغطي بيه على البشرة عشان يمتص الزيوت الزيادة, وبعدين هاتي البيوتي بلندر حطي عليها كمية من كريم الاساس او الكونسيلر واضغطي بيها على البشرة كلها او الاماكن اللي حاسه انها باظت وامزجي بخفه بطريقة الضغط, الطريقة دي بتملى الاماكن اللي راح منها المكياج او باظ.

استخدامات البيوتي بلندر 5
استخدامات البيوتي بلندر 5

6- لتهدئة تقشر وجفاف البشرة:

لو بشرتك جافة ومقشرة, تقدري تهديها وترطبيها باستخدام البيوتي بلندر مع نقطة زيت, كل اللي هتعمليه حطي نقطة واحدة من اي نوع زيت للبشرة على البيوتي بلندر, وطبقيه على البشرة في حركات دائرية, الزيت هيرطب البشرة وينعمها والبيوتي بلندر هتشيل اي تقشر.

استخدامات البيوتي بلندر 6
استخدامات البيوتي بلندر 6

7- عشان تنوري منطقة تحت العين:

اسهل طريقة تحطي بيها بودرة تثبييت المكياج هي بالبيوتي بلندر, هاتي البيوتي بلندر خدي من البودرة وطبقيها تحت العين بحرقة النقر او الضغط على المناطق اللي عايزة تفتحيها وتنوريها, سيبي البودر لمدة من 3 – 5 دقايق وبعدين شيلي البودرة الزيادة بفرشة ناعمة.

استخدامات البيوتي بلندر 7
استخدامات البيوتي بلندر 7

8- لوضع الايشادو بسرعة: استخدمي بيوتي بلندر صغيرة

البيوتي بلندر الجافة الصغيرة من اسهل واسرع الطرق لتطبيق الايشادو, كل اللي هتعمليه خدي من الايشادو بالبيوتي بلندر سواء ايشادة لامع او مات, وطبقيه على الجفون, هتساعدك على عمل تغطية سريعة ومتساوية, وهتظهر اللون اكتر, اضغطي على البيوتي بلندر او ضميها بصوابعك وانتي بتحطي عشان تطبقي الايشادو بشكل دقيق ويطلع معاكي مظبوط, لو جربتي الطريقة دي مش هتستغني عنها ابدا في تطبيق الايشادو.

استخدامات البيوتي بلندر 8
استخدامات البيوتي بلندر 8

9- تطبيق الهايلايتر او البلاشر الكريمي:

ممكن كمان تستخدمي البيوتي بلندر لتطبيق البلاشر الكريمي او الهايلايتر, هتديكي لمسة طبيعية جدا, خدي من البلاشر بالبيوتي بلندر وطبقيه على طول عضمة الخد, وبعدين حطي الهايلايتر فوق عضمة الخد, ولو مش متوفر عندك بلاشر او خلص, ممكن تستخدمي الروج, حطي منه على الخدود وادمجيه بالبيوتي بلندر.

استخدامات البيوتي بلندر 9

10- اتخلصي من البلاشر الزيادة:

بتحصل كتير اننا ممكن نحط بلاشر زيادة, في الحالة دي بالناحية النضيفة من بيوتي بلندر رطبة, امسحي على البلاشر بخفة عشان تتخلصي من البلاشر الزيادة, ولو لقيتي اللون لسه تقيل خدي بودرة شفافة بالبيوتي بلندر وامشي بيها بخفة على البلاشر عشان تخففي لونه.

استخدامات البيوتي بلندر 10

11- جددي البيوتي بلندر القديمة:

لو البيوتي بلندر بتاعتك قديمة اوي ممكن تطولي عمرها وتستخدميها اكتر وتجدديها من خلال قصها نصين بالمقص, هتديكي حرف مسطح ومثالي لتطبيق البودر بيها.

استخدامات البيوتي بلندر 11

12- تطبيق الهايلايتر:

عشان تدي لوك طبيعي وحلو للهايلايتر وفي نفس الوقت تثبتي المكياج, هاتي البيوتي بلندر رشي عليها مثبت مكياج, واستخدميها لوضع الهايلايتر عن طريق الضغط على البشرة, حطيه على كل المناطق اللي عايزة تنوريها وتظهريها في الوش.

استخدامات البيوتي بلندر 12

13- للتحكم في اللمعان:

لو بشرتك دهنية وبتلمع ومش متوفر معاكي مناديل امتصاص الدهون الزيادة, تقدري تتخلصي منها بالبيوتي بلندر, اضغطي بيها على بشرتك هتمتص كل الزيوت الزيادة فورا, بس اتأكدي انك تنضفي البيوتي بلندر بعد استخدامها عشان ميتراكمش عليها الزهم والبكتيريا اللي ممكن يتنقل مرة تانية لبشرتك لما تيجي تستخدميها تاني.

استخدامات البيوتي بلندر 13

14- لتخفيف وتصليح المكياج:

لو رسمتي حواجبك ولقتيها بعد الرسم ان اللون تقيل او لخبطتي وانتي بترسمي, تقدري تخففي اللون باستخدم البيوتي بلندر, اضغطي بيها على الحواجب هتمتص اللون الزيادة وتخففه, ولو لخبطتي وانتي بترسمي حطي نقطة كونسيلر على الحرف المدبب للبيوتي بلندر ونضفي بيها اللخبطة حوالين الحواجب.

استخدامات البيوتي بلندر 14

15- لبشرة صحية نضفي البيوتي بلندر يوميا:

اخر نصيحة عشان تحافظي على بشرتك صحية وميتنقلش ليها اي حاجة من البيوتي بلندر, نضفيها بشكل يومي بعد كل استخدام, حطيها تحت المية الدافية وافركيها في الصابونة لحد ما تنضف والمية تبقى نازلة نضيفة منها, بعدها اضغطي عليها واعصريها كويس عشان تتخلصي من المية الزيادة, واضغطي عليها بخفة بفوطة او بمنديل, وكده تبقى جاهزة للاستخدام التاني, والعملية كلها مش هتاخد منك اكتر من 30 ثانية.

او ممكن في طبق صغير او كوباية حطي مية دافية وعليهم شوية شامبو اطفال او شاور جل, وانقعي البيوتي بلندر شوية وبعدين اشطفيها بالمية.

استخدامات البيوتي بلندر 15

مقالات متعلقه

7 حيل مكياج محتاجة تعرفيهم هتحسن مكياجك

7 حيل مكياج محتاجة تعرفيهم هتحسن مكياجك

خدعة فعالة بالآيلاينر ترفعي بيها الجفون المترهلة في 3 ثواني

خدعة فعالة بالآيلاينر ترفعي بيها الجفون المترهلة في 3 ثواني

7 حيل تجميلية مفيدة هتساعدك توفري فلوسك

7 حيل تجميلية مفيدة هتساعدك توفري فلوسك