المفروض تغسلي شعرك كام مره؟ عشان تحافظي عليه صحي

ريهام محمود
ريهام محمود
في
شعر
24125

هل سألتي اصحابك قبل كده عن عدد المرات اللي بيغسلوا فيها شعرهم؟ واتفاجئتي بالاجابة انها مختلفة في منهم بتغسل شعرها كل يوم, واللي بتغسله مرتين او تلات مرات في الاسبوع, ويمكن تلاقي اللي بتغسله مرة واحدة كل اسبوعين, وفي النهاية لما بتغسلي شعرك عدد مرت اقل ممكن تلاقيه زيت وبقى ملزق, ولو غسلتيه كتير ممكن الشعر ينشف, عشان كده لازم تعرفي بالظبط عدد مرات غسل الشعر المناسبة ليكي, وده اللي هنعرفه النهاردة من خلال السطور الجايه هنقولك عدد مرات غسل الشعر المناسبة لنوع شعرك.

عدد مرات غسل الشعر المناسبة:

عشان تحطي جدول لغسل شعرك دي مهمة مش سهلة, لان ده بيتوقف على نوع شعرك, نمط حياتك, والنشاط البدني, اللي تقدري تحددي منهم المفروض تغسلي شعرك كام مره, وده اللي هنعرفه دلوقتي بالتفصيل.

ايه اللي بيأثر عليكي لغسل شعرك؟

1- افراز الزهم:

بالظبط زي الوش, الشعر بيبقى دهني من افراز الزهم او الزيوت الزيادة اللي تعتبر مرطب طبيعي للشعر وبتغذيه, والزيوت دي بتخرج من الغدد الدهنية الموجودة عند جذور الشعر, وده بيخلي فروة الراس مزيته, وكمية الزيوت دي بتختلف من شخص للتاني بسبب الاختلافات الوراثية والهرمونات.

2- زيت الشعر:

زي ما قولنا في النقطة اللي فاتت ان الزهم هو السبب الرئيسي للزيوت في شعرك, وكمية الزيوت بتختلف من شخص للتاني وبالتالي كل شخص بيحتاج مستويات عناية واهتمام مختلفة, والشعر الخفيف والمفرود عادة بيحتاج لتنضيف اكتر لانه فروة الراس بتبقى مزيته بشكل اسرع بسبب انتشار الزهم, ومن ناحية تانية الشعر الكثيف او التقيل بيفضل جاف لفترة اطول.

3- الاتربة والعرق:

لو انتي بتمارسي نشاط بدني بيسبب لك عرق كتير, او عاشة في مناخ بيخلي الشعر يتراكم عليه تراب بسرعة, في الحالة دي انتي هتبقي محتاجة تغسلي شعرك اكتر, لان في علاقة مباشرة بين النشاط البدني وغسيل الشعر, كل ما زاد العرق هيزيد عدد مرات غسل الشعر, لان العرق بيسد مسام فروة الراس وبيسبب تراكم التراب والاوساخ.

4- القشرة:

القشرة تعتبر حالة جلدية بتسقط فيها خلايا الجلد الميت من فروة راسك في شكل قشور بيضا بتسبب الحكة, والزهم والعرق بالاضافة للقشرة, بتحددي على اساسهم عدد مرات غسل الشعر حسب شدة قشرة الراس.

5- منتجات تصفيف الشعر:

لو انتي من عشاق تصفيف الشعر بشكل مستمر وبتستخدمي السيشوار او المكوى دايما, فانتي مش محتاجة لغسل الشعر كتير, لان الغسيل الزيادة ممكن يأدي لهشاشة وتكسر الشعر.

وهنا يجي السؤال.. المفروض نغسل شعرنا كام مرة؟

عدد مرات غسل الشعر 1
عدد مرات غسل الشعر 1

كام عدد مرات غسل الشعر المناسبة ليكي؟

كام مرة المفروض تغسلي شعرك في الاسبوع؟ عدد مرات غسل الشعر بتختلف من شخص للتاني, لان كل شعر مختلف عن التاني وليه احتياجات مختلفة, ولكن بشكل عام, الاشخاص اللي فروة راسهم دهنية بيحتاجوا لغسل شعرهم بشكل يومي, والاشخاص اللي فروة راسهم جافة بيحتاجوا انهم يغسلوا شعرهم مرة او مرتين في الاسبوع, وفي النهاية الموضوع زي ما قولنا بيعتمد على نوع شعرك واسلوب حياتك.

– نوع الشعر وملمس الشعر: نسيج الشعر او نوعه من الاساسيات اللي بتحددي عليها عدد مرات غسل الشعر, نوع الشعر بيأثر على انتشار الزهم, لو شعرك كثيف وخشن مجعد توزيع الزهم هيكون بالتساوي على الشعر ومش هيزيت بسرعة وبالتالي مش هتحتاجي تغسليه كتير غالبا هيحتاج غسيل مرة واحدة في الاسبوع بس, اما لو شعرك خفيف ومفرد, هتحتاجي انه تغسليه عدد مرات اكتر خلال الاسبوع.

– نوع فروة الراس: المفروض فروة الراس الدهنية تتغسل عدد مرات اكتر من فروة الراس الجافة, لان غسيل فروة الراس الجافة كتير ممكن يزود فرصة الاصابة بقشرة الشعر ويضعف الشعر, يعني لازم تعرفي نوع شعرك وفروة راسك كويس عشان تحددي على اساسها عدد مرات غسيل الشعر, وفي نفس الوقت تسيبي الشعر يستفاد بشكل كافي من الزيوت الطبيعية اللي بينتجها.

– اسلوب الحياة والنشاط: لو نشاطك البدني اللي بتعمليه بيسبب افراز عرق وزهم زيادة, في الحالة دي انتي هتكوني محتاجة تغسلي شعرك عدد مرات اكتر, واسلوب حياتك كمان بيأثر على طرييقة العناية بالشعر, يعني لو انتي بتستخدمي الحرارة سواء سيشوار او مكوى بشكل منتظم, يبقى المفروض تقللي من عدد مرات غسل الشعر عشان تمنعي جفاف شعرك.

يمكن تتفاجئي دلوقتي ان غسل الشعر والغسيل بالشامبو مختلفين, لان غسل الشعر هو مجرد شطف الشعر بالمية, ولكن الغسيل بالشامبو هو استخدام الشامبو على الشعر, كام مرة المفروض تغسلي شعرك بالشامبو؟ تعالوا نعرف مع بعض.

عدد مرات غسل الشعر 2
عدد مرات غسل الشعر 2

كام مرة المفروض تغسلي شعرك بالشامبو؟

لما تغسلي شعرك بشكل اقل, انتي كده بتدربي فروة راسك انها تنتج كمية اقل من الزيت, وبالتالي تقليل عدد مرات غسيل الشعر, وعلى الرغم ان السؤال ده مالوش اجابة محددة, لانه بيعتمد على كل شخص بيفضل ايه, لكن في حاجة واحدة مؤكدة ان غسيل الشعر بالشامبو كتير ممكن يقلل من لمعة الشعر وينشفه, عشان كده لازم نفهم مع بعض طريقة عمل الشامبو على الشعر.

– ازاي الشامبو بيشتغل على الشعر؟

الشامبو مهمتة انه يزيل كل الاتربة والاوساخ والزيوت المتراكمة على فروة الراس, وغسل الشعر بالشامبو بشكل مفرط ممكن انه يزيل الزيوت الطبيعية الاساسية في فروة الراس, ويخلي الشعر جاف وهش وسهل التكسر, طيب يا ترى المفروض تعملي ايه لو عايزة تغسلي شعرك من غير ما تستخدمي الشامبو كتير؟ افضل اختيار هو الشامبو الجاف, لكن لازم تحطي في الاعتبار ان الشامبو الجاف هو وسيلة عشان تخلي الشعر يقعد فترة اطول ما بين فترات غسيل الشعر بالشامبو, لانه بيساعد على امتصاص الزيوت الزيادة بس لكن مش بينضف الشعر, يعني هيوفرلك وقت لو مشغولة ومعندكيش وقت تغسليه.

– مين الاشخاص اللي محتاجين يغسلوا شعرهم بالشامبو يوميا؟

مش كل الاشخاص بيحتاجوا غسل الشعر بالشامبو يوميا, والخبراء بينصحوا ان الاشخاص اللي شعرهم خفيف وفروة راسهم زيتية, وبيعانوا من قشرة الشعر, والاشخاص اللي بيمارسوا نشاط بدني كتير وبيعرقوا كتير, والاشخاص اللي عايشين في بيئة وجو حر ورطوبة, بيحتاجوا انهم يغسلوا شعرهم بالشامبو يوميا.

– مين الاشخاص اللي ممكن يقعدوا كذا يوم من غير غسيل شعرهم؟

الاشخاص اللي شعرهم كثيف او فروة راسهم جافة, يقدروا يقعدوا كذا يوم من غير ما يغسلوا شعرهم, لان شعرهم مش بيزيت بسرعة, ومن ناحية تانية الاشخاص اللي شعرهم خفيف زي ما قولنا هما اللي محتاجين يغسلوا شعرهم عدد مرات اكتر بالشامبو.

كام مرة المفروض تغسلي شعرك؟

مافيش قاعدة معينة المفروض تمشي عليها, ممكن لاي شخص فروة راسه وشعره صحي انه يقعد من 2 – 3 ايام من غير غسل الشعر, وتعتبر حكة الراس والقشرة والشعر الدهني علامات واضحة بتقولك انك المفروض تغسلي شعرك, وفي بعض الاشخاص عدد مرات غسل الشعر بشكل اقل بتساعدهم على تحسين جودة شعرهم.

جنب غسل الشعر بالشامبو, في طرق تانية لتنضيف الشعر زي استخدام الشامبو الجاف, الغسيل بالبلسم, والغسيل بالمية, دي تعتبر طرق بديلة لغسل الشعر بالشامبو, تعالوا نعرفها مع بعض.

عدد مرات غسل الشعر 3
عدد مرات غسل الشعر 3

طرق بديلة لغسيل الشعر:

1- الشامبو الجاف:

احنا اتكلمنا في موضوع قبل كده بالتفصيل عن الشامبو الجاف, الشامبو الجاف يعتبر طريقة مناسبة للاشخاص اللي مش بيحبوا يغسلوا شعرهم بالشامبو عدد مرات كتير, وعادة الشامبو الجاف بيكون متوفر في بخاخات كسبراي او كبودر, وبيحتوي بشكل اساسي على ترطيب, وريحة, وعوامل امتصاص بتمتص الزهم وبتخلي ريحة شعرك حلوة, يعني يعتبر مزيج من التنضيف والترطيب وتصفيف الشعر, وبننصح باستخدام الشامبو الجاف العضوي عن الانواع اللي بيكون داخل فيها مواد كيميائية مضرة.. وتقدروا تشوفوا من هنا طريقة عمل الشامبو الجاف في البيت بمكونات طبيعية.

2- الغسيل بالبلسم:

غسيل الشعر بالبلسم كمان اتكلمنا عليه قبل كده بالتفصيل, وهو بيعتمد على استبدال الشامبو بالبلسم لغسل الشعر, حطي البلسم على الشعر كله, وسيبيه لمدة دقايق, وبعدين اشطفيه بالمية, والطريقة دي مش بتنضف الشعر بس, ولكن كمان بتحافظ على رطوبته.

3- الغسيل بالمية بس:

في بعض الاحيان المية بس ممكن تكون كافية, لو مثلا خرجتي وشعرك اتعرض لتراب, او قعدتي تحت الشمس فترة طويلة, في الحالة دي كل اللي هتكوني محتاجاه انك اول ما ترجعي البيت خدي شاور مية باردة.

مع اتباع النصايح دي هتحافظي على شعرك صحي ورائع على طول.

عدد مرات غسل الشعر 4

مقالات متعلقه

خطوتين بس هيساعدوا على زيادة نمو شعرك بسرعة وتكثيفه

خطوتين بس هيساعدوا على زيادة نمو شعرك بسرعة وتكثيفه

مكونات طبيعية اساسية ومتعددة الاستخدامات للبشرة والشعر

مكونات طبيعية اساسية ومتعددة الاستخدامات للبشرة والشعر

4 فيتامينات ومعادن محتاجاهم للحصول على شعر قوي وصحي

4 فيتامينات ومعادن محتاجاهم للحصول على شعر قوي وصحي