كل اللي عايزة تعرفيه عن تقنية ال BB Glow وفوايدها للبشرة
تخيلي ان تصحي كل يوم الصبح ببشرة نقية وصافية وبلون موحد وخالية من الحبوب والندبات واي عيوب, ومتبقيش محتاجة انك تحطي مكياج, كل ده ممكن يتحقق عن طريق تقنية ال BB Glow, اللي هنتعرف عليها النهاردة وعلى فوايدها للبشرة من خلال السطور الجايه.
ايه هي تقنية ال BB Glow:
تقنية ال BB Glow هي تقنية كورية, بتعتمد هلى حقن البشرة بمصل تحت الجلد, بواسطة قلم مزود بابر رفيعة جدا, بتتحول لقنوات صغيرة بتنقل العناصر الفعالة لداخل البشرة, والجلسة مافيهاش اي الم خالص, والتقنية مناسبة للرجالة والستات, ولكل انواع البشرة.
تأثير الجلسة ممكن يستمر معاكي من 6 شهور لسنة حسب عدد الجلسات, وبنوصي بحد ادنى 4 جلسات بفاصل اسبوعين بين الجلسات لنتايج افضل, وبعد 5 جلسات النتايج بتستمر من 6 شهور لحد سنة.
مدة الجلسة تقريبا من ساعتين ل 3 ساعات.
بعد الجلسة مش محتاجة انك تغيري روتينك, تقدري بعدها تمشي على روتينك الطبيعي, الا في بعض حالات البشرة الحساسة اللي ممكن يحصلها تهيج او احمرار بسيط بعد الجلسة لمدة يوم او يومين, وبعض الاشخاص ممكن يعانوا من تقشر بسيط حوالين الفم والانف خصوصا لو انتي اصلا صاحبة بشرة جافة.
فوايد تقنية ال BB Glow:
1- بيخلي البشرة كأنها متغطية بطبقة فونديشن طبيعية, لانه بيتم اختيار درجة لون المصل المناسبة للون بشرتك وبيتحقن بشكل مباشر تحت الجلد.
2- التقنية بتعالج كل مشاكل البشرة من بقع غامقة, اثار حب الشباب, الوردية, والحبوب الحمرا, الندبات, كمان المصل بيحتوي على مضادات الاكسدة اللي بتحفز انتاج الكولاجين في البشرة, وبتوفر التغذية والترطيب للجلد, وبيحميها من اضرار اشعة الشمس, وكل ده بيساعد على تجديد البشرة وبيخليها ناعمة وشكلها صحي بعد جلسة او اتنين بس من العلاج ده.
3- بيغطي كل عيوب البشرة زي الاحمرار, الندبات, البثور, التجاعيد, الالتهاب.
4- بتساعد على تحسين نسيج الجلد.
5- هتغنيكي عن استخدام الفونديشن او الافراط في تطبيق المكياج بشكل عام, لانها بتخلي البشرة خالية من اي شوائب, بالاضافة ان المصل بيحتوي على مادة “السيليكا” اللي بتدي اشراق ونضارة للبشرة.
6- تقنية ال BB Glow ممكن تستخدم على كل انواع البشرة اللي بتعاني من الشوائب, وخصوصا البشرة الدهنية المعرضة لحب الشباب والبشرة الحساسة اللي بتعاني من الاحمرار.
الحالات اللي المفروض تتجنب العلاج:
– الحمل.
– الرضاعة.
– سرطان الجلد.
– لو بتعاني من اي مشاكل جلدية زي الاكزيما والصدفية.
– لو بتاخدي اي علاج هرموني.
– العدوى النشطة.
التحذيرات بعد الجلسة:
1- خلال اول 24 ساعة, متغسليش وشك او تستخدمي اي مرطبات او مكياج, ممكن تاني يوم تستخدمي المكياج المعدني بس.
2- اتجنبي التعرض لاشعة الشمس لفترة اسبوعين بعد الجلسات, ولو مضطره تتعرضي للشمس, لازم تستخدمي صن بلوك بعامل حماية ميقلش عن 30.
3- متستخدميش الساونا او تنزلي حمام السباحة بعد الجلسة لمدة اسبوع واحد.
4- متستخدميش اي مقشر لمدة اسبوع.
5- متمارسيش رياضة لمدة من 1 – 2 يوم بعد الجلسة.
6- متستخدميش الصابون القاسي او السكراب او منتجات العناية بالبشرة التقيلة لمدة اسبوع واحد بعد الجلسة.
والتحذيرات دي ممكن تتنفذ بشكل عام لاي بشرة, ولكن بشكل خاص لو بشرتك حساسة اوي وممكن تتعرض لتهيج او احمرار هيكون الافضل انك تمشي على الروتين ده بعد الجلسة.
