8 منتجات تجميل بتستخدميها بشكل غلط تماما وممكن تضر بشرتك
اوقات كتير ممكن تكوني بتعملي كل حاجة لبشرتك وبتهتمي بيها لكن في النهاية مش بتوصلي للنتيجة المتوقعة او اللي انتي منتظراها, لكن ده مش معناه ان تغيري منتجات التجميل بتاعتك كلها, ممكن يكون بس كل اللي عليكي تعمليه انك تغيري الطريقة اللي بتستخدمي بيها المنتجات دي, والنهاردة من خلال موضوعنا هنقولك اكتر غلطات جمالية اللي ممكن يكون اغلبنا بيقع فيها.
غلطات جمالية ممكن تضر بشرتك:
1- بتستخدمي الويبس لازالة المكياج كل يوم:
اكيد الويبس من اسهل واسرع الطرق لازالة المكياج واوقات كتير بنستسهل ونستخدمها بشكل يومي, لكن غلط انك تستخدميها بشكل يومي, اولا انها مش بتنضف البشرة بشكل كامل, والاكتر من كده كمان انها مصنوعة من مادة خشنة ممكن تسبب تهيج وجفاف وتمدد للبشرة, عشان كده نصيحتنا ليكي انك تستخدمي الويبس بس في الاوقات اللي انتي مش قادرة توصلي فيها للمية او الغسول المناسب, ولكن للعناية اليومية المفروض تستخدمي منظف رغوي او جل.
2- بتستخدمي السيروم لوحده:
السيروم المفروض تستخدميه قبل الكريم المرطب, والافضل يكون بالليل قبل النوم, خصوصا لو السيروم بيحتوي على الريتينول, ده هيخلي الجلد يمتص كل العناصر الغذائية اللازمة, وهيبقى فعال اكتر, وفي موسم الصيف متستخدميش منتجات الريتينول الا مع واقي شمس لانها بتخلي البشرة حساسة جدا لاشعة الشمس واللي ممكن تسبب لك حروق الشمس.
3- بتستخدمي البيوتي بلندر وهي جافة:
البيوتي بلندر لازم تكون رطبة قبل الاستخدام, لانها لما بتكون جافة بتمتص كتير من المنتج ومش هتوزعه على البشرة بالتساوي وبالتالي النتيجة في النهاية مش هتطلع زي ما انتي عايزاها ومش هيديكي التغطية المطلوبة.
4- مش بتعرفي الفرق ما بين الكونسيلر ومصحح البشرة:
في كتير من البنات ممكن يكونوا بيخلطوا بين اكتر من منتج ومش بيعرفوا الفرق بينهم او استخدام كل واحد فيهم ايه, عشان كده حبينا نوضح الفرق بين منتجين بنات كتير ممكن تكون بتخلط بينهم وهما الكونسيلر ومصحح البشرة, الكونسيلر بيستخدم على منطقة تحت العين والمنطقة القريبة من العين بس, لكن المصحح بيستخدم لاخفاء عيوب الجلد لو في حبوب او بقع او غيره, وفي فروق دقيقة جدا لازم تعرفيها لما تيجي تستخدمي المنتجين دول, لما تيجي تستخدمي الكونسيلر لازم ترطبي البشرة قبلها, والمصحح لازم تحطيه بطريقة التدليك في حركات دائرية عشان يبقى طبيعي اكتر على الوش.
5- بتستخدمي الغسول الرغوي والجل لازالة المكياج بس:
الغسول بيكون اكتر فايدة لو استخدمتيه مرتين في اليوم الصبح وبالليل مش بس لازالة المكياج, لانه استخدامه الصبح بيساعد على ازالة كل الاوساخ والجلد الميت والزيوت الزيادة والعرق اللي اتراكم على جلدك طول الليل, الافضل كمان انك تتجنبي طريقة الدعك واستخدمي المنظفات اللي بتحتوي على الاحماض, لان التعامل بقسوة مع البشرة ممكن يضرها اكتر من انه يفيدها.
6- بتسيبي الماسك طول الليل او فترة طويلة لحد ما ينشف خالص:
كل ماسك لازم تستخدميه حسب الارشادات بتاعته, اتجنبي انك تسيبي الماسك طول الليل الا لو هو ماسك ليلي مخصوص, لان غير كده ممكن يأدي لمشاكل خطيرة في الجلد, وضروري انك تشيلي اي ماسك قبل ما ينشف خالص, لانه لما هينشف اوي هيبدأ في امتصاص الرطوبة من الجلد وده هيخلي بشرتك جافة اكتر, ونفس الكلام ينطبق على ماسك الطين, ولازم تحطي منه طبقة سميكة عشان يمتص الرطوبة بشكل ابطأ من البشرة, وشيليه وهو لسه لزج او طري شوية.
7- فرك الوش بمنتج بيحتوي على الكحول:
كل مستحضر اكيد ليه تأثير مختلف على الوش, وبتختلف مكونات كل منتج حسب وظيفته او الغرض منه, وفي الغالب هنلاقي معظم مستحضرات التجميل بتحتوي على نسبة من الكحول, ولو انتي بتستخدميها بشكل مستمر, هيبدأ الجلد انه ينتج زيوت اكتر كرد فعل على المواد الكيميائية القاسية اللي بيتعرض لها, عشان كده المفروض ان المستحضر ميتحطش على الوش كله, ولكن بدل كده استخدميه بس على مناطق محددة اللي هي فيها مشاكل او محتاجة عناية اكتر.
8- مش بتغسلي ماء ميسيلار من على البشرة:
ماء ميسيلار شبه اي مستحضر تجميل تاني, ولكن الفرق الوحيد انه خالي من الكحول, ولكن بيحتوي على مواد تانية نشطة, ولو متغسلش بالمية بعد ما تمسحي بيه وشك, كل الاوساخ والاتربة اللي جمعها هتفضل على البشرة, ولو سيبتي ماء ميسيلار على بشرتك فترة طويلة هيعمل نفس تأثير الصابون على الجلد, وده هيأدي لتهيج البشرة.
17 حيلة جمالية هتوفرلك في الفلوس كل بنت بتحب المكياج محتاجة تعرفهم
